Klei Aê Diê Blŭ: II Y-Timôthê 4:1-5
Êlan kliăng: “Mtô klei Aê Diê blŭ, brei ih gĭr thâodah mông găl amâodah amâo găl ôh, mblang bi klă, ƀuah, mđĭ ai, đăm kƀah ôh klei gĭr leh anăn klei mtô” (II Y-Timôthê 4:2).
Klei êmuh ksiêm mĭn: Ya klei khua ƀĭng kna Y-Pôl mtă êlâo kơ khua pô mtô Y-Timôthê brei răng? Si mta boh sĭt ñu hưn mdah? Si klei jing anăn hlăm ênuk drei ară anei dôk găn? Si klei brei drei wĭt ngă?
Khua ƀĭng kna Y-Pôl knang kơ klei myang Aê Diê čiăng mtă êlâo kơ khua pô mtô Y-Timôthê brei răng. Anei jing klei mtă mtăn yuôm snăk ƀiădah kjăp phĭt êdimi kyua bi êdah ti anăp “Pô srăng phat kđi phung hdĭp leh anăn phung djiê” (êlan 1). Ñu mtă mtăn kơ khua pô hưn êlâo Y-Timôthê gĭr ktưn mtô mblang Klei Aê Diê Blŭ thâodah mmông găl amâodah amâo găl ôh, leh anăn brei mâo ai tiê tŭ gĭr mblang bi klă, ƀuah, mđĭ ai phung dôk hmư̆. Gĭr mtô mblang amâo djŏ ôh knŏng jing klei mtă mtăn ƀiădah ăt jing klei Khua Yang Yêsu mtă lui brei kơ phung ƀĭng kna Ñu: “Nao bĕ tar ƀar lăn ala leh anăn mtô klei mrâo mrang jăk kơ jih jang mnuih” (Y-Markôs 16:15).
Khua ƀĭng kna Y-Pôl lŏ ktrâo brei kơ khua pô mtô Y-Timôthê ƀuh sa klei jing sĭt dôk găn msĕ si klei mtrŭt čiăng bi mđĭ ai ñu brei gĭr mtô mblang Klei Aê Diê Blŭ. Anăn jing klei arăng čiăng mđing hmư̆ klei sĭt nik srăng ƀrư̆ hrŏ hĭn, tơl truh sa ênuk diñu “amâo lŏ čiăng hmư̆ ôh” klei mtô sĭt leh anăn knŏng čiăng hmư̆ “klei mơak”. Arăng srăng tui duah klei diñu pô čiăng, hmư̆ tui si diñu pô khăp, amâo lŏ čiăng hmư̆ klei sĭt nik ôh (êlan 3-4). Kyua klei anăn, khua pô mtô Y-Timôthê ktang hĭn brei hnêč mtô mblang Klei Aê Diê Blŭ lu hĭn êjai hlăm si klei truh dưn.
Anei ăt jing klei truh hlăm ênuk drei dôk hdĭp ară anei mơh. Hŏng klei đĭ kyar hlăm bruă mđung mơĭt klei mrâo mrang (công nghê thông tin), arăng êlưih snăk ruah mă klei pô čiăng hmư̆. Snăn diñu khăp ruah “klei mơak”, “êđăp ai tiê” hĭn kơ čiăng hmư̆ klei sĭt nik. Boh sĭt, drei ƀuh klă anak mnuih ƀrư̆ hruê đuê̆ kbưi hĭn hŏng Klei Aê Diê Blŭ. Diñu bi mđuê̆ Klei Aê Diê Blŭ mơ̆ng sang hră, lui mmông wah lač. Diñu ruah klei nao dlăng phim, nao hmư̆ klei kdŏ mmuñ hĭn kơ čiăng nao hmư̆ klei mtô hưn Klei Mrâo Mrang Jăk. Amâo ƀiă ôh phung anak Aê Diê ăt khăp hmư̆ “klei mơak” hĭn kơ klei sĭt nik mơ̆ng Klei Aê Diê Blŭ. Ti krah klei lông dlăng anăn, pô mtô mblang Klei Mâo Mrang Jăk ktang hĭn brei knang kơ klei pap Khua Yang čiăng dưi gĭr, amâo lui wir, ƀiădah ăt “mtô Klei Aê Diê Blŭ, brei ih gĭr thâodah mmông găl amâodah amâo găl ôh”.
Khua ƀĭng kna Y-Pôl ăt lŏ mtă mtăn kơ khua pô hưn êlâo Y-Timôthê snei: “Ƀiădah bi kơ ih, brei ih jing djŏ hnơ̆ng hlăm jih jang mnơ̆ng, gĭr tŭ klei knap mñai, mă bruă sa čô hiu hưn klei mrâo mrang jăk, bi leh klă bruă ih” (êlan 5). Klei mtă mtăn anei pioh kơ jih jang phung anak ƀuôn sang Aê Diê, amâo knŏng kơ hjăn khua pô mtô amâdah phung hiu hưn klei đăo ôh. Mtô mblang Klei Mrâo Mrang Jăk jing klei mtă prŏng Khua Yang jao kơ grăp čô phung đăo. Brei drei jing djŏ hnơ̆ng hlăm jih jang mnơ̆ng, gĭr tŭ klei knap mñai čiăng dưi ngă bruă klei mtă anei leh anăn bi leh ênŭm bruă klam Khua Yang jao.
Si ngă drei dôk gĭr hiu hưn Klei Mrâo Mrang Jăk mơ̆?
Wah lač: Ơ Khua Yang, bi mni kơ Khua Yang kyua Klei Ih Blŭ mñă kơ kâo. Akâo Khua Yang đru kâo jhŏng leh anăn gĭr nanao hiu hưn Klei Mrâo Mrang Jăk thâodah mmông găl amâodah amâo găl ôh čiăng dưi bi mtlaih lu mnuih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 110:1-7; 111:1-10; 112:1-10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
