Efexus 4:1-6
Nqe cim:
“Vajtswv tus Ntsujplig twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm. Yog li ntawd, nej tsis txhob cia ib yam dabtsi ua rau nej nyob tsis taus ua ke” (nqe 3).
Lus nug rau sawvdaws xav:
– Timthawj Paulus ntuas cov ntseeg yam dabtsi?
– Paulus hais tawm cov vimchiv twg nqua hu kom koom ua ib lub siab?
– Ua neej muaj kev sib raug zoo, kev koom siab hauv Vaj Ntsujplig, Pawg Ntseeg muaj nqis dabtsi?
Ua ntej sau tej lus ntuas cov ntseeg nyob hauv nroog Efexus, Timthawj Paulus hais tias nws yog “tus uas raug kaw rau hauv tsev lojcuj” vim ua Vajtswv haujlwm. Qhov no sau qhia kom cov ntseeg paub tias nws kub siab lug ua haujlwm thiab qhia Yexus zaj yog ua kom tus Tswv tau ntsejmuag thiab xav kom muaj kev koom ua ke nyob hauv Pawg Ntseeg (Efexus 3:13). Paulus hais txog txhua tus ntseeg ua“lub neej kom phim” qhov uas tau hu los txais txojsia, ntawd yog lub meejmom tau los ua Vajtswv cov menyuam, ua Vajtswv haivneeg (Efexus 2:19-22). Qhov kev tau hu no qhia kom Vajtswv haivneeg yuav tsum ua neej “txo hwjchim, ua siab dawb siab zoo thiab ua siab ntev. Nej ib tug yuav tsum pab ib tug, sawvdaws thiaj paub hais tias nej sib hlub tiag” (nqe 2). Thiab qhov kawg yog yuav tsum cia “Vajtswv tus Ntsujplig…ua rau nej sib raug zoo” (nqe 3).
Txuas ntxiv, Timthawj Paulus hais tawm cov vimchiv tseemceeb nqua hu kom Vajtswv haivneeg koom ua ke. Paulus hais txog 7 lo lus “ib lossis tib” yog qhia kom cov ntseeg paub txog qhov peb koom ua ke (nqe 4-5): “Ib lub cev” yog Pawg Ntseeg, thiab Tswv Yexus yog lub taubhau, txhua tus ntseeg yog cov tes taw hauv Nws lub cev; “tib tug Ntsujplig” yog tus uas nyob hauv cov ntseeg Yexus lub neej; “cia siab ib yam” rau qhov Tswv Yexus yuav rov qab los thiab pub txojsia ntev dhawv mus ibtxhis rau peb; “tib tug Tswv” uas yog Tswv Yexus, tus Tswv uas kav peb lub neej; “tib txojkev ntseeg” Tswv Yexus tuag thiab sawv rov qab los; “tib txoj kevcai raus dej” uas yog kevcai qhia tawm peb txojkev ntseeg tus Tswv; “tib tug Vajtswv” yog tus uas muaj kev hlub pub txojkev cawm dim hauv tus Tswv Yexus; yog sawvdaws Leej Txiv uas nyob saum ntuj, thiab nyob hauv peb txhua tus (nqe 6).
Cov lo lus “ib lossis tib” hais saum no qhia hais tias tagnrho Vajtswv haivneeg yuav tsum koom ua ke, ib leeg nrog ib leeg sib raug zoo hauv tus Tswv txojkev hlub. Peb tsuas muaj ib lub vimchiv xwb yog yuav tau sib koom, txhim kho thiab sib txhawb zog, tsis muaj ib qho vimchiv twg kom peb sib faib ua pab pawg lossis sib ntxub li. Txawm yog Vajtswv haivneeg yuav nyob rau txhua qhov chaw, hais lus tsis sib thooj, tawv daj, tawv dawb, tawv dub, haivneeg twg los xijpeem, txhua tus puavleej raug hu los koom tib Leej Txiv thiab nyob hauv tib tsevneeg xwb. Yog li ntawd txhua tus yuav tsum tuav kev sib raug zoo, txhim kho kev ntseeg thiab qhia tawm tus Tswv txojkev hlub mus rau ntau leej. Vajtswv Pawg Ntseeg cheemtsum muaj kev sib raug zoo los ntawm kev koom ua ke kom coj tau ntau leej los ntseeg ntxiv rau hauv Pawg Ntseeg thiab nrog tau Vajtswv tus uas yog peb Leej Txiv sib raug zoo.
Koj puas ua neej muaj txojkev sib raug zoo, sib koom siab hauv Vajtswv tus Ntsujplig lawm tau?
Thov Vajtswv,
Peb Leej Txiv uas nyob saum ntuj, thov Koj pab nyuam yaus thiab Koj cov menyuam hauv Pawg Ntseeg kom niaj hnub muaj kev sib raug zoo, koom ua ib lub siab nyob hauv Koj tsevneeg thiab qhov chaw uas nyuam yaus nyob. Amees.
Nyeem Vajluskub hauv peb lub xyoo: Phau Ntawv Nkauj 55:1-56:13
Tshooj Youtube BHKTHN: https://www.youtube.com/c/bhkthn
