Klei Aê Diê Blŭ: Y-Markôs 15:16-20
Êlan kliăng: “Ñu jing pô arăng bi êmut leh anăn hngah leh, sa čô mnuih bŏ hŏng klei ênguôt leh anăn thâo kral klei ruă. Msĕ si sa čô arăng mdăp ƀô̆ mta kơ ñu, arăng bi êmut kơ ñu, leh anăn drei amâo mpŭ kơ ñu ôh.” (Y-Êsai 53:3).
Klei êmuh ksiêm mĭn: Si ngă Khua Yang Yêsu Pô Bi Mtlaih tŭ hĕ klei hêñ mlâo? Si klei Khua Yang lŏ bi kdơ̆ng wĭt? Ya ngă Khua Yang ư̆ tŭ jih msĕ snăn? Ya mta klei đru ih hlăm klei bi mguôp hŏng pô mkăn mă mơ̆ng rup bi hmô klei Khua Yang tŭ gĭr?
Arăng khăng blŭ hlăp msĕ snei: “Ư̆ ăn jing hêñ mlâo”. Ƀiădah, jing phung anak Aê Diê, drei thâo Khua Yang čiăng kơ drei hdĭp hŏng ai tiê klei mĭn thâo bi jang bi tŭ hdơ̆ng găp, leh anăn “klei tŭ gĭr” jing sa hlăm lu knuih mơ̆ng boh Yang Mngăt Jăk brei phung đăo bi mâo hĕ hlăm klei hdĭp pô. Pô čih hdruôm hră Y-Yakơ ăt brei thâo msĕ mơh hlei pô hdĭp tŭ gĭr leh anăn tŭ klei dleh knap srăng mă tŭ klei jăk mơak, msĕ si rup bi hmô mơ̆ng Y-Yôp (Y-Yakơ 5:10-11). Knuih tŭ gĭr amâodah gĭr ư̆ đru kơ phung đăo thâo dôk dơ̆ng jăk hŏng phung mâo knuih hrưn, mđĭ mđua čiăng dưi lŏ atăt diñu wĭt kơ Khua Yang.
Hlăm trăn Klei Aê Diê Blŭ hruê anei, drei srăng hriăm kơ rup bi hmô kơ klei gĭr tŭ hlăm klei gưt asăp mơ̆ng Khua Yang Yêsu. Leh tŭ klei khua phat kđi Y-Pilat brei arăng čăm leh anăn jao ba nao pơ̆ng ti kyâo bi kal, arăng atăt Khua Yang Yêsu mŭt hlăm sang phat kđi leh anăn tŭ klei êpul kahan tinăn mưč mač bi hêñ. Diñu bi mlih gưl kăp mưč mač Khua Yang hŏng klei “bi hơô ao jhung hrah jŭ kơ Yêsu, leh anăn diñu mñam sa boh đuôn mtao êruê leh anăn bi mđua ti boh kŏ gơ̆”, “čăm boh kŏ gơ̆”, “kčuh êa bah ti gơ̆” leh anăn mgưt ngă “čuôn kơŭt kkuh kơ gơ̆” (êlan 17-19). Anăn jing klei ngă bi hêñ mlâo jhat snăk, diñu čŏng ngă čiăng mưč mač leh anăn bi hêñ Khua Yang Yêsu. Ƀiădah, Khua Yang amâo mâo klei lŏ bi kdơ̆ng wĭt ôh. Khua Yang tŭ ư klei arăng mưč mač bi hêñ čiăng dưi bi leh bruă Ama Jao kơ Ñu ti lăn ala brei tŭ klei djiê hrô kơ klei soh phung mnuih. Khua Yang Yêsu jing Aê Diê Yang Tal Dua, jing Mtao kơ jih jang mtao, jing Khua Yang kơ jih jang adiê, ƀiădah tŭ ư hĕ kơ jih jang klei arăng bi hêñ, tŭ gĭr tơl truh ti knhal tuč knŏng čiăng bi leh kluôm ênŭm hdră leh anăn klei Aê Diê Ama čiăng. Khua pô hưn êlâo Y-Êsai ăt hưn êlâo leh mơh kơ klei Khua Yang gĭr tŭ snei: “Ñu jing pô arăng bi êmut leh anăn hngah leh,… Msĕ si sa čô arăng mdăp ƀô̆ mta kơ ñu, arăng bi êmut kơ ñu, leh anăn drei amâo mpŭ kơ ñu ôh.” (Y-Êsai 53:3). Khua Yang Yêsu lui leh kơ drei sa klei bi hmô tloh ênoh hlăm klei thâo gưt asăp čiăng dưi bi leh bruă kñăm măng ai ya klei arăng bi hêñ tlao mưč dưn.
Ênuk anei, lu phung đăo amâo dưi gĭr tŭ ôh tơdah arăng mưč mač bi hêñ pô. Klei djăl hlơr, klei tĭng yap lu ƀiă, klei kƀah klei gĭr tŭ mơ̆ng lu phung anak Aê Diê yơh atăt kơ klei bi mneh msao, bi kah, tơl ba truh lu klei boh jhat rŭng ênguôt hlăm Phung Sang Aê Diê. Si ngă drei dưi hưn bi sĭt kơ Khua Yang tơdah drei pô amâo dưi luă gŭ leh anăn bi tŭ gĭr hŏng pô mkăn ôh? Hmăng hmưi rup bi hmô kơ klei tŭ gĭr mơ̆ng Khua Yang Yêsu srăng đru grăp čô drei jing phung anak Aê Diê brei thâo hriăm mjuăt pô leh anăn bi êdah knuih gĭr tŭ hŏng jih jang mnuih hlăm ai tiê klei mĭn gưt asăp leh anăn thâo khăp.
Si ngă drei kăp mprăp gĭr tŭ čiăng gưt ngă hlue klei Khua Yang čiăng mơ̆?
Ơ Khua Yang, akâo kơ Ih đru kâo hdơr nanao kơ rup bi hmô kơ klei gưt asăp, gĭr tŭ mơ̆ng Khua Yang čiăng kơ kâo dưi bi jang bi tŭ hŏng pô mkăn, čiăng kơ klei Khua Yang čiăng dưi jing hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 1:32-54
Kênh Youtube BHKTHN:
