Yelemis 36:1-10
Nqe cim:
“Koj mus muab ib thooj ntawv los sau tej uas kuv qhia rau koj txog cov Yixalayees, cov Yudas thiab txhua haivneeg. Cia li sau txhua yam uas kuv qhia rau koj, txij thaum Yauxiyas ua vajntxwv kav tebchaws Yudas los txog niaj hnub no. Thaum cov Yudas hnov hais tias kuv yuav ua kom lawv puastsuaj, tej zaum lawv yuav tseg tsis ua kev phem kev qias lawm. Kuv yuav zam lawv lub txim thiab tej kev phem kev qias uas lawv ua” (Yelemis 36:2-3).
Lus nug rau sawvdaws xav:
- Tus Tswv hais kom tus cev lus Yelemis ua yam dabtsi?
- Lub ntsiab thiab lub homphiaj uas tus Tswv hais kom sau thooj ntawv tseg yog dabtsi?
- Peb txais tau kev qhuab ntuas licas los ntawm zaj kawm hnub no?
Thaum vajntxwv Yehauyakees kav tau plaub xyoos, Tus Tswv hais rau tus cev lus Yelemis hais tias: “Koj mus muab ib thooj ntawv los sau tej uas kuv qhia rau koj txog cov Yixalayees, cov Yudas thiab txhua haivneeg. Cia li sau txhua yam uas kuv qhia rau koj, txij thaum Yauxiyas ua vajntxwv kav tebchaws Yudas los txog niaj hnub no” (nqe 2). Yelemis mloog thiab ua raws nraim li tus Tswv hais tamsim ntawd. Yelemis piav txhua yam uas tus Tswv tau qhia rau nws lawm rau Npalus uas yog Neliyas tus tub sau rau hauv ib thooj ntawv. Tiamsis vim Yelemis raug txwv tsis pub mus hauv lub Tuamtsev, yog li ntawd Npalus thiaj mus nyeem thooj ntawv ntawd rau tus Tswv haivneeg mloog ncaj hnub uas sawvdaws tuaj yoo mov hauv lub Tuamtsev thaum lub tebchaws muaj kev kub ntxhov (nqe 5-6); lub homphiaj yog ua kom cov uas mloog hnov thiab paub hais tias lawv tau ua txhaum lawm, tus Tswv hais tias “…tej zaum lawv yuav tseg tsis ua kev phem kev qias lawm. Kuv yuav zam lawv lub txim thiab tej kev phem kev qias uas lawv ua” (nqe 3b).
Sau txhua yam uas tus Tswv qhia rau Yelemis txij thaum Yauxiyas ua vajntxwv (xyoo 621 UT) los txog xyoo tim plaub Yehauyakees ua vajntxwv (xyoo 605 UT), muaj kwv lam li kaum tsib lub xyoo, ntawd tsis yog tes haujlwm yoojyim. Tiamsis thaum tus Tswv muab cob haujlwm, Nws kuj pub koobhmoov rau tus uas mloog Nws lus los ua kom tiav. Peb kuj paub hais tias, nyob tiam ntawd cov uas paub nyeem thiab paub sau ntawv muaj tsawg heev; yog li ntawd, thiaj cheemtsum cov neeg txaus siab hlo ua haujlwm tsis ntshai leejtwg zoo li Npalus, los ua tiav tus Tswv tes haujlwm. Tau tus Tswv siv li Npalus yog ib txoj koobhmoov zoo kawg nkaus. Niaj hnub nimno, leejtwg xav tau tus Tswv siv li Npalus? Peb yuav tsum npaj tus Tswv tej lus thiab kawm xyaum peevxwm, kom txog thaum tau tus Tswv siv, ces peb kuj npaj txhij ua txhua yam.
Thaum tus Tswv hais kom sau thooj ntawv no, peb pom txog Vajtswv txojkev hlub loj kawg nkaus rau Nws haivneeg. Tus Tswv tsis xav kom ib tug twg vim tsis hnov Nws tej lus ceebtoom raug tuag vim kev txhaum, tiamsis Nws xav kom txhua tus hnov Nws tej lus thiab tso kev txhaum tseg kom tau cawmdim. Niaj hnub nimno, tus Tswv kuj siv Nws Pawg Ntseeg thiab peb txhua tus tawm mus qhia Nws txojkev hlub rau cov uas tsis tau ntseeg. Peb yuav tsum siv sijhawm uas tus Tswv pub los tshajtawm Nws txojkev hlub rau coobleej ntau tug tau hnov.
Peb ua licas thaum tau txais tus Tswv txojkev hlub uas loj kawg nkaus lawm?
Tus Tswv uas muaj kev hlub! Nyuam yaus zoo siab rau qhov uas tau txais Koj txojkev hlub loj kawg nkaus, thov pab nyuam yaus mloog Koj tej lus thiab siv sijhawm Koj pub tshajtawm Koj txojkev hlub rau lwm tus. Amees.
Nyeem Vajluskub hauv peb lub xyoos: Phau Ntawv Nkauj 139
Kênh Youtube BHKTHN:
