II.Kevcai 14:22-29
Nqe cim:
“coj mus rau ntawm qhov chaw uas tus Tswv uas yog nej tus Vajtswv xaiv tseg cia ua qhov chaw pehawm Nws; … Nej ua li no thiaj yog nej hwm tus Tswv uas yog nej tus Vajtswv mus ibtxhis” (nqe 23).
Lus nug rau sawvdaws xav:
– Muab ib feem kaum zoo licas thiab siv cov feem kaum ntawd mus licas?
– Vim licas tus Tswv haivneeg yuav tsum tau fij ib feem kaum?
– Peb cheemtsum muaj lub siab fij khoom nyiaj txiag zoo licas?
Muab ib feem kaum ntawm tej khoom yus muaj tsis yog ib tes haujlwm hnyav ua tsis taus tiamsis yog ib lub zoo sijhawm ib leeg qhia tawm rau ib leeg txojkev zoo siab hauv tej koob hmoov uas tus Tswv pub. Ib lub xyoos ib zaug, cov neeg Yixalayees nqa ib feem kaum ntawm tej qoobloo hauv lawv tej liaj teb uas yog yam zoo tshaj plaws tuaj rau hauv lub nroog Yeluxalees. Cov neeg uas nyob deb, lawv tau cai muab cov qoobloo ntawd muag ua nyiaj thiab nqa tuaj hauv lub Tuamtsev yuav tej khoom uas lawv cheemtsum noj haus zoo siab nrog lawv tsevneeg xws li nqaij, ncuav, cawv txiv hmab, roj txiv ntoo… Tom qab uas cov povthawj ua kevcai fij khoom rau tus Tswv tas, ib feem ntawm tej khoom rov muab los rau tsevneeg noj zoo siab ua ke tabmeeg tus Tswv uas yog Vajtswv lub xubntiag. Tshwjxeeb, peb xyoos twg muab ib feem kaum rau cov neeg Levis uas tsis muaj av ua lawv teej tug, cov neeg txawv tebchaws nrog lawv nyob, cov menyuam ntsuag thiab cov pojntsuam ib zaug. Kom lawv muaj noj muaj haus, txhua tus puavleej muaj feem koom hauv tus Tswv haivneeg thiab tsis muab ib tug twg tso tseg li (II.Kevcai 26:12).
Ib feem kaum yog yam khoom uas xub muab fij rau tus Tswv ua ntej hlo kom tau txais tej koob hmoov uas tus Tswv pub hauv lub neej, thiab tu lub siab kom paub hwm tus Tswv. Txuas ntxiv, ib feem kaum muab mus pab cov povthawj thaum lawv ua tus Tswv tes haujlwm hauv lub Tuamtsev. Thaum kawg, ib feem kaum siv ntsig txog tus Tswv haivneeg, uas yog pab cov neeg uas muaj kev cheemtsum. Yog li ntawd, muab ib feem kaum yog pehawm Vajtswv tus uas pub muaj txhua yam, thiab muab lub neej fij rau Nws, nco ntsoov hais tias tej khoom yus muaj tsis yog yus khwv tau.
Nyob rau tiam Vajluskub Tshiab, Vajtswv Txojlus tsis hais txog qhov uas muab ib feem kaum, tiamsis tus lw hais txog lub siab muab ib feem kaum yeej tsis hloov li. Fij khoom nyiaj txiag yog pib hauv lub siab uas tau txais kev zoo siab ntawm tus Tswv, hlub tshua txog cov tub ua Vajtswv haujlwm thiab tej neeg uas nyob ibncig yus. Ua neej muaj lub siab fij khoom nyiaj txiag yog tus uas paub hwm tus Tswv thiab muaj kev zoo siab nyob hauv Nws. Tus uas ntseeg Vajtswv tsis raug txoj kevcai quab yuam lawm, tiamsis ua lub neej pauj tej koob hmoov uas tus Tswv pub los ntawm qhov uas muab lossis fij yam zoo tshaj plaws rau tus Tswv, pab cov neeg ua Vajtswv tes haujlwm thiab cov neeg nyob puagncig yus. Ib feem kaum ntawm tej qoobloo yog lub zoo sijhawm muab yam uas yus tau txais ntawm tus Tswv uas ncaj ncees thiab zoo fij rov qab rau Nws. Thaum ua neej muaj lub siab zoo li no, ces yog tus ntseeg Vajtswv tabtom nqis tes ua neeg hwm Nws, thiab fij khoom nyiaj txiag yog qhov uas nws zoo siab pehawm Vajtswv.
Koj tabtom fij khoom nyiaj txiag rau tus Tswv zoo licas?
Thov Vajtswv,
Tus Tswv, thov Koj pab kom peb cov menyuam paub txaus siab thaum nyob hauv Koj, muaj lub siab hwm Koj thiab paub ua Koj tsaug los ntawm qhov uas muab tej khoom nyiaj txiag thiab lub neej fij rau Koj. Thov tus Tswv Koj siv nyuam yaus! Amees.
Nyeem Vajluskub hauv peb lub xyoo: Phau Ntawv Nkauj 73
Kênh Youtube BHKTHN:
