Daniyees 8:1-12
Nqe cim:
“Yog leejtwg muaj pobntseg, cia li mloog tej lus uas Vaj Ntsujplig qhia rau cov ntseeg!” (Tshwmsim 2:17a).
Lus nug rau sawvdaws xav:
– Zaj yogtoog hauv tshooj 8 zoo yuav luag thooj cov yogtoog hauv tshooj 2 thiab tshooj 7 licas?
– Vim licas tus Tswv siv ntau zaj yogtoog sib txawv los qhia Nws Txojlus tiamsis koom tib lub ntsiab lus?
– Tus Tswv tau siv ntau zaj los qhia kom koj paub yam dabtsi?
Hauv tshooj 2, Vajntxwv Nenpukajnexales pom ib zaj yogtoog hais txog ib tug mlom txawv txawv. Tau 50 xyoo tom qab no, Daniyees mam pom zaj yogtoog uas hais txog plaub tus tsiaj loj, uas yog plaub lub tebchaws sawv los kav ntiajteb (tshooj 7). Thiab tau ob xyoos tom qab ntawd, “thaum uas Npesaxas ua vajntxwv tau peb xyoos lawm, kuv rov ua dua ib zaj yogtoog uas yog zaj ob” (nqe 1) hais txog tus laug yaj thiab tus laug tshis. Vim licas zaj yogtoog no hais yuav luag thooj zaj yogtoog uas twb hais peb zaug ua ntej hauv lub sijhawm kwvlam li 50 xyoo ntawd?
Yog ib qhov uas zoo heev thaum tus neeg pom zaj yogtoog hauv tshooj 2 yog Vajntxwv Nenpukajnexales. Thiab kuj yog qhov zoo, tus vajntxwv no nco tsis tau thiab tsis totaub lub ntsiab zaj yogtoog. Qhov ntawd yog lub zoo sijhawm rau tus cevlus Daniyees nrhiav paub thiab txhais tau lub ntsiab zaj yogtoog. Tshooj 2 thiab tshooj 7 yog sau ua lus Alamais, raws li cov lus uas lub sijhawm ntawd tibneeg paub, yog li dhau qhov ntawd tagnrho lub tebchaws Npanpiloos puavleej tau txais txojlus uas tus Tswv hais no.
Lub caijnyoog tsib caug xyoo, ob tug neeg pom cov yogtoog sib txawv tiamsis koom tib txojlus qhia. Tsib caug xyoo ua ntej, thaum cov neeg Yudas raug ntes coj mus ua qhev, Vajtswv xav qhia rau cov Npanpiloos tus vajntxwv thiab cov pejxeem paub hais tias cov neeg Yixalayees tus Vajtswv thiaj yog tus Vajntxwv kav tej vajntxwv, yog tus uas tsa thiab txo tej vajntxwv. Dua li ntawd, tshooj 2 xaus thaum vajntxwv tsa Daniyees ua tus nom loj hauv nws lub tebchaws, qhov no puas yog ib qho kev txhawb zog rau cov neeg Yixalayees uas tabtom tas kev cia siab hais tias ntshai tus Tswv twb muab lawv tso tseg, paub hais tias Vajtswv tseem tabtom pab thiab tsis tso lawv tseg li?
Kwvlam li 50 xyoo tom qab no, thaum lub sijhawm cov lus cog tseg thaum ub yuav tiav (Yelemis 29:10-14), zaj yogtoog ntawd rov qab pom ob zaug ntxiv hauv lub sijhawm uas yog ob xyoo sib law liag ua ke (7:1 thiab 8:1). Lub sijhawm ntawd, cov neeg Yudas twb mus nyob tus tas hauv lub tebchaws Npanpiloos lawm, yoojyim ua rau lawv tsis nco txog tus Tswv tej lus cog tseg yuav tso lawv rov los, yoojyim ua rau lawv tso siab nyob hauv lub tebchaws ntawd. Rov qab pom dua zaj yogtoog lub ntsiab yog qhia rau tus Tswv haivneeg paub tias tsis txhob vamkhom lub tebchaws Npanpiloos, vim nws thiab cov tebchaws uas los tom qab nws yuav ua phem ua qias thiab puavleej yuav puastsuaj mus huvsi.
Tus Tswv ua zaj ua ntxeev hais los vim yog qhia, ceebtoom, txhawb zog kom peb muaj kev cia siab. Qhov ntawd yog thaum ib nqe Vajluskub pheej hais mus hais los ntau zaus, ua cov lus hais hauv peb lub siab thaum thov Vajtswv, lossis cov lus los ntawm tus ntseeg zoo. Peb cheemtsum ua tib zoo mloog tus Tswv tej lus.
Koj puas tau tus Tswv siv ntau yam ntau tsav los qhia rau koj thiab?
Thov Vajtswv,
Tus Tswv, ua Koj tsaug vim Koj lub suab yog lub suab mos muag, suab kev hlub, tiamsis tus neeg uas ua tib zoo tig pobntseg mloog ces yog lub suab muaj hwjchim kawg nkaus. Thov Koj pab kom nyuam yaus txawj mloog tej lus uas Koj hais. Amees.
Nyeem Vajluskub hauv peb lub xyoo: Phau Ntawv Nkauj 69.
Tshooj Youtube BHKTHN: https://www.youtube.com/c/bhkthn
