Klei Aê Diê Blŭ: Klei Mtô Mñă Klei Bhiăn 11:18-25
Êlan kliăng: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn.” (Klei Bi Hriêng 22:6).
Klei êmuh ksiêm mĭn: Y‑Môis iêô mthưr phung ƀuôn sang Aê Diê brei mâo hĕ si knhuah hdĭp leh anăn bruă ngă djŏ sĭt hŏng klei Aê Diê mtô kơ diñu? Ya mta klei Aê Diê ƀuăn brei kơ phung ƀuôn sang Ñu? Si drei dôk mtô bi hriăm klei đăo kơ phung anak čô drei?
Hlăm trăn Klei Aê Diê blŭ anei, Y‑Môis ktrâo atăt kơ phung ƀuôn sang klă klơ̆ng grăp knhuang mta klei brei diñu ngă. Êlâo hĭn, grăp čô ƀuôn sang Israel brei djă pioh kjăp mră Klei Aê Diê Blŭ hlăm ai tiê. Êdei tinăn brei mtô lač Klei Aê Diê Blŭ kơ phung anak diñu pô. Brei mtô lač Klei Aê Diê Blŭ djăp mmông djăp anôk, êjai dôk gŭ hlăm sang amâodah êjai êbat ti êlan, êjai dôk đih amâodah kgŭ (êlan 19). Ti knhal tuč, brei phung ƀuôn sang Aê Diê čih Klei Aê Diê Blŭ ti msơ̆ng ƀăng bhă sang leh anăn ti ƀăng jang ƀuôn (êlan 20) msĕ si klei hưn mdah klei đăo diñu kơ phung găp djuê riêng gah leh anăn kơ phung tue.
Anăn jing dŭm mta klei čiăng sĭt, brei phung ƀuôn sang Israel ngă hlue hlăk diñu mŭt dôk hlăm čar Kanaan. Bi tĭng kơ Aê Diê, Ñu srăng đru diñu lŏ pŏk phai knông lăn, dơ̆ng mơ̆ng kdrăn tač hlŏng truh kơ čar Liƀan, mơ̆ng êa krông Ơprat truh kơ êa ksĭ yŭ (êlan 24). Mta klei yuôm hĭn jing Aê Diê brei diñu dưi jing sa găp djuê jhŏng ktang tơl amâo mâo ôh pô jhŏng bi kdơ̆ng hŏng diñu. Klei jhŏng ktang phung ƀuôn sang Israel amâo djŏ dôk hlăm klei ktang phung lĭng kahan amâodah klei mdrŏng sah ôh, ƀiădah klei yuôm jing mâo Yêhôwa Aê Diê, mâo Khua Yang kơ jih jang yang dôk mbĭt, msĕ si Klei Aê Diê Blŭ mtô leh: “Jăk mơak yơh găp djuê mâo Yêhôwa jing Aê Diê diñu, jăk mơak yơh phung ƀuôn sang Ñu ruah leh jing ngăn dưn Ñu pô” (Klei Mmuñ Hđăp 33:12). Phung găp djuê riêng gah srăng ƀuh knhuah dôk hdĭp huĭ mpŭ kơ Aê Diê leh anăn klei jhŏng ktang phung ƀuôn sang Israel snăn thâo kral Aê Diê klei myang.
Tlâo mta klei Aê Diê mtô kơ phung ƀuôn sang Ñu, thâo săng leh anăn djă pioh Klei Aê Diê Blŭ, mtô lač Klei Aê Diê Blŭ kơ phung anak čô leh anăn ktrâo atăt anak čô dôk hdĭp bi guh kơang kơ Anăn Aê Diê hlăm ƀuôn sang. Anăn jing jar klei bi hmô jăk snăk kơ grăp čô, kơ grăp gŏ sang leh anăn kơ grăp Phung Sang Aê Diê mă yua kơ pô. Lu mnuih hlăm phung drei dluh lĕ hlăm klei mtô bi hriăm klei đăo kơ phung anak čô kyuadah knŏng ngă jăk sa mta klei đuč hlăm tlâo mta klei, hrô kơ klei ngă bi knar msĕ jih tlâo mta klei anăn. Čiăng dưi dôk hdĭp djŏ hŏng Klei Aê Diê Blŭ, êlâo hĭn brei aê aduôn amĭ ama dlăng, hriăm Klei Aê Diê Blŭ čiăng kơ drei pô thâo săng leh anăn djă pioh klei Aê Diê mtô mtă. Lu mnuih amâo dưi mtô Klei Aê Diê Blŭ kơ anak čô pô ôh, kyuadah diñu pô ăt ka thâo săng klă Klei Aê Diê Blŭ mơh. Mâo hdruôm hră Klei Aê Diê Blŭ hlăm kngan ƀiădah ka tuôm dlăng jih sa blư̆ ôh. Đa mâo mơh gŏ sang mâo klei hdĭp klei đăo jăk ƀiădah knŏng bi êdah ti Sang Aê Diê, bi wĭt kơ sang pô hdĭp hrui hriêt amâo bi mguôp êrô êbat hŏng phung găp djuê hŏng phung riêng gah ôh. Aê Diê jao bruă klam bi mtô bi hriăm klei đăo kơ phung anak čô, jing bruă klam yuôm snăk kơ grăp čô drei, đăm dlăng hơăi mang ôh.
Si ngă drei mđing uêñ mơ̆ klei mtô bi hriăm klei đăo kơ anak čô drei?
Wah lač: Ơ Khua Yang, kâo hmăng hmưi kơ phung anak čô kâo thâo kral Khua Yang, mpŭ mni kơ Anăn Ih hlăm klei hdĭp. Akâo kơ Ih brei kâo dưi ngă bi sĭt klei hmăng hmưi anei, kčưm dơ̆ng mơ̆ng kâo pô leh anăn gŏ sang kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 8:27-43
Kênh Youtube BHKTHN:
