Klei Aê Diê Blŭ: Y‑Mathiơ 9:32-34
Êlan kliăng: “Hlăk anăn pô êwiên srăng kdăt kdưt msĕ si hlô rang, leh anăn êlah mnuih kmlô srăng mmuñ hŏng klei hơ̆k. Kyuadah êa srăng bluh đoh hlăm dliê êhŏng, leh anăn srăng mâo hnoh êa hlăm kdrăn tač.” (Y‑Êsai 35:6).
Klei êmuh ksiêm mĭn: Si boh klei sa čô mnuih hlăk êjai arăng ba kơ Khua Yang? Ya klei Khua Yang Yêsu ngă leh kơ pô anei? Si klei phung riêng gah lač kơ klei anei? Drei dôk hdĭp msĕ hŏng hlei pô?
Leh Khua Yang Yêsu bi hlao kơ dua čô bum ală hlăm sa boh sang (êlan 28-31), Khua Yang leh anăn phung ƀĭng kna mrâo kbiă kơ tač snăn arăng ba kơ Ñu sa čô mnuih kmlô kyua yang jhat ngă. Drei dưi thâo ƀuh klei rŭng răng leh anăn ruă duam mnuih kmlô, kyua diñu ƀuh leh anăn thâo ƀiădah amâo dưi blŭ ôh ya klei pô bi mĭn kơ pô mkăn thâo săng. Mnuih kmlô anei mdê hjăn hĭn kyua yang jhat ngăm jing pô kmlô hlăm klei myang mơ̆ng klei mmăt kă. Sĭt sa čô mnuih yang jhat kiă kriê snăn wăt asei mlei leh anăn mngăt ai tiê pô anăn ruă ênguôt jih hnơ̆ng Khua Yang Yêsu ƀuh mnuih kmlô yang jhat ngă ruă ênguôt luč klei čang hmăng anăn ñu suôt yang jhat leh anăn ba klei êngiê kơ pô anei.
Boh blŭ “Tơdah Yêsu suôt leh yang jhat anăn, mnuih kmlô thâo blŭ” hlăm êlan 33 lač kơ klei êngiê kluôm dhuôm Khua Yang Yêsu ba kơ pô anei, ară anei ñu dưi hmư̆, blŭ msĕ hŏng pô mkăn, amâo lŏ dôk hlăm klei yang jhat kiă kriê ôh. Khua Yang Yêsu knŏng ba klei êngiê kơ asei mlei ƀiădah truh hlăm lam ai tiê pô anei ăt dưi êngiê mơh, mbĭt anăn mâo klei găl dưi thâo kral Khua Yang hlăm klei myang Ñu ngă leh kơ pô.
Leh Khua Yang suôt yang jhat leh anăn bi hlao kơ pô yang jhat ngă kmlô anei, drei ƀuh mâo dua knuih bi êdah mơ̆ng dua êpul mnuih: Êpul tal sa jing phung ba mnuih kmlô anei kơ Khua Yang Yêsu; diñu bi kngăr leh anăn lač anei jing bruă yuôm bhăn ka tuôm ƀuh ôh hlăm Israel kyua 400 thŭn Aê Diê dôk kriêp ñăt hŏng phung ƀuôn sang Ñu, amâo mâo sa čô khua pô hưn êlâo mâo klei bi êdah ôh, amâo mâo ya klei bi knăl mdê hjăn dưi hưn ôh, amâo mâo sa klei myang dưi hlue ngă ôh. Ară anei diñu lač Khua Yang Yêsu jing Pô hriê mơ̆ng Aê Diê kơh dưi ngă bruă yuôm bhăn msĕ snăn. Êpul tal dua jing phung Pharisi, diñu mâo knuih amâo đaŏ ôh leh anăn blŭ mgao leh lač Khua Yang yua klei myang yang jhat čiăng kơ phung yang jhat mkăn huĭ, klei mĭn diñu jing hngah kơ klei Khua Yang Yêsu hruê mơ̆ng Aê Diê.
Hlăm klei hdĭp hruê anei, mâo lu mnuih ăt dôk mâo arăng kă hlue si hdră mdê mdê, drei mđing dlăng kơ digơ̆ mơ̆, ba digơ̆ nao kơ Khua Yang Yêsu mơ̆? Wăt tơdah riêng gah drei ăt adôk mâo lu mnuih bi kdơ̆ng, amâo đaŏ leh anăn blŭ mgao, ƀiădah sĭt drei mđing dlăng kơ bruă ba digơ̆ nao kơ Khua Yang srăng ƀrư̆ thâo hĭn dŭm klei yuôm bhăn Khua Yang ngă.
Drei mđing kơ bruă ba pô mkăn nao kơ Aê Diê mơ̆?
Wah lač: Ơ Khua Yang, akâo kơ Ih đru kâo mđing dlăng kơ phung dôk hlăm klei dleh dlan, luč klei čang hmăng čiăng ba diñu nao kơ Aê Diê, akâo kơ Ih ba kâo kbiă mơ̆ng klei ngă ngơi mang leh anăn amâo đaŏ čiăng kâo amâo ngă soh ôh hŏng Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 8:13-9:18
Kênh Youtube BHKTHN:
