Tơdrong Tơ’bôh 2:1-7
“Mă-lei inh sơ’ngon kơ iĕm minh tơdrong âu: Iĕm ưh pă ‘mêm kơ Inh hăm ‘mêm kơ bôl buăl dang iĕm ‘mêm tơm hmơm iĕm lui sơ̆.” (Tơdrong Tơ’bôh 2:4)
Nơ̆r jet tơchĕng pơwao:
– Khul lui pơlei Êphêsô gơh đei tơdrong bơnê ư ang păng đei chrih tơdrong kiơ?
– Kră Yang krao khul lui pơlei Êphêsô wă kơ wih brŏk đei pêng trong yak thoi yơ?
– Tơdrong ‘lơ̆ng kăl’nâu oei oei gĭt ăn kơ khul lui pơlei Êphêsô dang ei thoi yơ?
Êphêsô jơ̆ minh pơlei tih păng wơ̆ pran gah jang mơdro sa, cheng đak dơsĭ, anih mă ‘bok Pôl đei bơ̆jang pêng sơnăm đei lơ lĕch yua. Lăm tơdrong tơ’bôh 2:1-7, đei tơ’bôh rup pơtih wă tơgŭm lu bơ̆n hlôh băt tơdrong ‘nao ‘lơ̆ng Kră Yang: Yêsu bơih ba ăn kơthơ; “linh jang” jơ̆ tơ’ngla mă pơgơ̆r khul lui; “Jơ̆ng kơđeng” pơtih kơ khul lui pơchrang ăn kơ teh đak. Tơdong mă Kră Yang chĕp pơh tŏ sơnglŏng păng năm tŏk bŏk jơ̆ng kơđeng tơ’bôh Sư bơih ‘Bok pơgơ̆r, ling lang năm hơdai păng hlôh băt dôm tơdrong kon pơlei wă pơm.
Hơdrol hloh, Kră Yang Yêsu bơnê kơ khul lui pơlei Ê-phê-sô yua kơ tơdrong tơnăp lu sư. Lu sư jang gleh, chu kĕ gơ̆t, ưh kơ đei yua dôm tơmam mă kơnê̆, păng băt kơ rơih tơdrong kơnê̆ dah hơlĕnh pơdăr. Lu sư dơ̆ng kơjăp lăm nơ̆r pơkă tơdrong ‘lơ̆ng. Arih tơpăt sĭt lăm tơdrong ‘lơ̆ng rơgoh, păng nuih pơpuh pơrăm dôm tơdrong kơnê̆ glăi yoch. ‘Nâu bơih dôm tơdrong tơm kăl gĭt minh khul tơnăp, ‘lơ̆ng tơpăt, tơpăt sĭt păng oei dơ̆ng kơjăp noh bơih Kră Yang lăp đon. Thoi ei, mălei Kră Yang chrih minh trong mă krưp dêh: Lu Sư ưh pă ‘mêm thoi tơm hmơm blŭng a, Mă đơ̆ng bơwei kơjăp tơdrong tơpăt sĭt păng tơdrong ‘lơ̆ng tơpăt, lu sư oei kơ’bah năm hăm tơdrong băt ‘mêm hăm Kră Yang păng hăm tơduă. Đon lui lu sư rai pă thoi blŭng a tơdrong ‘maih wă hloh kơ tơdrong pơyơ̆r, Tơdrong trŏ glăi noh bơih tơdrong ‘mêm. Tơdrong ‘nâu tơ’blŏk gah ‘lơ̆ng tơpăt dah ưh kơ đei tơdrong ‘mêm gô jing hiong đĭ, păng tơdrong ‘mêm mă ưh kơ băt ‘mêm gô ‘bôh pơmat.
Kră Yang krao khul lui pơlei Ê-phê-sô đei pêng kơnao rơđah: athei ‘blŏk tơbral, păng pơjing pơm đơ̆ng blŭng a (trong 5) lu sư athei ‘blŏk tơdrong ‘mêm păng adrin blŭng a, tơbral păng sơ’ngon gah tơdrong arih bơhngol, păng wih pơtơm đơ̆ng tơdrong tơpă sĭt. ‘Nâu ưh kơ trŏ pơm tơ’bôh gah ‘nguaih păng tơplih đơ̆ng lăm jơhngơ̆m. Pơkă gah tơdrong ‘lơ̆ng hăm nơ̆r tơbăt păng nơ̆r pơkă. Tơdah ưh kơ băt tơbral. Khul lui gô hiong tơdrong mơsêh wă kơ dranh păng jơhngơ̆m đei arih tơ’bôh. Dôm lu bơngai kĕ jei gô đei tơmam apah đei arih ling lang lăm tơdrong mă ‘Bok Kei-Dei năm hơdai (trong 7). ‘Nâu nơ̆r krao wă kơ kơjăp ưh kơ trŏ khan lăm tơdrong tơpăt mălei lăm tơdrong ‘mêm. Tơdrong ‘lơ̆ng ‘nâu oei oei gĭt ăn kơ khul lui dang ei. Lu bơ̆n phŏ kư̆m đei tơdrong hrăt hrot lăm tơdrong jang, tơnăp lăm nơ̆r sĭt tơpă, păng truh kiơ̆ tơdrong tơpăt mălei hiong tơdrong ‘mêm. Chăl arih khul bơngai ưh kơsĭ lăp pơm tơdrong ‘lơ̆ng, păng athei pơm tơdrong hăm jơhngơ̆m ‘mêm kơ Kră Yang. Tơdrong ‘mêm jơ̆ athei tơ’bôh lăm tôm tơdrong. Dôm tơdrong wă pơrăm gô hiong răm (I Kôrintô 13:1-3).
Ơ Kră Yang, apinh mơnat kơplah bơ̆jang mălei kơ bah tơdrong ‘mêm. Apinh Ih tơ iung lăm inh chơt hiôk mă Ih ăn tơdrong ‘mêm blŭng a. Bơtho iñh arih ‘lơ̆ng tơpăt hăm jơhngơ̆m, bơwei tơdrong tơpăt hăm mơnat, păng ‘mêm kơ Kră Yang đĭ jơhngơ̆m , ‘mêm kơ đe thoi bơ̆n ‘mêm kơdih akâu, krao khan yua Anăn Yêsu Krist, Amen.
Tơdrong kiơ lu bơ̆n kăl tơplih păng tơgŭm bơngai nai tơplih wă kơ khul lui wơ̆ ‘lŏ?
Đŏk Sơ̆p Hla bơar ‘Bok Kei-Dei lăm pêng sơnăm: Jop 2
Kênh Youtube BHKTHN:
