Klei Aê Diê Blŭ: Hêbrơ 1:1
Êlan kliăng: “Lu blư̆ leh anăn hlăm lu êlan mdê mdê Aê Diê blŭ leh mphŭn dô kơ phung aê drei hŏng phung khua pô hưn êlâo” (Hêbrơ 1:1)
Klei êmuh ksiêm mĭn: Êlan Klei Aê Diê Blŭ anei lač si Aê Diê jing? Mơ̆ng mphŭn mâo klei Ñu bi êdah kơ anak mnuih leh anăn si klei Ñu bi êdah?
Hlăm hdruôm hră anei êngao kơ klei čih: “Hră čih kơ phung Hêbrơ”, drei amâo thâo ôh hlei pô čih, kơ hlei phung mă dlăng hră anăn êlâo hĭn, leh anăn hbĭl čih hră anăn. Wăt snăn dưn, drei ƀuh ñu yua boh blŭ “drei” , čiăng lač pô čih hră anei mâo klei thâo msĕ hŏng phung dlăng hră anăn hlăm atur klei thâo săng êlam kơ Aê Diê hlăm Klei Mguôp Hđăp bi êdah leh kơ phung Israel.
Hră čih kčưm dơ̆ng hŏng boh blŭ djŏ kơ hlăk hbĭl jing “mphŭn dô”. Amâo klă ôh “mphŭn dô” jing hbĭl, năng ai mơ̆ng “mphŭn dơ̆ng” msĕ si hdruôm hră Klei Mphŭn Dơ̆ng amâodah msĕ si hdruôm hră Klei Mrâo Mrang Jăk Y-Yôhan hưn mdah. Klei Aê Diê Blŭ brei ƀuh sa klei sĭt nik, amâo djŏ guôn tơl hlăk Aê Diê lač kơ Y-Abraham ti ƀuôn Čaran, bi êdah hŏng Y-Môis hlăm ƀur trơ̆ng hŏng pui hlăm kdrăn tač, hlăk brei klei bhiăn kơ phung Israel ti čư̆ Sinai, amâodah truh kơ hlăk Khua Yang Yêsu Krist hriê jing mnuih ôh, anak mnuih thâo kral Aê Diê. Ñu bi êdah leh dơ̆ng mơ̆ng mphŭn dô.
Klei hưn mdah kơ Aê Diê jing Pô blŭ lač mtô. Si ngă drei tuôm bi mĭn mơ̆ si srăng jing tơdah Aê Diê amâo lač ôh? Tơdah Aê Diê amâo bi êdah ôh Ñu pô, drei srăng wi wư hlăm knam klei mmăt tĭt, amâo thâo kral klei mngač klei hdĭp ôh, amâo ƀuh si klei mblang kơ klei hdĭp ôh. Tơdah amâo mâo klei bi êdah, phung mnuih drei amâo srăng thâo kral ôh Aê Diê kơ kluôm jih lăn adiê, Pô prŏng hĭn kơ djăp mta klei anak mnuih dưi bi mĭn.
Aê Diê bi êdah “lu blư̆ leh anăn hlăm lu êlan mdê mdê”. Ñu amâo jing sa čô yang sui sa blư̆ “găn bhiâo” ti lăn ala anei ôh. Ñu dôk mbĭt leh anăn kiă kriê klei hdĭp anak mnuih. Klei Aê Diê Blŭ hưn mdah Aê Diê bi êdah hlăm lu êlan mdê mdê, leh anăn phung ksiêm klei đăo bi mklin mguôp jih klei anăn hŏng dua klei pia, sa jing “klei bi êdah kluôm”, msĕ si čư̆ êa lăn dliê, găn hŏng klei bhiăn klei hdĭp (dlăng Klei Mmuñ Hđăp 19:1-4; Rôm 1:20); leh anăn dua jing “klei bi êdah mdê hĭn”, mâo lu êlan Aê Diê ruah čiăng bi êdah Ñu pô hŏng hdră êlan mdê mdê, hŏng Klei Aê Diê Blŭ, leh anăn êlan yuôm bhăn hĭn hŏng êlan Khua Yang Yêsu Krist.
Lŏ hdơr wĭt hlăk mphŭn hriê kơ Khua Yang, hŏng si hdră êlan Ñu bi êdah kơ drei? Leh anăn ktuê êlan tui hlue Khua Yang truh kơ ară anei, si ngă drei thâo kral mơ̆ Khua Yang ăt bi êdah Ñu pô grăp hruê, čiăng kơ drei bi knal sĭt klei bi mguôp hdĭp hŏng Khua Yang, amâo djŏ knŏng tui hlue klei đăo ôh?
Hruê anei, djăp mta klei anak mnuih čiăng thâo kral Khua Yang, Ñu bi êdah leh sơăi hlăm hdruôm hră Klei Aê Diê Blŭ. Snăn, si ngă grăp čô drei ƀuăn rơ̆ng dlăng, hriăm leh anăn ksiêm Klei Aê Diê Blŭ grăp hruê, čiăng thâo kral Khua Yang ƀrư̆ hruê lu hĭn êjai mơ̆?
Wah lač: Lač jăk kơ Khua Yang kyua bi êdah leh kơ kâo thâo kral Ih čiăng kơ kâo nao leh anăn kkuh mpŭ Pô Hrih Mjing kluôm jih lăn adiê. Akâo Khua Yang đru kâo thâo pioh mmông dlăng, hriăm leh anăn ksiêm Klei Aê Diê Blŭ grăp hruê leh anăn ƀrư̆ jing msĕ si Ih hĭn.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:49-88
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
