Henplais 1:1
Thaum ub muaj ntau zaus Vajtswv ua li ub li no qhia cov uas cev Vajtswv lus kom lawv qhia rau peb cov yawgkoob paub tej uas Vajtswv hais. (Henplais 1:1)
Lus nug rau sawvdaws xav:
- Nqe Vajluskub no hais txog Vajtswv licas?
- Vajtswv qhia txog Nws tus kheej rau tibneeg txij thaum twg los thiab qhia licas?
Phau Henplais yog “tsab ntawv sau xa rau cov neeg Henplais”, peb tsis paub meej tus sau yog leejtwg, tus txais yog leejtwg thiab tsab ntawv sau thaum twg los lawm. Tiamsis, thaum siv lo lus“peb”, tus sau tabtom saib nws thiab cov txais tsab ntawv puavleej muaj kev paub txog cov Yixalayees tus Vajtswv uas Phau Qub hais txog tib yam nkaus.
Phau ntawv qhib thawj los ntawm ib lo lus hais txog sijhawm, yog “thaum ub”. Tsis paub hais tias “thaum ub” yog hov ntev los lawm, tej zaum yog “thaum chivkeeb” li phau Chivkeeb lossis phau Yauhas tau hais txog. Vajluskub qhia pom ib qhov tseeb hais tias, tsis yog thaum Vajtswv hu Anplahas hauv Halas, lossis tshwmsim rau Mauxes pom hauv tsob ntoo nplaim hluavtaws, lossis thaum pub txoj kevcai rau Cov Yixalayees saum roob Xinais, lossis thaum Tus Cawmseej Yexus log yug uas neeg, ces tibneeg thiaj paub txog Vajtswv xwb. Tiamsis Nws twb qhia txog Nws tus kheej puag “thaum ub” los lawm.
Tus sau tsab ntawv hais txog Vajtswv zoo li tus ua li ub li no qhia txog Nws tus kheej. Peb puas xav txog hais tias, yog Vajtswv tsis qhib suab ces yuav zoo licas? Yog Vajtswv tsis qhia txog Nws tus kheej, peb tseem maub xuas dub hauv txojkev tsaus ntuj, tsis paub txog qhov kaj ntawm txojsia, tsis pom qabhau rau kev ua neej. Yog Vajtswv tsis qhia tshwm, ces tibneeg yuav tsis muaj cuabkav paub txog tus Tswv ntawm txhua yam, yog Tus loj dua txhua yam tibneeg xav txog.
Vajtswv qhia tshwm tus kheej“ntau zaus” thiab siv ntau yam los qhia. Nws tsis yog tus vajtswv uas nyob nyob “ya los” saib lub ntiajteb, tiamsis Nws nyob nrog thiab tswjkav tibneeg lubneej. Vajluskub hais txog ntau txoj haukev uas tus Tswv qhia tshwm tus kheej, thiab cov tub qhia Vajluskub muab hais sau zog ua ob yam. Tim ib, yog “qhia tshwm los ntawm txhua yam”, xws li dhau tej uas tibneeg qhov muag ntsia pom, lossis tej txojcai teeb tseg rau lub ntiajteb thiab lubneej (saib Phau Ntawv Nkauj 19:1-4; Loos 1:20); thiab tim ob, yog “qhia tshwm tshwjxeeb”, xws li dhau los ntawm tej txujci tseemceeb, phau Vajluskub, thiab siab tshajplaws yog los ntawm Tus Tswv Yexus.
Cia li nco txog ntu sijhawm uas peb nyuam qhuav los cuag tus Tswv, peb tau Nws qhia txog tus kheej licas? Thiab nyob hauv ncua kev raws tus Tswv qab txog tav no, peb puas xam pom hais tias tus Tswv yeej tseem qhia tshwm Nws tus kheej txhua hnub kom peb muaj kev sib txuas ciaj siab nrog Nws, tsis yog tsuas mus raws ib txojkev ntseeg xwb?
Niaj hnub nimno, txhua yam uas tibneeg xav paub txog Vajtswv puavleej tau Nws qhia nyob hauv phau Vajluskub lawm. Yog li ntawd, peb txhua tus puas tau coglus yuav nyeem, kawm thiab xav txog Vajluskub txhua hnub, kom yim hnub yim paub Nws lawm tau?
Vajtswv, ua tsaug uas Koj tau qhia txog Koj tus kheej, nyuam yaus thiaj paub los cuag thiab pehawm Koj. Thov pab nyuam yaus paub siv sijhawm los nyeem, kawm thiab xav txog Vajluskub txhua hnub, kom nyuam yaus paub Koj thiab yim hnub yim zoo thooj Koj. Amees.
Nyeem Vajluskub hauv peb lub xyoos: Phau Ntawv Nkauj 119:49-88
Kênh Youtube BHKTHN:
