Klei Aê Diê Blŭ: Klei Bi Hriêng 6:12-15
Êlan kliăng: “Kyuanăn klei knap mñai srăng truh kơ ñu bhiâo riâo rit, ñu srăng rai mtam, amâo lŏ dưi hlao ôh.” (Klei Bi Hriêng 6:15).
Klei êmuh ksiêm mĭn: Si jing mnuih hơăi mang? Si jing knuih mnuih hơăi mang? Ya boh mă tŭ mơ̆ng klei hdĭp mnuih hơăi mang? Ya drei ngă čiăng bi êdah knuih thâo kiă kriê asei pô, djŏ hnơ̆ng hlăm klei blŭ?
“Mnuih hơăi mang” amâodah “mnuih jhat ƀai” hlăm klei Hêbrơ, mblang jing “amâo mâo tŭ dưn, amâo mâo yua”, leh anăn ăt mblang mơh jing “mnuih bi rŭng”, jing phung mnuih jhat snăk kăp kčŭt čuih ai arăng bi kdơ̆ng hŏng djăp mta klei jăk. Knuih êdah hĭn mơ̆ng “mnuih hơăi mang” mâo klei bi sô̆ djŏ hŏng klei blŭ. Êlâo hĭn, anei jing mnuih mâo kƀông êlah mgưt luar, nao anôk anei anôk adih hiu blŭ klei wê (êlan 12). Amâo djŏ knŏng yua klei blŭ ôh, “mnuih hơăi mang” ăt yua wăt klei blŭ hŏng asei mlei mơh kăp ngă klei jhat ƀai (êlan 13). Mrâo dlăng, mĭndah klei “mnuih hơăi mang” ngă jing điêt mang, ƀiădah ba truh klei jhat prŏng snăk sơưn.
Kdlưn hĭn kơnăn, “mnuih hơăi mang” yua wăt klei blŭ kăp rah amâodah “duah klei bi mneh msao” (êlan 14). “Rah” amâodah “Duah” jing boh blŭ lač kơ bruă Y‑Samsôn ngă, ñu kă pui kƀong ti ku mja, čuh leh anăn phưi tha mŭt hlăm hma mdiê ƀlê phung Philistin (Phung Khua Phat Kđi 15:4‑5). Hrô kơ klei ba klei bi grăng, hnŭk ênang, snăn klei blŭ “mnuih hơăi mang” msĕ si pui trơ̆ng ƀơ̆ng lar, kăp bi rai klei sa ai tiê, leh anăn bi ngă bi jhat mngăt ai tiê grăp čô hlăm phung ƀuôn sang.
Êlan 14 brei ƀuh kơ knhuang ngă soh “mnuih hơăi mang”: kčưm dơ̆ng mơ̆ng ai tiê “wê”, atăt truh kơ klei mĭn “trông čhai kơ klei jhat”, êdei anăn yua klei blŭ čiăng “duah klei bi mneh msao”. Blŭ mdê, klei wê amâo tuôm mjưh mơ̆ng “mnuih hơăi mang” ôh, ƀiădah ñu duah êlan čiăng bi hmăi nanao, bi lar klei bi kdơ̆ng, klei bi roh ñu hŏng pô mkăn. Ƀiădah brei drei hdơr snei, mnuih jhat ƀai srăng mă tŭ yơh boh mơ̆ng klei jhat ƀai ñu ngă. “klei knap mñai srăng truh kơ ñu bhiâo riâo rit”, êjai hlăk ñu amâo mđing mĭn ôh snăn klei rai anei “amâo lŏ dưi hlao ôh” (êlan 15), čiăng lač amâo dưi weh đuĕ, wăt kăn dưi tlaih rei, leh anăn hlăk anăn “mnuih hơăi mang” srăng “rai mtam”. Anei yơh jing rup sa boh mran mčah rai amâodah rup sa čô joh kkuê. Jih jang klei “mnuih hơăi mang” čang hmăng jing “bi rai” klei kpă ênô, klei mâo pruê̆ êlan, klei dưi phung ƀuôn sang, ñu duah ngă klei bi kah, klei bi rŭng, snăn ñu pô yơh jing hĕ “pô tŭ klei rai”. Sĭt djŏ yơh, ya mjeh arăng rah leh arăng srăng wiă boh anăn mơh.
Tơdah mâo pô lač kơ diih jing “mnuih hơăi mang” amâodah “mnuih wê” sĭt nik drei srăng ăl êdi yơh! Bi tơdah êmuh diih: si ngă klei blŭ diih tuôm “mgưt, luar” leh anăn “duah klei bi mneh msao” mơ̆? Tơdah mâo mơh, snăn drei jing “mnuih hơăi mang” amâodah “mnuih wê” yơh! Akâo Aê Diê pap brei leh anăn bi mtlaih drei tlaih mơ̆ng klei blŭ jhat ƀai amâodah mgưt luar, wăt akâo Ñu bi mtlaih drei čiăng đăm jing ôh mnuih duah klei bi mneh msao hlăm Phung Sang Aê Diê. Bi êdah bĕ knuih thâo kiă kriê asei pô, djŏ hnơ̆ng hlăm klei blŭ, mâo Yang Mngăt Jăk ksiêm dlăng, čiăng kơ klei blŭ mâo klei bi pap, ba klei rŭ mdơ̆ng leh anăn bi juh pô mkăn.
Si ngă drei brei Yang Mngăt Jăk ksiêm dlăng klei blŭ drei êlâo kơ drei ha blŭ mơ̆?
Wah lač: Ơ Khua Yang, akâo Klei Blŭ Ih grăp hruê bi mlih kâo leh anăn ksiêm dlăng êlah kƀông kâo, čiăng kâo yua ƀăng êgei kâo hưn Klei Mrâo Mrang Jăk, leh anăn klei jăk Ih kơ lu mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 26:1-27:4
Kênh Youtube BHKTHN:
