Klei Aê Diê Blŭ: Klei Bi Hriêng 17:9
Êlan kliăng: “Hlei pô pap brei klei soh duah klei khăp hdăng găp ƀiădah hlei pô bi hdơr klei soh luč mah jiăng.” (Klei Bi Hriêng 17:9)
Klei êmuh ksiêm mĭn: Ya klei bi êdah mơ̆ng klei khăp leh anăn ya klei tŭ dưn mâo? Si drei mă yua klei anăn hlăm klei hdĭp? Ya klei mđĭ ai drei hdĭp snăn hŏng ayŏng adei drei?
Khă gơ̆ drei hdơr kna kơ Aê Diê kơ phung sang Aê Diê biădah boh sĭt mâo leh lu blư̆ đa đa ayŏng amai adei ngă kơ drei ênguôt kyua klei diñu ngă soh hŏng drei, leh anăn drei khăng mâo klei lŏ blŭ ktang phĭt hŏng digơ̆. Năng ai dưi lač sĭt drei khăp lu kơ hlei snăn drei ênguôt kơ klei pô anăn ngă lu hĭn.
Hlăm klei hriăm anei, Klei Aê Diê Blŭ bi hriăm drei “tui duah klei khăp” sĭt tuôm hŏng klei soh mơ̆ng ayŏng amai adei pô hŏng bruă “Guôm klei soh” mơ̆ng digơ̆. Sĭt ayŏng adei pô ngă soh, drei mâo klei dưi lač kơ klei anăn, lač kơ klei digơ̆ ngă soh, ƀiădah drei ăt mâo klei dưi duah hdră msir mkăn, “guôm” klei soh anăn. “Guôm klei soh” si jing? Y-Yakơ mtô: “Ơ phung ayŏng amai adei, tơdah sa čô hlăm phung diih klah đuĕ mơ̆ng klei sĭt nik, leh anăn arăng lŏ atăt gơ̆ wĭt, brei ñu thâo hlei pô atăt mnuih soh wĭt mơ̆ng êlan gơ̆ klah đuĕ leh, ñu srăng bi mtlaih mngăt gơ̆ mơ̆ng klei djiê, leh anăn srăng guôm lu klei soh gơ̆.” Y-Yakơ 5:19-20.
Snăn “Guôm klei soh” amâo djŏ jing amâo ƀuh ôh, dlăng hơaĭ mang, amâodah lăm lui klei soh, ƀiădah jing amâo dlăng ôh kơ pô anăn grăp mnĭt mmông mâo klei soh nanao, amâo phat kđi ktang kơ digơ̆ ôh, ƀiădah thâo tŭ jum leh anăn đru kơ pô anăn “lŏ wĭt, lui klei soh.” Čiăng “mtlaih mngăt mơ̆ng klei djiê”. Klei Bi Hriêng 17:9 amâo bi hriăm phung drei đăm đru ôh kơ ayŏng adei pô mkra mlih klei ngă soh sĭt digơ̆ ngă soh ƀiă dah đăm “mñă wĭt mñă nao” ôh boh klei mâo, jing đăm mâo klei đuôm ai leh anăn hiu lač klei digơ̆ ngă soh kơ lu mnuih thâo. Bruă ngă anăn srăng bi ktlah klei khăp ƀĭng găp sĭt suôr, ngă bi rai klei bi mguôp hlăm phung Sang Aê Diê, hlăk êjai anăn Khua Yang Yêsu mtô phung drei brei wăt tơdah bi kmhal snăn mta kñăm ăt jing čiăng “mâo klei bi grăng hŏng ayŏng adei” (Y-Mathiơ 18:15).
Tơdah tuôm hŏng klei ngă soh mơ̆ng ayŏng adei snăn brei drei hdơr drei ăt jing phung soh năng kơ klei djiê ƀiădah Khua Yang Yêsu djiê hrô leh kơ drei čiăng kơ klei soh drei dưi pap brei hlăm kpă ênô mơ̆ng Ñu, leh anăn kyua anăn drei dưi dôk ti anăp klei doh jăk mơ̆ng Aê Diê. Thâo săng kơ klei anei srăng đru phung drei bi leh klei mtă: “Brei diih ngă jăk hdơ̆ng diih pô, bŏ hŏng klei thâo pap, bi pap brei hdơ̆ng diih, msĕ si Aê Diê pap brei leh kơ diih hlăm Krist.” (Êphêsô 4:32).
Drei khăng tuôm mñă wĭt mñă nao mơ̆ klei soh pô mkăn?
Bi mni lač jăk kơ Aê Diê kyua klei khăp leh anăn klei khăp prŏng prĭn mơ̆ng Ih kyua ih pap brei klei soh kâo leh anăn brei kâo dưi jing anak Ih. Akâo kơ ih đru kâo khăp kơ Khua Yang leh anăn kơ ayŏng adei pô hĭn čiăng kơ kâo thâo pap leh anăn đru rŭ mdơ̆ng ayŏng adei klei khăp hlăm Khua Yang.
Klei hriăm dưi mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo kl ei blŭ mguôp, akâo kơ di ih mơĭt hră hlăm gmail: radioelansitnik@gmail.com
