Klei Aê Diê Blŭ: I Klei Yăl Dliê 29:10-15
Êlan kliăng: “Ară anei hmei bi mni kơ Ih, Ơ Aê Diê hmei, leh anăn mpŭ mni kơ anăn guh kơang Ih.” (I Klei Yăl Dliê 29:13).
Klei êmuh ksiêm mĭn: Si ênhă mtao Y‑Đawit mpŭ mni kơ Aê Diê? Si klei ñu thâo săng kơ Aê Diê, kơ ñu pô leh anăn kơ phung ƀuôn sang Aê Diê? Tơdah thâo săng kơ hlei Aê Diê jing, si ênhă drei myơr klei blŭ hdơr knga bi mni leh anăn mpŭ mni kơ Aê Diê?
Ti anăp jih jang phung ƀuôn sang, mtao Y‑Đawit myơr klei wah lač mpŭ mni kơ Aê Diê msĕ si sa klei mmuñ hdơr knga bi mni. Leh ñu ƀuh phung ƀuôn sang Aê Diê myơr hŏng ai tiê kmah kơ bruă mdơ̆ng Sang Yang pioh kkuh mpŭ kơ Yêhôwa, ñu amâo dưi dôk kriêp ñăt ôh. Klei ñu wah lač hdơr knga bi mni bŏ hŏng klei mpŭ kñăm pioh mmuñ bi mni kơ Aê Diê “klei prŏng, klei myang, klei guh kơang, klei dưi, leh anăn klei kdrăm kơah” (êlan 11), leh anăn čiăng mñă bi hdơr kơ ñu pô mbĭt hŏng kơ jih jang phung ƀuôn sang Aê Diê kơ knuih Aê Diê jing.
Hlăm klei blŭ mpŭ mni kơ Aê Diê, mtao Y‑Đawit lač klă “jih jang mnơ̆ng hlăm adiê leh anăn ti lăn ala jing dŏ Ih sơăi”, “ƀuôn ala mtao jing dŏ Ih”, “Ih kiă kriê ti dlông jih jang. Hlăm kngan Ih mâo klei myang leh anăn klei ktang” (êlan 11-12). Tui tluôn anăn, ñu thâo kral kơ ñu pô leh anăn phung ƀuôn sang ñu jing hơăi mang, jih jang mnơ̆ng kbiă hriê mơ̆ng Aê Diê brei sơăi. Wăt tơdah jih jang mnuih myơr hŏng ai tiê kmah, ƀiădah jih jang mnơ̆ng diñu myơr jing dŏ Aê Diê leh sơăi (êlan 14). Ñu ăt thâo kral mơh ênuk mnuih dôk hdĭp ti lăn ala knŏng jing bhiâo rit mkă hŏng ênuk hlŏng lar Aê Diê (êlan 15).
Hŏng jih jang klei ñu thâo săng anăn, mtao Y‑Đawit amâo dưi ôh amâo myơr kơ Aê Diê klei mpŭ mni leh anăn hdơr knga bi mni. Aê Diê jing Pô năng kkuh mpŭ, mpŭ mni nanao hlŏng lar kyuadah Ñu kiă kriê jih jang mnơ̆ng. Myơr kơ bruă Aê Diê jing klei pap Ñu brei kơ drei dưi lŏ myơr wĭt kơ Ñu ya mta Ñu brei leh kơ drei. Kyuadah ksiêm nik, Aê Diê jing Pô mdrŏng leh anăn guh kơang, Ñu amâo guôn mâo mnơ̆ng drei myơr ôh dưi bi leh bruă Ñu. Yăl dliê kơ ênuk mnuih, mtao Y‑Đawit ăt msĕ si Y‑Môis hưn mdah hlăm Klei Mmuñ Hđăp 91. Sĭt nik, ênuk mnuih dôk hdĭp đŭt bhiâo, găn pral, amâo mâo điêt đuôt klei čang hmăng ôh (êlan 15), knŏng ya mta drei myơr kơ Aê Diê adôk nanao hlŏng lar. Aê Diê brei kơ drei klei dưi myơr jing sa ênhă êlan čiăng kơ drei bi êdah klei thâo hdơr knga bi mni kơ Aê Diê leh anăn ăt jing ênhă êlan čiăng kơ drei mkăm pioh ngăn drăp hlăm adiê mơh (Y‑Mathiơ 6:20).
Hruê anei, mta klei čiăng hlăm Phung Sang Aê Diê adôk lu čiăng kơ drei dưi mâo kdrêč mguôp mbĭt, msĕ si hlăm bruă hiu hưn Klei Mrâo Mrang Jăk čiăng pŏk Ƀuôn Ala Mtao Aê Diê leh anăn bi mtlaih mnuih; bruă rŭ mdơ̆ng Sang Aê Diê, boh nik nak hlăm ƀuôn sang kbưi čiăng mâo anôk kơ phung anak Aê Diê kkuh mpŭ kơ Ñu; hlăm bruă đru dŏng mdrao gŭn čiăng đru anôk dôk tuôm hŏng klei dleh dlan… Akâo kơ Aê Diê đru drei tui klei bi hmô mơ̆ng phung ƀuôn sang Aê Diê ênuk đưm, myơr hŏng ai tiê kmah čiăng bi êdah klei hdơr knga bi mni kơ Aê Diê kơ jih klei Ñu brei leh kơ drei.
Si ngă drei thâo mơ̆ jih jang ya mta klei drei dôk djă jing dŏ Aê Diê sơăi? Si ngă diih mprăp êmiêt čiăng myơr kơ Aê Diê hŏng ai tiê kmah mơ̆?
Wah lač: Ơ Khua Yang, akâo kơ Ih mñă kâo thâo săng jih jang mnơ̆ng kâo mâo jing dŏ Ih sơăi čiăng kơ kâo thâo myơr hŏng ai tiê kmah kơ bruă Ih. Akâo kơ Ih brei kâo thâo hdơr knga bi mni kơ Ih nanao jih klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 5
Kênh Youtube BHKTHN:
