Klei Aê Diê Blŭ: Klei Mtô Mñă Klei Bhiăn 14:22-29
Êlan kliăng: “Leh anăn ti anăp Yêhôwa Aê Diê diih hlăm anôk Ñu srăng ruah čiăng dưm anăn Ñu dôk tinăn, …, čiăng kơ diih dưi hriăm huĭ mpŭ kơ Yêhôwa Aê Diê diih nanao” (Klei Mtô Mñă Klei Bhiăn 14:23).
Klei êmuh ksiêm mĭn: Si hdră klei myơr jia sa kdrêč hlăm pluh leh anăn si klei dưi yua ñu? Kyua ya ngă phung ƀuôn sang Aê Diê brei thâo myơr kdrêč pluh? Si ai tiê klei mĭn myơr brei drei mâo?
Jia sa kdrêč hlăm pluh mơ̆ng jih jang boh mâo lač tinei amâo djŏ ôh jing bruă jao ktrŏ ƀiădah jing mmông myun bi êdah ai tiê mơak hdơ̆ng găp hlăm klei jăk Aê Diê brei. Grăp thŭn sa blư̆, phung Israel srăng djă ba sa kdrêč hlăm pluh mơ̆ng jih jang boh mâo jăk hĭn mơ̆ng đang hma diñu truh kơ ƀuôn Yêrusalem. Bi kơ phung dôk anôk kbưi đei, diñu dưi čhĭ boh mâo sa kdrêč hlăm pluh bi mlih hŏng prăk leh anăn djă ba kơ Sang Yang blei ya mnơ̆ng diñu mhao čiăng ƀơ̆ng mnăm hơ̆k mơak mbĭt hŏng mnuih hlăm sang msĕ si čĭm, ƀêñ, kpiê, boh kroh… Leh phung khua ngă yang myơr mnơ̆ng myơr ngă yang kơ Khua Yang, sa kdrêč srăng jao pioh kơ mnuih hlăm sang huă ƀơ̆ng leh anăn hơ̆k mơak mbĭt ti anăp Yêhôwa Aê Diê. Boh nik, grăp tlâo thŭn sa blư̆, sa kdrêč hlăm pluh pioh hjăn kơ phung amâo mâo lăn bi mbha msĕ si phung Lêwi, phung tue dôk hdĭp ti krah diñu, phung hđeh êrĭt, mniê djiê ung dôk hdĭp hlăm ƀuôn sang. Diñu srăng hriê, ƀơ̆ng huă trei, grăp čô dôk hdĭp mbĭt hŏng phung ƀuôn sang Aê Diê mâo kdrêč sơăi leh anăn amâo mâo wơr bĭt hlei pô ôh (Klei Mtô Mñă Klei Bhiăn 26:12).
Jia sa kdrêč hlăm pluh jing mnơ̆ng myơr ngă yang êlâo hĭn kơ Aê Diê čiăng dưi dưn klei jăk jĭn mă tŭ mơ̆ng Aê Diê brei leh anăn bi knal klei sĭt suôr Ñu hlăm klei hdĭp, mbĭt hŏng klei anăn thâo răng kriê ai tiê huĭ mpŭ kơ Aê Diê hŏng klei sĭt klă. Tui tluôn anăn, sa kdrêč hlăm pluh yua pioh brei kơ phung khua ngă yang, đru diñu hlăm klei mă bruă kơ Aê Diê kluôm jih hruê mmông hlăm Sang Yang. Knhal tuč, sa kdrêč hlăm pluh bi mguôp phung ƀuôn sang Aê Diê hŏng êpul êya, leh anăn uêñ mĭn kơ phung kƀah dôk riêng gah pô. Kyuanăn klei myơr sa kdrêč hlăm pluh jing bruă ngă kkuh mpŭ čiăng mpŭ mni kơ Aê Diê jing Pô thiê brei jih jang mnơ̆ng, leh anăn čiăng dôk hdĭp thâo myơr, diñu čih kruak hlăm ai tiê ngăn drăp anei amâo djŏ kbiă hriê mơ̆ng klei ai ktang klei thâo diñu pô ôh.
Hlăm ênuk Klei Bi Mguôp Mrâo, Klei Aê Diê Blŭ amâo lač kơ bruă myơr sa kdrêč hlăm pluh ôh, ƀiădah hdră čuăn kơ ai tiê myơr ăt kăn mâo klei mlih rei. Klei myơr kbiă hriê mơ̆ng ai tiê hơ̆k mơak dưi dưn Khua Yang Pô, uêñ mĭn kơ phung mă bruă kơ Aê Diê leh anăn kơ êpul êya anôk Aê Diê dưm jŭm dar drei. Dôk hdĭp hŏng ai tiê klei mĭn myơr jing hdĭp hŏng ai tiê huĭ mpŭ kơ Aê Diê leh anăn hơ̆k mơak hlăm Ñu yơh. Mnuih đăo kơ Aê Diê amâo kă kơ̆ng ñu pô hŏng klei bhiăn ôh, ƀiădah klei hdĭp jing klei hdơr knga kơ bruă jăk Aê Diê ngă leh kơ klei hdĭp pô, čiăng myơr mnơ̆ng jăk hĭn kơ Aê Diê, kơ phung mă bruă kơ Aê Diê leh anăn kơ êpul êya hdĭp jŭm dar drei. Sa kdrêč hlăm pluh boh mnga mâo jing mmông myun čiăng myơr kơ Pô Sĭt Suôr leh anăn Pô Jăk ya mta mnơ̆ng Ñu brei leh kơ drei. Tơdah dôk hdĭp hŏng ai tiê klei mĭn msĕ snăn, mnuih đăo kơ Aê Diê dôk bi sĭt klei hdĭp huĭ mpŭ kơ Ñu, leh anăn klei myơr srăng jing bruă kkuh mpŭ hlăm klei hơ̆k mơak.
Ơ ƀĭng dôk hmư̆ khăp hơiêng, Si hdră klei drei dôk myơr kơ Khua Yang?
Wah lač: Ơ Khua Yang, akâo Ih đru hmei thâo hơ̆k mơak hlăm Ih, bi êdah sĭt klă ai tiê huĭ mpŭ leh anăn thâo hdơr knga hŏng klei myơr mnơ̆ng wăt klei hdĭp kâo kơ Ih. Akâo kơ Khua Yang mơak yua kâo!
Dlăng Klei Aê Diê Blŭ hlăm tlâo thŭn: Klei Mmuñ Hđăp 73:1-28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
