Klei Aê Diê Blŭ: Klei Bi Hriêng 17:7-11
Êlan kliăng: “Kâo jing klei mngač hriê leh kơ lăn ala, čiăng kơ hlei pô đăo kơ kâo amâo lŏ dôk hlăm klei mmăt ôh” (Y-Yôhan 12:46)
Klei êmuh ksiêm mĭn: Si mtao Salômôn lač kơ bruă phung ƀai? Ya klei bi kmhal kơ phung ƀai? Ya klei drei ngă čiăng ñĕ kơ klei ƀai leh anăn êbat hlăm klei mngač Aê Diê?
Mtao Salômôn lač kơ knuih hdĭp leh anăn bruă phung ƀai čiăng đru anak ñu thâo kơ êlan kpă, klei djŏ hŏng klei jhat, êlan soh. Tal sa, mtao yua klei bi hmô čiăng lač kơ phung mluk “amâo năng ôh” hŏng klei blŭ siam. Diñu blŭ mgao, luar, jing klei blŭ amâo kbiă mơ̆ng phung mâo kơhưm ôh, msĕ si Y-Êsai lač leh:“Arăng amâo srăng lŏ pia mnuih mluk pô năng arăng mpŭ ôh, kăn mpŭ rei kơ pô mplư” (Ê-sai 32:5). Tal dua, phung ƀai yua ngăn sun msĕ si boh tâo yuôm čiăng mă klei myun leh anăn klei tŭ dưn. Tơdah phung khua kiă kriê mă ngăn sun, phung ƀai srăng mjhua hŏng klei êră anei čiăng mă klei tŭ dưn. Tal tlâo, phung ƀai mđing kơ klei bi roh, kah êpul. Diñu mñă wĭt mñă nao klei soh phung mkăn čiăng bi kah ƀĭng găp sĭt suôr hrô kơ klei khăp leh anăn bi mguôp. Knhal tuč, phung ƀai amâo tŭ ôh kơ klei bi ƀuah mkra. Phung thâo mĭn mdih sĭt hmư̆ klei ƀuah mkra, bi phung ƀai wăt tơdah arăng ƀuah mkra ăt kăn hmư̆, kăn bi mlih, lŏ dơ̆ng ngă klei soh jhat. Diñu tŭ boh jhat, giê hnuăt čăm. Yua klei bi kmhal kăn klă sĭt mơh dưi bi mlih phung ƀai, ƀiădah ăt dưi bi mkhư̆ klei soh diñu ngă, răng kriê phung bai amâo ngă jhat lu hĭn. Boh blŭ “dĭng ktang ƀai” (êlan 11b) mñă kơ phung răk kơ “Klei mtao ngêñ jing dĭng ktang klei djiê” ba klei bi kmhal kơ phung ƀai, bi phung thâo mĭn ñĕ kơ klei anăn (Klei Bi Hriêng 16:14).
Phung đăo kơ Krist brei bi êdah nanao knuih mơ̆ng Yang Krist. Klei blŭ phung đăo kơ Krist brei kpă ênô, thâo răng, djăp bruă ngă brei kpă mngač, amâo ƀơ̆ng ngăn sun, amâo mguôp hŏng phung ƀai ôh. Klei hdĭp phung đăo kơ Krist amâo bi ktlah ôh hŏng klei khăp kyua Aê Diê jing Klei Khăp, brei drei bi êdah knuih hdĭp thâo khăp čiăng mơ̆ng anăn arăng ƀuh Aê Diê. Klei hdĭp phung đăo kơ Krist brei mđing kơ klei doh jăk, kmhal klei soh čiăng bi mlih. Khua Yang Yêsu lač: “Kâo jing klei mngač hriê leh kơ lăn ala, čiăng kơ hlei pô đăo kơ kâo amâo lŏ dôk hlăm klei mmăt ôh. Tơdah sa čô hmư̆ klei kâo blŭ leh anăn amâo djă pioh ôh, kâo amâo phat kđi ñu ôh; kyuadah kâo hriê amâo djŏ čiăng phat kđi lăn ala ôh, ƀiădah čiăng bi mtlaih lăn ala. Hlei pô hngah kơ kâo leh anăn amâo mă tŭ ôh klei kâo blŭ mâo leh sa čô pô phat kđi ñu; klei kâo blŭ leh srăng jing pô phat kđi ñu ti hruê knhal tuč êdei.” (Y-Yôhan 12: 46-48). Akâo kơ Aê Diê đru grăp čô drei ñĕ kơ knuih hdĭp phung ƀai, sa ai tiê êbat hlăm klei mngač doh jăk Aê Diê čiăng amâo tŭ klei bi kmhal hlăm hruê Khua Yang lŏ hriê.
Klei blŭ, bruă ngă drei bi êdah knuih hdĭp mơ̆ng sa čô đăo kơ Krist mơ̆?
Wah lač: Ơ Khua Yang, kâo bi mni lač jăk kơ Ih kyua djiê hrô klei soh kâo. Akâo kơ Ih đru kâo ñĕ kơ êlan ƀai, hdĭp tui hlue klei kpă ênô, klei khăp Khua Yang. Akâo kơ Yang Mngăt Jăk ƀuah mkra ya klei soh leh anăn đru kâo bi mlih čiăng hdĭp doh jăk grăp hruê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 144:1-15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
