Klei Aê Diê Blŭ: Êphêsô 4:1-6
Êlan kliăng: “Hŏng klei kă êđăp ênang brei diih gĭr djă pioh klei Yang Mngăt Jăk bi mguôp jing sa.” (Êphêsô 4:3).
Klei êmuh ksiêm mĭn: Ya klei khua ƀĭng kna Y‑Pôl mtă mtăn kơ phung đăo? Ya mta phŭn ñu hưn mdah čiăng iêu mthưr klei jing sa? Ya klei tŭ dưn Phung Sang Aê Diê mâo tơdah hdĭp tui si klei bi mguôp jing sa hlăm Yang Mngăt Jăk?
Êlâo kơ răp čih đơ mta klei mtă mtăn kơ phung đăo ti ƀuôn Êphêsô, khua ƀĭng kna Y‑Pôl hưn klă ñu jing “sa čô mnă kyua Khua Yang”. Klei anei čiăng mñă kơ phung đăo hdơr wĭt kơ klei ñu hur har mă bruă leh anăn hiu mtô knŏng kyua Anăn Khua Yang leh anăn hmăng hmưi ƀuh klei jing sa hlăm Phung Sang Aê Diê (Êphêsô 3:13). Thiăm kơ klei anăn ñu lŏ mñă kơ grăp čô phung đăo brei “dôk dơ̆ng ƀơ̆ng huă năng hŏng klei Aê Diê iêu”. Anăn jing klei dưi jing anak Aê Diê, dưi jing phung ƀuôn sang pioh hjăn kơ Ñu (Êphêsô 2:19-22). Klei iêu anăn čoh čuăn kơ phung anak ƀuôn sang Aê Diê brei dôk hdĭp “hŏng jih klei luă gŭ, êdu êun, leh anăn klei gĭr, brei diih bi đru hdơ̆ng diih hŏng klei khăp” (êlan 2). Leh anăn ti knhal tuč “hŏng klei kă êđăp ênang brei diih gĭr djă pioh klei Yang Mngăt Jăk bi mguôp jing sa” (êlan 3).
Tui tluôn anăn, khua ƀĭng kna Y‑Pôl hưn mdah đơ mta phŭn yuôm bhăn êdimi kơ klei iêu bi mguôp jing sa ti krah phung anak ƀuôn sang Aê Diê. Ñu răp čih 8 boh hră “sa” tinei čiăng mñă phung đăo kơ mta dŏ drei jing mbĭt (êlan 4-5): “sa asei mlei” jing Phung Sang Aê Diê, leh anăn Khua Yang Yêsu jing boh kŏ, bi grăp čô phung đăo jing sa kdrêč hlăm asei mlei Ñu; “sa Yang Mngăt Jăk” jing Pô dôk hlăm klei hdĭp jih jang phung đăo; “sa klei čang hmăng” kơ klei Khua Yêsu lŏ trŭn hriê čiăng kơ drei dưi dưn kluôm dhuôm klei hdĭp hlŏng lar; “sa Khua Yang” jing Khua Yang Yêsu Pô Bi Mtlaih, jing Khua kơ klei hdĭp drei; “sa klei đăo” kơ klei Khua Yang Yêsu tŭ klei djiê leh anăn kbiă lŏ hdĭp; “sa klei ƀaptem” jing knăm doh jăk čiăng hưn klă klei drei đăo kơ Khua Yang; “sa Aê Diê” jing Pô khăp brei kơ drei klei bi mtlaih hŏng Khua Yang Yêsu; “sa Ama” jing Ama ti dlông adiê kơ jih jang phung đăo leh anăn Ñu dôk ti dlông hĭn, dôk ti krah leh anăn dôk hlăm jih jang mnuih (êlan 6).
Jih jang mta klei knŏng “sa” lač ti dlông anei hưn klă kơ jih jang phung anak ƀuôn sang Aê Diê brei jing sa, djă pioh klei bi mguôp hdơ̆ng găp hlăm klei khăp Khua Yang. Drei mâo knŏng sa mta phŭn čiăng kă bi đuôm, bi rŭ mdơ̆ng leh anăn bi đru hdơ̆ng găp, amâo mâo mta klei mkăn dưi bi kah phung amâodah bi roh ôh. Wăt tơdah phung anak ƀuôn sang Aê Diê dôk tar ƀar anôk, mdê klei blŭ, mdê klĭt kliêng, mdê djuê ana, mdê dhar kreh, ƀiădah jih jang mâo klei iêu leh dưi mŭt hlăm klei bi mguôp hŏng sa Ama ti dlông leh anăn dưi jing sa găp djuê. Brei jih jang djă pioh klei bi mguôp čiăng bi rŭ mdơ̆ng klei đăo hdơ̆ng găp leh anăn bi lar klei khăp Khua Yang kơ lu mnuih mkăn. Phung Sang Aê Diê čiăng snăk mâo klei bi mguôp hlăm ai tiê klei mĭn jing sa, čiăng kơ mơ̆ng anăn dưi lŏ iêu lu mnuih hriê hŏng Phung Sang Aê Diê leh anăn mŭt hlăm klei bi mguôp hŏng Aê Diê jing Ama drei.
Si ngă drei dôk hdĭp djŏ hŏng ai tiê klei mĭn bi mguôp jing sa hlăm Yang Mngăt Jăk leh mơ̆?
Wah lač: Ơ Ama hmei dôk hlăm adiê ơi, akâo Ih đru kâo leh anăn phung anak Ih hlăm Phung Sang Aê Diê jih ai tiê djă pioh nanao klei bi mguôp jing sa hlăm Sang Aê Diê leh anăn wăt hlăm ƀuôn sang anôk hmei dôk hdĭp.
Dlăng Klei Aê Diê Blŭ hlăm tlâo thŭn: Klei Mmuñ Hđăp 55:1-23; 56:1-13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
