Klei Aê Diê Blŭ: Klei Mtô Mñă Klei Bhiăn 7:16-21
Êlan kliăng: “Đăm huĭ kơ diñu ôh, kyuadah Yêhôwa Aê Diê diih dôk ti krah diih, Aê Diê prŏng leh anăn mâo klei krưp” (Klei Mtô Mñă Klei Bhiăn 7:21).
Klei êmuh ksiêm mĭn: Ya mta klei Yêhôwa Aê Diê mtă kơ phung ƀuôn sang Israel brei dưi ngă leh anăn amâo dưi ngă ôh? Ya ngă brei phung ƀuôn sang Aê Diê bi rai hĕ jih jang phung ƀuôn sang hlăm čar, amâo dưi pap ôh? Hŏng si klei Aê Diê bi hơĭt kjăp ai tiê phung ƀuôn sang Ñu? Si drei ngă čiăng kơ đăm rŭng răng huĭ hyưt ôh?
Trăn Klei Aê Diê Blŭ anei brei ƀuh kơ phung ƀuôn sang Israel dôk huĭ hyưt tơdah diñu dŏk mprăp ksŭng mŭt hlăm anôk Lăn Ƀuăn, diñu huĭ kyuadah ƀuh kơ knhal kdriêl pô leh anăn êpul phung lu jhŏng ktang phung ƀuôn sang dôk hdĭp tinăn. Aê Diê ƀuh jih klei huĭ hyưt mbĭt hŏng klei rŭng răng hlăm ai tiê phung ƀuôn sang Israel, kyuanăn Ñu mtă mtăn kơ phung ƀuôn sang Israel brei ngă hluê dua mta klei. Mta tal sa, hlăk phung ƀuôn sang Aê Diê ksŭng mŭt plah mă Lăn Ƀuăn, brei bi rai hĕ jih phung ƀuôn sang dôk hlăm čar anăn, amâo dưi pap kơ diñu ôh. Kyuadah anei jing phung ƀuôn sang jhat ƀai snăk, kyuanăn Aê Diê yua phung ƀuôn sang Ñu čiăng bi kmhal diñu. Klei mdê dơ̆ng, Aê Diê thâo tơdah phung ƀuôn sang Israel kyua klei pap, phưi mtlaih hĕ diñu dôk hdĭp, snăn mâo đa bliư̆ diñu srăng jing kđông ƀêč mplư phung ƀuôn sang Aê Diê mă bruă kơ phung yang diñu (êlan 16). Mta tal dua, Aê Diê iêu mthưr phung ƀuôn sang Ñu lŏ dlăng wĭt kơ hƀuê ênuk, čiăng lŏ mñă bi hdơr kơ diñu pô, Ñu jing Aê Diê bŏ hŏng klei myang. Klei phung aê aduôn đưm diñu dưi kbiă đuê̆ mơ̆ng čar Êjip jing sa mta bruă mnuih amâo dưi ngă ôh, ƀiădah jing bruă kluôm dhuôm hlăm kngan Aê Diê. Leh anăn Aê Diê Pô kñăm sĭt Ñu ăt srăng ngă bruă klei myang anăn kơ phung ƀuôn sang Ñu mơh hlăk diñu ksŭng mŭt mblah mă anôk Lăn Ƀuăn (êlan 17-20).
Êngao kơnăn, Aê Diê lŏ suôt mđuê̆ hĕ jih klei huĭ hyưt hlăm ai tiê phung Israel hŏng klei Ñu ƀuăn srăng dôk mbĭt ti krah diñu (êlan 21). Anei jing klei kdrưh mơak êdi kơ phung ƀuôn sang Aê Diê, kyuadah diñu amâo djŏ knŏng ƀuh klei myang Aê Diê ôh, ƀiădah wăt bi knal klei Aê Diê dôk mbĭt mơh.
Mâo sa mta klei dôk bi keh koh hlăm ai tiê phung drei, anăn jing êjai tlă anăp hŏng klei dleh dlan êngao kơ klei dưi drei pô, sa nah tĭng drei bi hơĭt ai tiê drei pô brei đăo knang kơ Aê Diê leh anăn jao jih ênông ktrŏ kơ Ñu, bi sa nah tĭng lĕ, drei ăt huĭ hyưt, kƀah klei êđăp ênang leh anăn duah nanao ênhă êlan bi mghaih mkra tui si klei mĭn drei pô. Brei drei hdơr, Aê Diê tuôm ngă leh kơ drei bruă prŏng hlăk êlâo dih, ăt Ñu mơh jing Pô ƀuăn srăng dôk mbĭt hŏng drei hlăm jih klei bi blah prŏng amâodah điêt hlăm klei hdĭp. Tơdah drei hŏng jih ai tiê jao knang kơ Khua Yang kluôm dhuôm, drei amâo djŏ knŏng bi knal Ñu hlăm thŭn mlan êgao ôh, ƀiădah ăt wăt ară anei hin leh anăn hlŏng kơ hruê êdei anăp mơh. Tơdah Aê Diê, Mtao kơ jih jang mtao lač leh kơ drei, đăm huĭ kơ diñu ôh, snăn amâo lŏ mâo ya mta phŭn knhal kơ drei dôk hdĭp hlăm klei rŭng răng huĭ hyưt ôh!
Ya klei Khua Yang dôk blŭ hŏng ih ti anăp êlan dleh dlan huĭ hyưt hlăm klei hdĭp?
Ơ Khua Yang, bi mni kơ Ih kyua Ih thâo săng jih klei huĭ hyưt leh anăn rŭng răng hlăm ai tiê kâo. Akâo Ih đru kâo đăo knang kơ Ih nanao, leh anăn dôk kjăp ksŭng phă anăp wăt tuôm hŏng đa kdrêč êlan dleh dlan dưn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 7:1-35
Kênh Youtube BHKTHN:
