Klei Aê Diê Blŭ: Y‑Luk 2:13-14.
Êlan kliăng: “Klei guh kơang kơ Aê Diê hlăm anôk ti dlông hĭn, leh anăn klei êđăp ênang ti lăn ala kơ phung mnuih bi mơak kơ Ñu.” (Y‑Luk 2:14).
Klei êmuh ksiêm mĭn: Hlei pô mmuñ bi mni kơ Aê Diê klei mmuñ anei? Ya boh phŭn klei mmuñ bi mni anei? Ya klei amâodah ya klei soh dôk ngă kơ drei amâo êđăp ênang? Si diih leh anăn Sang Aê Diê pô dôk mmuñ bi mni kơ Aê Diê?
Leh hưn kơ phung mgăt biăp kơ bruă arăng kkiêng leh Pô Bi Mtlaih Lăn Ala êpul mmuñ phung dĭng buăl jăk hưn mdah klei hơ̆k mơak hŏng klei mmuñ sa klei mmuñ hơêč hmưi kơ Aê Diê. Klei mmuñ anei jing klei mđĭ ai kơ phung čih mkra klei mmuñ bi mni kơ Aê Diê êbeh dua êbâo thŭn anei. Anei jing klei mmuñ mâo grăp gưl ênuk khăp, grăp hdră bi hdơr hruê Khua Yang Yêsu hriê drei hmư̆ nanao ênhiang mmuñ klei mmuñ anei.
Boh phŭn klei mmuñ anei jing bi êdah dua mta kơ Khua Yang Yêsu Pô Bi Mtlaih. Tal sa, Khua Yang Yêsu trŭn hriê ba klei êđăp ênang sĭt. Drei “êđăp ênang” kyua dưi dôk hlăm klei Aê Diê kiă kriê (Y‑Êsai 9:5); drei mâo “klei êđăp ênang” ti anăp klei bi kmhal mơ̆ng klei soh kyua Khua Yang Yêsu hriê leh čiăng klam brei klei soh jih jang anak mnuih (I Y‑Timôthê 1:15); drei mâo klei “êđăp ênang” kyua dưi bi mrâo klei bi mguôp Ama anak hŏng Aê Diê (Y‑Yôhan 1:12). Tal dua, Khua Yang Yêsu trŭn hriê ba “klei êđăp ênang ti lăn ala”. “Klei êđăp ênang” jing klei pap amâodah klei jăk, hlăm Khua Yang Yêsu djăp mta? klei jăk yuôm bhăn mơ̆ng Aê Diê jing klei dưi brei kơ anak mnuih (Rôma 8:32), leh anăn grăp čô mnuih dưi thâo ƀuh klei jăk mơ̆ng adiê leh tŭ mă Khua Yang Yêsu jing Pô Bi Mtlaih kơ klei hdĭp pô.
Hruê anei, năng ai drei ăt dôk mmuñ klei mmuñ anei hlăm knăm bi hdơr hruê Khua Yang Yêsu trŭn hriê ƀiădah ai tiê drei ăt ka klă sĭt dưi mâo ôh klei êđăp ênang, năng ai drei knŏng jing mnuih tui hlue sa klei đaŏ amâo djŏ klă sĭt mă tŭ Khua Yang Yêsu jing Pô Bi Mtlaih kơ klei hdĭp pô. Brei drei msir mgaih jih klei soh adôk mâo hlăm klei hdĭp pô kyua dŭm klei soh anăn ngă kơ drei bi kbưi hŏng Aê Diê (Y‑Êsai 59:2) ngă kơ Khua Yang amâo dưi hmư̆ leh anăn amâo dưi brei ôh klei hơêč hmưi kơ drei. Khua Yang Yêsu trŭn hriê leh, Ñu ba klei êđăp ênang hŏng klei hơêč hmưi yuôm bhăn kơ jih jang mnuih. Drei jing phung đaŏ leh kơ Aê Diê, brei drei mmuñ bi mni kơ klei êđăp ênang ti krah sa lăn ala bŏ hŏng rŭng răng, brei drei kah mbha klei pap Khua Yang Yêsu kơ lu mnuih dưi thâo hlăm yan Khua Yang Yêsu trŭn hriê thŭn anei, kyua Khua Yang Yêsu jing “Khua kơ Klei Êđăp Ênang” msĕ si hlăm hdruôm hră Y‑Êsai 9:6 čih leh: “Kyuadah kkiêng leh kơ drei sa čô anak, brei leh kơ drei sa čô anak êkei; leh anăn ñu srăng klam klei kiă kriê ti mra ñu. Leh anăn arăng srăng pia anăn ñu, Pô Yuôm Bhăn, Khua Kčĕ, Aê Diê Myang, Ama Dôk Hdĭp Hlŏng Lar, Khua kơ Klei Êđăp Ênang.”
Ƀăng êgei drei dôk hrăm mbĭt mmuñ klei mmuñ bi mni kơ klei êđăp ênang mơ̆?
Wah lač: Ơ Khua Yang Yêsu jing Khua kơ Klei Êđăp Ênang, kâo bi mni lač jăk kơ Ih trŭn hriê leh ba klei êđăp ênang sĭt leh anăn klei jăk mơak kơ kâo pô, akâo kơ Ih brei kâo dôk hlăm Ih čiăng thâo klei pap brei klei soh leh anăn klei jăk mơak yuôm bhăn Aê Diê brei. Akâo kơ Ih đru kâo dưi hưn Aê Diê kơ pô mkăn hlăm yan Noel thŭn anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 21
Kênh Youtube BHKTHN:
