Pajlug 17:7-11
Nqe cim:
“Kuv los ua qhov kaj rau neeg ntiajteb pom kev; txhua tus uas ntseeg kuv yuav tsis nyob hauv qhov tsaus ntuj lawm” (Yauhas 12:46).
Lus nug rau sawvdaws xav:
- Vajntxwv Xalumoos hais txog tus neeg phem tes haujlwm zoo licas?
- Tus neeg phem yuav raug dabtsi?
- Peb yuav tsum ua dabtsi thiaj txav deb kev phem thiab mus raws tus Tswv qhov kaj?
Vajntxwv Xalumoos hais txog tus neeg phem lubneej thiab lawv tes haujlwm, kom cov menyuam paub feebmeej txojkev ncaj kev tseeb thiab kev txhaum kev phem. Tim ib, vajntxwv siv lus thuam los hais txog tus neeg ruam tsis phim hais tej lus zaj lus zuag lossis tej lus zoo. Lawv hais tej lus khav, lus dag, yog tej lus uas tus neeg muaj koob muaj meej tsis lam hais, zoo ib yam li Yaxayas tau hais tias: “Yuav tsis muaj leejtwg xav hais tias neeg ruam yog neeg tsim txiaj lossis hais tias tus neeg siab nkhaus yog neeg ncaj ncees” (Yaxayas 32:5). Tim ob, tus neeg phem siv tej nyiaj xiab zoo li lub povhaum kom ua tau txhua yam. Yog tus thawjcoj txais tej nyiaj xiab, cov neeg phem yuav siv qhov no los ua kom muaj nqis rau lawv. Tim peb, tus neeg phem xav kom muaj kev sib ntxub, sib cais. Lawv pheej hais txog lwm tus tej kev txhaum kom luag sib ntxub sib cais, tsis yog ua kom sib hlub sib kho. Thaum kawg, tus neeg phem tsis txais yuav tej lus qhuab ntuas. Tus neeg txawjntse ris siab hlo thaum raug luag cem, tiamsis tus neeg phem tsis mloog, tsis hloov, tsis ris siab thiab rov mus ua phem dua. Lawv yuav raug txim, raug ntaus raug nplawm. Tej zaum kev rau txim ua tsis tau rau tus neeg phem hloov dua tshiab, tiamsis tsawg tshaj kuj tswj tau tej kev txhaum uas lawv ua, kom tsis ua rau lwm tus raug teebmeem ntxiv. Lo lus “tus tub ceevxwm uas tsis zam rau leejtwg” (nqe 11b) lossis lwm phau txhais hais tias “tus tub tshaj xo nyaum”, ua rau cov nyeem xav txog Pajlug 16:14 hais tias: “Vajntxwv kev npau taws mas yog tus tub tshaj xo kev ploj tuag” coj kev txiavtxim tuaj rau tus neeg phem, tiamsis tus muaj tswvyim yuav dim.
Tus ntseeg yuav tsum qhia tshwm Tus Cawmseej tus mojyam. Tus ntseeg yuav tsum hais tej lus tseeb, xyuamxim, txhua tes haujlwm yuav tsum ncajncees, tsis txais nyiaj xiab, tsis koom tes nrog cov neeg phem. Tus ntseeg lubneej tsis nrug deb txojkev hlub, vim tus Tswv yog txojkev hlub; peb yuav tsum qhia tshwm lubneej kev hlub kom lwm tus pom txog tus Tswv. Tus ntseeg lubneej yuav tsum tig mus rau kev dawbhuv, lees kev txhaum kom hloov dua tshiab. Tswv Yexus hais tias: “Kuv los ua qhov kaj rau neeg ntiajteb pom kev; txhua tus uas ntseeg kuv yuav tsis nyob hauv qhov tsaus ntuj lawm. Tus uas hnov kuv tej lus thiab tsis ua raws li kuv tej lus, kuv yuav tsis txiav txim rau tus ntawd. Kuv tsis yog los txiav txim rau neeg ntiajteb, tiamsis yog kuv los cawm neeg ntiajteb kom lawv dim lawv lub txim. Muaj ib tug yuav txiav txim rau tus uas tsis lees paub kuv thiab tsis mloog kuv tej lus qhia. Thaum txog hnub kawg, tej lus uas kuv qhia lawm yuav txiav txim rau tus ntawd.” (Yauhas 12:46-48). Thov tus Tswv pab kom peb qaij deb tus neeg phem lubneej, ua ib siab mus raws tus Tswv qhov kaj thaum tus Tswv rov los peb thiaj tsis raug txiavtxim.
Peb tej lus hais thiab tes haujlwm puas qhia tshwm hais tias peb yog tus ntseeg lawm tau?
Tus Tswv, thov ua Koj tsaug, vim Koj tau tuag txhiv nyuam yaus. Thov pab nyuam yaus qaij deb kev phem, ua neej raws Koj txojkev ncaj ncees thiab kev hlub. Thov Vaj Ntsujplig qhuab ntuas nyuam yaus paub kev txhaum thiab pab nyuam yaus pauv hloov lubneej txhua hnub. Amees.
Nyeem Vajluskub hauv peb lub xyoos: Phau Ntawv Nkauj 144
Kênh Youtube BHKTHN:
