Klei Aê Diê Blŭ: Y‑Đaniel 3:13-18
Êlan kliăng: “Tơdah ih hwiê hmei hlăm kpur pui Ơ mtao, Aê Diê pô hmei mă bruă anăn dưi bi mtlaih hmei mơ̆ng kpur pui, leh anăn Ñu yơh srăng bi mtlaih hmei mơ̆ng kngan ih. Ƀiădah tơdah Ñu amâo bi mtlaih hmei dưn, Ơ mtao, brei ih thâo hmei amâo srăng mpŭ kơ phung yang ih ôh, kăn kkuh mpŭ rei kơ rup tuh hŏng mah ih mdơ̆ng leh.” (Y‑Đaniel 3:17-18).
Klei êmuh ksiêm mĭn: Si klei mtao Y‑Nebukatnetsar wĭt ngă tơdah tlâo čô Hêbrơ amâo buôn kkuh ôh kơ rup tuh ñu mdơ̆ng? Si klei tlâo čô Hêbrơ lŏ wĭt lač? Klei diñu ngă anăn si brei ƀuh klei bi knăl klei đăo diñu kơ Aê Diê? Ya êlan kliăng đru drei đăo knang kluôm dhuôm kơ Aê Diê?
Mơ̆ng kdrêč 1, drei ƀuh leh phung êkei dam Hêbrơ amâo tuôm mdei ôh tlă anăp hŏng klei lông dlăng djiê hdĭp. Hlăm trăn Klei Aê Diê Blŭ hruê anei, lŏ sa blư̆, diñu lŏ dôk dơ̆ng ti anăp klei kpĭ mơ̆ng sa čô mtao amâo djŏ hnơ̆ng leh anăn khit khuăt. Ñu ngêñ bi êdah kơ digơ̆ dua mta klei brei ruah: Buôn kkuh kơ rup tuh ñu mdơ̆ng amâodah arăng srăng hwiê hlăm kpur pui (êlan 13,15). Bi klăk hŏng knuih luč klei dưi ksiêm pô mơ̆ng sa čô mtao dôk lông dlăng Aê Diê snei “hlei yang dưi bi mtlaih diih mơ̆ng kngan kâo?” (êlan 15), tlâo čô khua mnuih Hêbrơ lŏ wĭt lač kơ mtao hŏng klei ênang ƀiădah kjăp mră “Aê Diê hmei… dưi” . Diñu đăo sĭt nik Aê Diê diñu kkuh mpŭ amâo jing awăt hĭn kơ mtao ôh. Aê Diê mâo jih klei dưi ti anăp klei ktang sa čô mtao dôk jing khua kơ lu lăn čar. Diñu đăo kluôm dhuôm kơ klei sĭt nik: “Kyuadah amâo mâo sa mta mnơ̆ng Aê Diê amâo dưi ngă ôh” (Y‑Luk 1:37). Kyuadah hŏng klei khut khat đăo kơ Aê Diê Pô mâo jih klei dưi, snăn diñu amâo mjưh tăp mơ̆ng klei đăo kơ Aê Diê dưi bi mtlaih diñu mơ̆ng kngan mtao ôh. Diñu ăt lŏ lač “Ƀiădah tơdah Ñu amâo bi mtlaih hmei dưn, Ơ mtao, brei ih thâo hmei amâo srăng mpŭ kơ phung yang ih ôh…” (êlan 18).
Hŏng klei diñu khut khat đăo kơ klei myang Aê Diê yơh, diñu kkuh mpŭ kơ Aê Diê jing Khua kơ diñu. Kyuanăn diñu amâo mgô̆ Aê Diê mgaih mkra klei truh diñu dôk găn ôh, ƀiădah jao jih kluôm dhuôm tui si klei Aê Diê čiăng. Aê Diê dưi ngă jih ƀiădah tơdah Aê Diê amâo ruah ngă ôh klei Ñu dưi ngă, diñu ăt kăn bi luč klei diñu đăo kơ knuih “dưi ngă jih” Aê Diê.
Jing sa čô đăo kơ Aê Diê, tăp năng drei adôk djă pioh klei đăo amâo djŏ hŏng Klei Aê Diê Blŭ ôh, mĭndah dôk hdĭp huĭ mpŭ kơ Aê Diê drei amâo srăng tuôm hŏng klei knap mñai, dleh dlan ôh. Kyuanăn, hlăk pui klei lông dlăng truh, klei đăo drei pui ƀơ̆ng hĕ jih mliêt yơh. Drei hdơr klei yăl dliê Aê Diê bi mtlaih tlâo čô mah jiăng Hêbrơ kbiă mơ̆ng kpur pui, Y‑Đaniel tlaih mơ̆ng ƀăng êmông gu,… ƀiădah wơr bĭt hĕ kơ phung ƀĭng kna êdei anăn leh anăn lu snăk phung đăo djiê leh kyua klei đăo ktuê jih ênuk klei yăl dliê kơ Phung Sang Aê Diê. Drei dlăng hdruôm hră Klei Bi Hriêng bi ktlah hĕ hŏng hdruôm hră Y‑Yôp, kyuanăn drei wơr bĭt hĕ klei yăl dliê kơ sa čô mnuih Aê Diê iêô kơ ñu mnuih kpă ênô msĕ si Y‑Yôp ăt tuôm hŏng klei knap mñai kjham kjhuê̆ snăk. Thâo săng kơ klei anăn, khua ƀĭng kna Y‑Pêtrôs mtă mtăn kơ drei: “Tơdah diih dôk ti krah pui klei lông dlăng, đăm bi kngăr ôh msĕ si sa klei mdê truh kơ diih” (I Y‑Pêtrôs 4:12). Đăo kjăp bĕ kơ Aê Diê mâo jih klei dưi, brei nanao kơ drei klei jăk hĭn tui si klei Ñu čiăng.
Tơdah Aê Diê amâo brei ôh jih jang klei truh msĕ si drei čiăng, si ngă drei adôk đăo knang kơ Ñu mơ̆?
Wah lač: Ơ Khua Yang, akâo Ih đru kâo đăo kjăp kơ klei myang Ih, wăt tơdah Ih ruah amâo ngă ôh tui si klei kâo čiăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 7:1-26
Kênh Youtube BHKTHN:
