Klei Aê Diê Blŭ: Klei Bi Hriêng 27:14
Êlan kliăng: “Hlei pô mdih aguah ưm čiăng hơêč hmưi klei jăk jĭn kơ mah jiăng ñu hŏng asăp kraih ktang, arăng srăng yap jing pô tăm pah” (Klei Bi Hriêng 27:14)
Klei êmuh ksiêm mĭn: Ya ngă klei hơêč hmưi klei jăk jĭn kơ mah jiăng ñu hŏng asăp kraih ktang hlăk aguah ưm arăng yap jing klei tăm pah? Ya klei brei drei ngă čiăng kơ klei blŭ pô ba klei khăp leh anăn klei pap bi mtlaih Aê Diê truh hŏng phung hmư̆?
Hnơ̆ng yuôm bhăn Klei Bi Hriêng 27:14 mtô jing mmông kơ klei blŭ hmăi prŏng snăk kơ bruă si mnuih hmư̆ tŭ mă. Êlan Klei Bi Hriêng hưn brei răng, klei blŭ hơêč hmưi kraih ktang kơ mah jiăng hlăk aguah ưm, huĭ klei blŭ jih ai tiê snăn srăng dlăng jing sa klei tăm pah. Klei êmuh hrăm, bi hơêč hmưi klei jăk mơak jing bruă ngă jăk, ƀiădah ngă ngañ hlăm mmông mah jiăng pô dôk mdei, čiăng klei kriêp ñăt snăn knŏng ba klei amâo jăk kơ mnuih hmư̆. Sa klei mđĭ ai amâodah klei blŭ hŏng klei jăk ƀiădah blŭ hlăm mmông amâo djŏ guôp srăng ênưih ba klei thâo săng čhuai amâodah arăng bi êmut, ngă luč klei tŭ dưn drei čang hmăng.
Hlăm bruă mkăn, pô hơêč hmưi ăt mâo mơh knuih čiăng hưn mdah tơdah hur har kgŭ ưm čiăng blŭ hŏng klei kraih ktang klei hơêč hmưi hŏng pô riêng gah, kñăm mjing klei hưn kơ pô mpŭ snăk kơ ƀĭng găp. Khădah snăn, mmông leh anăn klei blŭ kraih ktang brei ƀuh knuih pô anăn arăng jing amâo kpă ôh. Boh blŭ “arăng srăng yap” čiăng lač dlăng kơ klei hơêč hmưi mgưt amâo mdê ôh hŏng klei tăm pah, kyua klei ngă msĕ si jăk ƀiădah ngă bruă soh. Bruă ngă jăk brei hlue ngă hŏng klei thâo mĭn leh anăn djŏ mmông, tơdah amâo ngă snăn, srăng tŭ klei amâo jăk. Hur har blŭ klei pô mĭn ƀiădah amâo mđing ôh kơ bruă ngă pô hmư̆ snăn srăng wiă klei amâo tŭ dưn. Brei drei djŏ hnơ̆ng, ư̆ ăn, ba yua klei thâo mĭn Aê Diê brei, dưm pô hlăm anôk pô hmư̆, čiăng thâo blŭ klei mđĭ ai djŏ mmông, djŏ anôk hŏng phung riêng gah.
Jing phung ƀuôn sang Aê Diê, drei găn klei lông dlăng čiăng dưi hŏng klei blŭ hrăm hlue si klei mưng, hrô kơ klei anăn, drei blŭ tlao hdơ̆ng pô hŏng klei khăp, ai tiê kpă ênô, leh anăn klei thâo mĭn. Hŏng klei bi mguôp klei blŭ drei hŏng mmông leh anăn knuih djŏ guôp, drei srăng jing sa hdră atăt ba klei khăp leh anăn klei pap Aê Diê, hmăi jăk kơ klei hdĭp phung riêng gah. Akâo kơ Khua Yang brei klei blŭ drei jing đĭng mđoh klei jăk Aê Diê truh hŏng phung riêng gah. Brei Klei Aê Diê Blŭ atăt gai leh anăn ktrâo lač mơ̆ng klei blŭ, bruă ngă drei čiăng kơ drei mâo klei thâo mĭn mơ̆ng Aê Diê, blŭ nanao klei sĭt nik, klei khăp, ba klei mngač hlăm anôk mmăt tĭt, leh anăn atăt êlan kơ phung mkăn kơ klei pap bi mlih leh anăn bi mtlaih mơ̆ng Khua Yang Yêsu Krist jing Khua Yang Pô Bi Mtlaih drei.
Si drei mâo klei thâo kơ klei amâo tŭ jing mơ̆ng klei blŭ amâo djŏ mmông? Si drei mkra mlih?
Wah lač: Ơ Ama Bŏ Hŏng Klei Pap, akâo kơ Ih mtô hmei thâo mpŭ leh anăn mkŏ mjing klei bi mguôp hŏng grăp čô mnuih hlăm klei thâo mĭn Khua Yang. Akâo kơ Ih brei kơ kâo mâo klei blŭ kbiă mơ̆ng klei khăp, klei kpă ênô leh anăn thâo răng hlăm mmông blŭ leh anăn klei blŭ. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
