Klei Aê Diê Blŭ: II Klei Yăl Dliê 7:12-16
Êlan kliăng: “Tơdah phung ƀuôn sang kâo arăng pia hŏng anăn kâo bi luă gŭ diñu pô, wah lač leh anăn duah ƀô̆ mta kâo, leh anăn lui êlan soh diñu, hlăk anăn kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu” (II Klei Yăl Dliê 7:14).
Klei êmuh ksiêm mĭn: Aê Diê bi êdah hŏng Mtao Y‑Salômôn hlăm ti wưng? Ya klei Aê Diê lač kơ ñu? Ya ngă srăng mâo klei yan adiê ngă, klei truh? Ya knuih Aê Diê čiăng kơ phung ƀuôn sang Ñu mâo čiăng dưi bi mtlaih? Ya klei brei drei ngă čiăng dưi mâo klei Aê Diê ƀuăn kơ klei pap leh anăn bi mtlaih sĭt tuôm hŏng klei truh, klei lông dlăng?
Leh Mtao Y‑Salômôn rŭ mdơ̆ng Sang Yang leh anăn myơr hŏng klei kdrưh kơang snăn Aê Diê bi êdah hŏng ñu. Anei jing gưl tal dua Aê Diê bi êdah hŏng Mtao Y‑Salômôn hlăm mlam (II Klei Yăl Dliê 1:7). Ñu lač, Ñu hmư̆ leh klei Mtao Y‑Salômôn wah lač leh anăn ruah Sang Yang anei jing anôk myơr mnơ̆ng ngă yang. Aê Diê bŏ hŏng klei thâo, kpă ênô leh anăn doh jăk thâo sa hruê êdei phung ƀuôn sang Aê Diê srăng ngă soh ngă kơ Aê Diê brei mâo klei yan adiê ngă msĕ si adiê không sui, ktuôp bi rai, klei ruă bi mdjiê ngă kơ diñu kmhal klei soh. Ƀiădah Ñu ăt jing sa Aê Diê bŏ hŏng klei pap, srăng pap brei, bi mtlaih mơ̆ng klei jhat. Kyua anăn, wăt tơdah mâo ya klei truh snăn phung jing dŏ Aê Diê brei thâo Ñu khăp nanao kơ phung ƀuôn sang Ñu leh anăn diñu mâo nanao klei čang hmăng.
Kyua khăp kơ phung dưi pia hŏng Anăn Ñu, Aê Diê ruah leh Sang Yang ti Yêrusalem mrâo leh rŭ mdơ̆ng anei jing “anôk ngă yang”, čiăng kơ Ñu bi êdah ti krah diñu leh anăn diñu dưi bi tuôm hŏng Aê Diê. Hlăk anăn, tơdah phung ƀuôn sang Aê Diê thâo kral klei soh, bi luă gŭ pô, thâo săng brei pô mâo Aê Diê leh anăn jih ai tiê mă bruă kơ ñu, kwưh akâo klei Aê Diê bi mtlaih, snăn hlăk anăn ală Aê Diê srăng “dôk dlăng”, knga Ñu srăng “dôk hmư̆” klei diñu wah lač myơr ti Sang yang, pap brei klei soh diñu leh anăn bi hlao lăn čar diñu (êlan 14‑15). Kyua Sang Yang anei jing anôk Ñu ruah leh anăn mjing doh jăk, čiăng kơ Anăn Aê Diê dôk tinăn lă lar leh anăn ală hŏng ai tiê Ñu ăt srăng dôk tinăn hlăm jih ênuk (êlan 16).
Bi mni lač jăk kơ Aê Diê kyua klei Ñu ƀuăn pap brei, bi mtlaih, kơ klei dôk dlăng, dôk hmư̆ leh anăn khăp “nanao” Aê Diê brei kơ hlei pô dôk hlăm Ñu. Phung đăo kơ Krist hruê anei ăt msĕ si phung ƀuôn sang Aê Diê đưm dih, “jing sa phung găp djuê Aê Diê ruah leh, phung khua ngă yang kơ mtao, sa phung găp djuê doh jăk, phung ƀuôn sang Aê Diê pô, čiăng kơ diih dưi hưn bruă yuôm bhăn Pô iêu leh diih kbiă mơ̆ng klei mmăt truh kơ klei mngač yuôm bhăn Ñu” (I Y‑Pêtrôs 2:9), anăn drei ăt srăng mâo klei Aê Diê ƀuăn pap brei leh anăn bi mtlaih tơdah tuôm klei dleh dlan, lông dlăng tơdah drei thâo “bi luă gŭ drei pô, wah lač leh anăn duah ƀô̆ mta Ñu, leh anăn lui êlan soh drei.” Anăn jing knuih brei mâo sĭt tlă anăp hŏng klei truh, klei dleh dlan hlăm klei hdĭp tui hluê Khua Yang.
Tơdah tuôm hŏng klei truh, dleh dlan, lông dlăng, drei khăng ƀuah ăl Aê Diê amâodah “bi luă gŭ pô, wah lač, tui duah” ƀô̆ mta Ñu leh anăn kmhal, lui klei soh pô?
Wah lač: Ơ Khua Yang, akâo kơ Ih đru kâo êlâo hĭn thâo bi luă gŭ pô, kmhal klei soh, kwưh akâo klei pap brei leh anăn klei Aê Diê bi mtlaih hlăm klei truh, dleh dlan hrô kơ klei ƀuah ăl amâodah kƀah klei đaŏ knang kơ Ñu.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 18:1-27
Kênh Youtube BHKTHN:
