Klei Aê Diê Blŭ: Klei Mmuñ Hđăp 126:1-6
Êlan kliăng:
“5Phung buh mdiê hŏng êa ală,
srăng puôt wiă hŏng klei hơ̆k mơak.
6Hlei pô djă mjeh nao buh hŏng klei hia,
srăng lŏ wĭt hŏng klei ur hơ̆k djă ba čăp mdiê mbĭt.”
(Klei Mmuñ Hđăp 126:5,6)
Klei êmuh ksiêm mĭn: Klei Mmuñ Hđăp anei dưi čih hlăm ya boh klei mâo? Si ngă buh mdiê ƀiădah hŏng êa ală? Ya boh tŭ dưn mâo? Si klei phung đaŏ kơ Krist ênuk anei ăt buh leh anăn wiă mdiê msĕ si phung ênuk đưm lŏ wĭt kơ ƀuôn sang diñu? Si ngă čiăng dưi jing sa čô mnuih hưn bi sĭt hơ̆k mơak?
Klei boh truh êjai ênuk Klei Mmuñ Hđăp 126 jing klei bi mni kơ klei Aê Diê lŏ ba phung mnă wĭt kơ ƀuôn sang diñu. Hŏng phung ƀuôn sang Aê Diê, bruă anei amâo mdê ôh hŏng klei êpei. Bruă yuôm bhăn tơl amâo dưi mĭn anăn ngă kơ phung ti êngao bi hing snei “Yêhôwa Aê Diê ngă leh klei yuôm bhăn kơ diñu.” Bi hŏng phung ƀuôn sang Aê Diê ƀăng êgei diñu tlao, leh anăn ai tiê diñu mơak mñai mmuñ bi mni. Diñu akâo kơ klei wĭt kơ ala čar mơ̆ng diñu msĕ si hnoh êa kwar Dhŭng, jing hnoh Neghep khuôt thu hlăm yan bhang, dưi mâo êa hlăm yan Puih krih bi êđăp lăn ala asăr mjeh čăt đĭ (êlan 4). Boh sĭt gơ̆ ƀuôn sang Aê Diê tlă anăp hŏng lu klei dleh dlan kyua kdrăn lŏ ênguôt êyăng, diñu lŏ wĭt ngă mơ̆ng mphŭn. Kyua anăn, diñu sut êa ală kah sa kdrêč mdiê pioh kơ mjeh buh pla. Lui klei huă ƀơ̆ng ti anăp čiăng duh kơ klei hdĭp sui dlông hĭn, kyuanăn diñu hdơ̆ng bi mđĭ ai: “Phung buh mdiê hŏng êa ală, srăng puôt wiă hŏng klei hơ̆k mơak. Hlei pô djă mjeh nao buh hŏng klei hia, srăng lŏ wĭt hŏng klei ur hơ̆k djă ba čăp mdiê mbĭt.” (êlan 5,6).
Rup phung đaŏ kơ Krist hruê anei msĕ mơh, drei mâo Khua Yang bi mtlaih leh drei mơ̆ng klei săng đai klei soh kă drei čiăng brei drei dưi mâo klei êngiê pioh hdĭp kơ Khua Yang. Khă snăn, êjai dôk čang guôn hruê Khua Yang lŏ hriê, drei ăt dôk hdĭp ti krah lăn ala kăp rah mjeh Klei Mrâo Mrang Jăk kơ lăn ala. Ƀiădah, phung lăn ala bi êmut kơ drei kyua drei amâo djŏ jing dŏ lăn ala ôh (Y- Yôhan 15:19), kyua anăn, pô hưn bi sĭt kơ Khua Yang ăt nao buh hlăm êa ală, rah mjeh êjai hia. Bruă hiu hưn kơ Khua Yang amâo djŏ ênưih ôh ƀiă dah brei drei mâo klei gĭr, săn asei, tŭ klei dleh dlan. Khădah snăn, Klei Aê Diê Blŭ ƀuăn hŏng drei snei, êa ală tuh leh kyua klei suăi êmăn, ênai hia kyua klei khăp kơ mngăt mnuih dôk ao kơ klei rai luč srăng lŏ tla wĭt hŏng klei mơak yan wiă hŏng lu mngăt kmhal klei soh wĭt kơ Aê Diê. Anăn jing klei mđĭ ai leh anăn klei mơak prŏng hĭn kơ phung hưn bi sĭt kơ Aê Diê. Êa ală tuh leh msĕ êa hjan êđăp krih kdrăn lŏ mtah mda đĭ hriê kơ prŏng leh anăn ksă kñĭ prăp pioh kơ yan wiă.
Phung đaŏ kơ Krist jih ai tiê rah Klei Mrâo Mrang Jăk bi mtlaih srăng jing phung wiă jăk mơak kơ Khua Yang. Čiăng dưi jing pô hưn bi sĭt hơ̆k mơak brei buh hŏng êa ală. Wăt tơdah tŭ lu klei dleh knap ăt tuh êa ală êjai buh, sĭt nĭk pô hưn bi sĭt srăng bŏ klei hơ̆k mơak hlăm yan wiă.
Si klei drei bi knăl klei hơ̆k mơak mơ̆ng klei rah mjeh hŏng êa ală kơ Khua Yang?
Ơ Khua Yang, akâo kơ Ih brei kâo thâo tuh êa ală kyua lu mngăt mnuih dôk rai luč jŭm găn kâo. Akâo kơ Khua Yang yua kâo hưn Klei Mrâo Mrang Jăk bi mtlaih kơ lu mnuih leh anăn hŏng jih ai tiê ngă pô wiă kơ Khua Yang čiăng dưi mâo klei hơ̆k mơak kluôm dhuôn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
