Klei Aê Diê Blŭ: Y‑Yêrêmi 28:1-10
Êlan kliăng: “Ơ Yêhôwa, ih thâo săng leh, hdơr bĕ kơ kâo leh anăn răng kriê kâo, leh anăn rŭ ênua kơ phung ngă jhat kơ kâo. Hŏng klei ih pap đăm mă hwiê hĕ kâo ôh, brei ih thâo kyua ih kâo tŭ klei arăng ƀuah.” (Y‑Yêrêmi 15:15)
Klei êmuh ksiêm mĭn: Hlei jing Khua pô hưn êlâo Y‑Hanania? Ya klei ñu hưn êlâo? Si ngă klei Khua pô hưn êlâo Y‑Yêrêmi ngă ti anăp klei hưn êlâo luar mơ̆ng Y‑Hanania? Ya klei brei drei ngă ti anăp klei mtô soh, klei ƀuăn jăk hmư̆ mơ̆ng phung khua pô hưn êlâo soh?
Ăt hlăm sa thŭn, leh klei Khua pô hưn êlâo Y‑Yêrêmi hưn kơ bruă dŭm ala čar tŭ klei gĭt gai mơ̆ng mtao Y‑Nebukatnetsar hluê si klei Yêhôwa hưn, snăn Khua pô hưn êlâo Y‑Hanania ăt yua Anăn Yêhôwa hiu hưn sa klei bi mklăk hŏng klei Khua pô hưn êlâo Y‑Yêrêmi ti anăp phung khua ngă yang leh anăn phung ƀuôn sang snei: “Kâo srăng bi joh knông mtao Ƀaƀilôn bi mđua. Hlăm dua thŭn kâo srăng ba wĭt kơ anôk anei jih jang čhiên mngan hlăm sang Yêhôwa, mnơ̆ng Y‑Nebukatnetsar mtao Ƀaƀilôn mă mđuĕ leh mơ̆ng anôk anei leh anăn ba kơ ƀuôn Ƀaƀilôn. Msĕ mơh kâo srăng atăt wĭt kơ anôk anei Y‑Jêhôyakin anak êkei Y‑Jêhôyakim mtao Yuđa, leh anăn jih jang phung Yuđa jing mnă nao dôk leh hlăm čar Ƀaƀilôn,’ Yêhôwa lač, ‘kyuadah kâo srăng bi joh hĕ knông mtao Ƀaƀilôn bi mđua” (êlan 2-4). Amâo djŏ knŏng dŭm năn ôh, Y‑Hanania bi joh giê knông mơ̆ng kkuê Khua pô hưn êlâo Y‑Yêrêmi čiăng bi mklă klei ñu hưn sĭt djŏ (Y‑Yêrêmi 27:2; 28:10).
Tlă anăp hŏng klei Y‑Hanania blŭ luar, Khua pô hưn êlâo Y‑Yêrêmi ăt kăn mgei rei, ñu lŏ wĭt blŭ hŏng klei bi mklă tliêr kjăp. Boh blŭ “Amen” (êlan 6) bi êdah Y‑Yêrêmi srăng hơ̆k mơak leh anăn jih ai tiê čang guôn tơdah djăp bruă truh msĕ si klei Y‑Hanania lač leh. Ƀiădah ñu lŏ lač kơ Y‑Hanania leh anăn jih jang phung ƀuôn sang brei hdơr hlăm ai tiê leh anăn ksiêm dlăng amâo djŏ knŏng hjăn ñu ôh, ƀiădah dŭm klei hưn êlâo ênuk êlâo ăt hưn êlâo “kơ klei bi blah, klei ư̆ êpa, leh anăn klei ruă tưp srăng truh kơ lu boh čar leh anăn lu ƀuôn ala mtao prŏng” (êlan 8). Tơdah hưn klei êđăp ênang ƀiădah klei anăn truh leh anăn klei êđăp ênang jing mâo sĭt snăn khua pô hưn êlâo anăn klă sĭt jing khua pô hưn êlâo Yêhôwa tiŏ nao (êlan 9). Leh anăn Y‑Yêrêmi đuê̆. Ñu đaŏ Aê Diê jing Pô ñu mă bruă srăng răng mgang ñu, leh anăn mông dôk guôn jing klei wĭt lač klă hĭn kơ grăp čô khua pô hưn êlâo.
Đưm dih ăt msĕ si hruê anei, khua pô hưn êlâo soh ăt mŭt hlăm Sang Aê Diê, hưn lu klei luar, soh, ƀuăn klei jăk bi mtluh phung ƀuôn sang Aê Diê. Phung khua pô hưn êlâo luar, phung ksiêm hriăm mgưt lač nanao kơ klei mklăk hŏng Klei Aê Diê Blŭ. Tui hluê Khua pô hưn êlâo Y‑Yêrêmi, akâo kơ Aê Diê đru brei thâo kral ti anăp klei bi kdơ̆ng mơ̆ng phung khua pô hưn êlâo soh, knang kjăp hlăm Klei Aê Diê Blŭ jing klă kpă ênô leh anăn dôk guôn Aê Diê bi êdah klei luar diñu hlăm hruê mông.
Drei dôk tŭ klei ruă ai tiê kyua klei hiu hưn luar mơ̆? Si ngă diih ngă ti anăp klei anăn?
Wah lač: Ơ Khua Yang Aê Diê Pô Myang hĭn, jing Pô kiă kriê leh anăn thâo djăp mta klei, akâo Ih đru kâo thâo gĭr, čiăng kpă ênuah hưn klei kpă leh anăn thâo kral ti anăp klei bi kdơ̆ng êla klei sĭt nik dưi truh tui si hruê mmông Ih kčah leh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 9:18-10:16
Kênh Youtube BHKTHN:
