Klei Aê Diê Blŭ: Y‑Yêrêmi 31:3-6.
Êlan kliăng: “Kâo hơ̆k mơak tơdah arăng lač kơ kâo,“Nao bĕ drei kơ sang Yêhôwa” (Klei Mmuñ Hđăp 122:1).
Klei êmuh ksiêm mĭn: Ya klei phung ƀuôn sang Israel hơ̆k mơak? Ya klei čiăng kơ klei bi hmô pô pla boh kriăk ƀâo dưi pĕ boh kriăk ƀâo? Si bruă klam “phung gak răng” hlăm êlan 6 hlăm klei kkuh mpŭ kơ Aê Diê? Si drei ngă čiăng mâo klei Aê Diê ƀuăn lŏ bi mrâo čiăng hơ̆k mơak nanao hlăm klei kkuh mpŭ?
Yêhôwa lač hŏng phung ƀuôn sang Ñu sĭt Ñu lŏ mkŏ mjing phung ƀuôn sang Ñu snăn digơ̆ srăng dưi lŏ bi mrâo leh anăn srăng lŏ wĭt mơak mñai. Êlâo hĭn, diñu mâo klei hơ̆k mơak kyua lŏ mâo Yêhôwa hơêč hmưi, bi êdah hlăm bruă diñu srăng lŏ pla đang boh kriăk ƀâo leh anăn phung pla srăng dưi pĕ boh kriăk ƀâo (êlan 5). Leh anăn, diñu srăng lŏ dơ̆ng dưi kkuh mpŭ kơ Aê Diê, mjưh mdei hruê mlan ênguôt hnĭng, hdơr kơ Sang Yang Yêrusalem arăng mă jing mnă ti ala čar arăng, mjưh ruê̆ klei yuôl brô̆ amâo lŏ hơ̆k mơak čiăng mmuiñ bi mni kơ Aê Diê kyua klei ênguôt hnĭng prŏng (Klei Mmuñ Hđăp137:1-4). Leh anăn ăt mơ̆ng mông anăn Aê Diê lŏ mjing mrâo diñu, snăn phung “gak răng” srăng lŏ wĭt ngă bruă pô hlăm bruă mñă kơ phung ƀuôn sang Aê Diê hdơr kơ dŭm knăm yuôm bhăn čiăng kơ diñu nao ti Sang Yang Yêrusalem kkuh mpŭ kơ Aê Diê.
Phung hlăm lăn ala lač pô pla boh kriăk ƀâo yơh dưi pĕ boh kriăk ƀâo pô pla, ƀiădah hlăm klei sĭt mâo yan hrui pĕ lŏ mâo lu mta mkăn hgao klei anak mnuih dưi kiă kriê. Hŏng phung ƀuôn sang Aê Diê snăn anei jing sa hlăm dŭm klei tŭ dưn mơ̆ng klei hdĭp mâo Aê Diê hơêč hmưi. Mơ̆ng mphŭn tal êlâo mơ̆ng phung ƀuôn sang Israel leh mŭt hlăm Lăn Aê Diê ƀuăn, Yêhôwa brei diñu thâo tơdah Ñu amâo hơêč hmưi kyua diñu amâo hlue ngă kluôm ênŭm klei bhiăn Aê Diê mtrŭn snăn diñu srăng tŭ klei tăm pah, anăn jing mdơ̆ng sang ƀiădah amâo dưi dôk, pla boh kriăk ƀâo ƀiădah amâo dưi dưn ôh klei tŭ mơ̆ng ai tiê pô mă bruă…(Klei Mtô Mñă Klei Bhiăn 28:15-37). Klei Yêhôwa ƀuăn brei ƀuh klei Aê Diê ngêñ kbiă đuê̆ leh mơ̆ng djuê ana diñu leh anăn diñu lŏ mâo klei Aê Diê hơêč hmưi. Anei jing klei mơak prŏng prĭn mơ̆ng jih jang phung ƀuôn sang Aê Diê, amâo djŏ knŏng jing klei tŭ mơ̆ng hdră buh pla đuč ôh. Sĭt phung ƀuôn sang Aê Diê dôk hlăm klei Aê Diê bi kmhal, phung “gak răng” ti kđông gak răng ngă bruă hưn hlăm klei rŭng răng kyua phung roh srăng ksŭng ngă amâo thâo êlâo ôh, ƀiădah ară anei “phung gak răng” hơĭt ai tiê kƀĭn ngă bruă mñă kơ grăp čô mnuih brei kgŭ kkuh mpŭ kơ Aê Diê.
Ya hruê drei dôk rŭng răng hŏng klei hdĭp soh jhat, snăn klă sĭt drei amâo dưi thâo ôh klei mơak hlăm klei kkuh mpŭ leh anăn klei jăk Aê Diê brei. Brei drei akâo kơ Aê Diê mjing hlăm drei sa ai tiê doh jăk čiăng grăp čô drei dưi bi mrâo leh anăn jăk mơak hlăm klei kkuh mpŭ kơ Aê Diê.
Drei ƀuh klei jăk mơak doh êbeh dlai mơ̆ sĭt dưi bi mrâo leh anăn kkuh mpŭ kơ Aê Diê?
Wah lač: Ơ Khua Yang! Klei bi mrâo mơ̆ng Ih ba kơ phung ƀuôn sang Ih klei jăk mơak êbeh dlai hlăm klei hdĭp leh anăn wăt hlăm klei kkuh mpŭ kơ Aê Diê, akâo Ih đru kâo jăk mơak sĭt dưi kkuh mpŭ kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 26:11 – 28:8
Kênh Youtube BHKTHN:
