Klei Aê Diê Blŭ: I Têsalônik 2:5-8
Êlan kliăng: “Ƀiădah hmei jing êdu êun ti krah diih, msĕ si sa čô mniê rông anak kiă kriê phung anak ñu pô.” (I Têsalônik 2:7).
Klei êmuh ksiêm mĭn: Khua ƀĭng kna Y-Pôl brei thâo kơ ñu pô mbĭt hŏng êpul hiu hưn ba Klei Mrâo Mrang Jăk truh kơ phung đăo ti ƀuôn Têsalônik hŏng si hdră êlan? Si klei ñu “dôk dơ̆ng ƀơ̆ng huă” ti krah digơ̆? Ya rup ñu yua čiăng lač kơ ai tiê ñu hŏng digơ̆? Si drei dôk dơ̆ng ƀơ̆ng huă ti krah jih jang mnuih?
Leh tuôm hŏng klei arăng mă ngă jhat ti ƀuôn Philip, khua ƀĭng kna Y-Pôl mbĭt hŏng êpul hiu hưn klei đăo lŏ nao truh ti ƀuôn Têsalônik čiăng mtô Klei Mrâo Mrang Jăk. Bi mni lač jăk kơ Aê Diê, phung mnuih tinei mprăp leh ai tiê tŭ jum Klei Mrâo Mrang Jăk. Ƀiădah, khua ƀĭng kna Y-Pôl ăt tuôm hŏng lu klei bi kdơ̆ng mơh, snăn leh kơnăn ñu kbiă đue ̆ mơ̆ng anôk anei hŏng klei jêč ruăt (Bruă Ƀĭng Kna 17:5,10). Êdei, ñu tiŏ nao pô ñu bi hriăm jing Y-Timôthê lŏ wĭt čuă phung anak ƀuôn sang Aê Diê ti Phung Sang Aê Diê Têsalônik čiăng bi mđĭ ai klei đăo digơ̆ (I Têsalônik 3:2).
Hlăm hră čih mơĭt kơ Phung Sang Aê Diê Têsalônik, khua ƀĭng kna Y-Pôl kñăm, hlăk ñu nao mtô Klei Mrâo Mrang Jăk kơ digơ̆, ñu amâo tuôm yua klei blŭ “myâo mă”, amâodah “mplư čiăng mâo dŏ dô” ôh, leh anăn ñu mâo “Aê Diê jing Pô hưn bi sĭt” kơ ñu (êlan 5). Mklăk wĭt, ñu “jing êdu êun ti krah diih” (êlan 7a). Wăt tơdah ñu mâo klei dưi brei digơ̆ “mpŭ” kơ ñu msĕ si “phung khua ƀĭng kna Krist”, ƀiădah ñu amâo ngă klei anăn ôh kyuadah ñu amâo tuôm “duah klei mnuih mpŭ mni” ôh (êlan 6). Ñu yua rup “sa čô mniê rông anak kiă kriê phung anak ñu pô” čiăng lač kơ klei ñu dôk dơ̆ng ƀơ̆ng huă hŏng phung đăo ti ƀuôn Têsalônik (êlan 7b).
Sĭt êdi, khua ƀĭng kna Y-Pôl bŏ hŏng klei ênang êdu êun kiă kriê phung đăo ti Phung Sang Aê Diê Têsalônik, ñu sŭk suôr mtô lač leh anăn êdu êun bi mđĭ ai digơ̆ hŏng ai tiê đru kơrŭ, mpŭ. Ñu khăp čiăng leh anăn dlăng kơ digơ̆ jing “yuôm snăk” hŏng ñu. Ñu amâo djŏ knŏng ba Klei Mrâo Mrang Jăk Bi Mtlaih kơ digơ̆ ôh ƀiădah wăt brei klei hdĭp ñu kơ digơ̆ mơh (êlan 8). Klei hdĭp bi hmô mơ̆ng khua ƀĭng kna Y-Pôl leh anăn klei ñu bi êdah ai tiê ñu ti krah phung Têsalônik bi hmô msĕ si sa čô amĭ jăk kiă kriê anak điêt ñu pô, anăn yơh jing klei kiă kriê bŏ dlai hŏng klei khăp hơiêng, ênang, êdu êun.
Khua ƀĭng kna Y-Pôl mtă mtăn kơ phung anak Aê Diê hlăm hră čih kơ Philip 4:5 snei: “Brei jih jang mnuih thâo klei diih êmhač” kyuadah ñu pô yơh “jing êdu êun ti krah diih”.
“Jing êdu êun” mblang jing knhuah dôk dơ̆ng êmhač, ênang leh anăn êdu êun hŏng ai tiê luă gŭ, thâo mpŭ kơ arăng. Khua Yang Yêsu iêu mthưr drei brei hriăm mơ̆ng Ñu, “Brei diih đua knông kâo leh anăn hriăm mơ̆ng kâo, kyuadah kâo jing ênang leh anăn mâo ai tiê luă gŭ; leh anăn mngăt diih srăng mdei.” (Y-Mathiơ 11:29). Phung đăo brei mâo knhuah dôk hdĭp êmhač ênang, êdu êun ti krah jih jang mnuih, čiăng kơ hŏng klei hdĭp drei, dưi ktŭng hrip arăng nao kơ Khua Yang.
Si ngă drei dôk hdĭp hŏng klei “êdu êun” mơ̆ ti krah gŏ sang drei, Phung Sang Aê Diê leh anăn ƀuôn sang?
Ơ Khua Yang, ai tiê khua ƀĭng kna Y-Pôl hŏng phung đăo ti Phung Sang Aê Diê Têsalônik jing yuôm bhăn êdi. Akâo Ih đru kâo hriăm mơ̆ng klei Ih bi hmô leh anăn mơ̆ng khua ƀĭng kna Y- Pôl, čiăng dưi dôk hdĭp êdu êun, êmhač ênang hŏng jih jang mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Rut 1
Kênh Youtube BHKTHN:
