Tơdrong Pơđơ̆k 27:14
“Bu iung đơ̆ng hrôih drôih sơkat pŭn hiôk kơ rông ‘bôt sư hăm nơ̆r re ôr. Nơ̆r noh đe jô̆ nơ̆r hiap” pơtê̆. (Tơdrong Pơđơ̆k 27:14)
Nơ̆r jet tơchĕng pơwao:
– Yua kơ kiơ nơ̆r sơkat pŭn hiôk ôr re kơ bôl buăl kơplah pơge hrôih ôr re jô̆ khan hiap pơtê̆?
– Lu bơ̆n kăl kơ pơm kiơ wă kơ nơ̆r pơma lu bơ̆n tơdrong ‘mêm păng mơnat ăn đĕch dŏng pơklaih đơ̆ng Kră Yang năm hăm bơngai mơ̆ng?
Tơdrong kăl tơm lăm Tơdrong Pơđơ̆k 27:14 bơtho tơm sư ‘noh jơ năr đơ̆ng nơ̆r pơma sư ‘bơm tih dêh truh tơ bơngai mơ̆ng đei sơng iŏk thoi yơ ‘noh. Nơ̆r lăm Tơdrong Pơđơ̆k đei tơbăt, nơ̆r sơkat ăn pŭn hiôk ôr re ăn kơ bôl buăl kơplah pơge hrôih krê kơ lu nơ̆r đĭ jơhngơ̆m thoi noh đe lăng thoi nơ̆r hiap pơtê̆. Nơ̆r jet gia, nơ̆r hơpơi hiôk ‘lơ̆ng dih băl ‘noh ‘lơ̆ng, mălei nơ̆r pơma ôr re kơplah jơ ‘năr buăl oei pơdơh, kăl kơ oei hreh na mưh hrơ̆ng hreng đe ưh kơ ‘maih mơ̆ng. Minh nơ̆r pơtrŭt dah hơlen ‘noh kư̆m ‘lơ̆ng mălei nơ̆r pơma ‘bơ̆t jơ ưh kơ trŏ ngăl lăng ‘bônh kơ hlôh glăi phŏ sư truh tơ hil mĭl, tơhiong lê̆ ưh kơ yua kiơ mă lu bơ̆n hơpơi wă kơ đei.
Minh tơdrong nai dơ̆ng, bơngai sơkat ăn pŭn hiôk minh tơdrong ayơ sư đei jơhngơ̆m đon pơm tơ’bôh tơdah sư pơkuăng kơ iung đơ̆ng hrôih drôih pơma ôr rơ̆n re hơpơi ăn pŭn hiôk kơ rông ‘bôt kơnhăm wă tơ’bôh jơhngơ̆m bơngai ‘noh đe jô̆ khan bơngai ưh kơ tơpăt. Nơ̆r “gô jô̆ tơdrong noh” wă pơma lăng dôm tơdrong nơ̆r sơkat ăn pŭn hiôk noh ưh kơ phara kiơ kơ nơ̆r hiap pơtê̆, yua kơ tơdrong pơm noh kư̆m ‘lơ̆ng mălei lĕch đơ̆ng ưh kơ trŏ. Tơdrong pơm ‘lơ̆ng kăl kơ pơm lĕch đơ̆ng tơdrong gơh hơgei păng trŏ kơ jơ năr, tơdah ưh, gô ưh kơ đei yua. Adrin tơlĕch dôm tơdrong tơchĕng lu bơ̆n mă ưh kơ tơchĕng tơtăm kơ tơdrong ưh kơ lăp đon bơngai mơ̆ng na gô yua iŏk tơdrong ưh kơ đei yua. Lu bơ̆n kăl kơ pơgơ̆t, lăp ai, yua tơdrong gơh hơgei đơ̆ng Kră Yang ăn, dan bơ̆n lăm anih bơngai mơ̆ng, wă kơ băt pơma lu nơ̆r pơtrŭt mă trŏ năr, mă trŏ kơ anih bơngai oei jum dăr.
Jơ̆ kon pơlei Kră Yang, lu bơ̆n gô đei tơdrong pơlong lăng wă kơ bơ̆n kĕ năm hlôi wă kơ bơ̆n kĕ pơm kiơ̆ tơdrong bơ̆n gơh kĕ pơm, tơplih kơ tơdrong ‘noh, lu bơ̆n pơma sa, arih sa dih băl hăm tơdrong ‘mêm mơnat, hăm jơhngơ̆m hiôk ‘lơng tơpăt, păng gơh hơgei. Hăm tơdrong tơchĕng rŏng năp pơpôi nơ̆r pơma lu bơ̆n hăm jơ năr păng jơhngơ̆m mă trŏ lăp, lu bơ̆n gơh đei jing tơdrong tơ’bôh tơdrong ‘mêm păng mơnat ăn đĕch đơ̆ng Kră Yang ‘Bok Kei-Dei, đei hơtŭt pran dêh ‘bơm kơ tơdrong arih lu bơngai jum dăr. Apinh Kră Yang ăn nơ̆r pơma lu bơ̆n jing thoi trôm đing ba ăn pŭn hiôk đơ̆ng Kră Yang ba truh hăm bơngai nai. Athei ăn nơ̆r Kră Yang bơ̆jang păng chông ba đơ̆ng nơ̆r pơma, tơdrong lu bơ̆n pơm wă kơ đei tơdrong gơh hơgei đơ̆ng Kră Yang, ling lang pơma tơpăt, ‘mêm mơnat ăn đĕch đei tơplih păng dŏng pơklaih đơ̆ng Kră Yang Yêsu Krist jơ̆ ‘Bok Dŏng Pơklaih lu bơ̆n.
Ơ Kră Yang mă ‘mêm mơnat, apinh bơtho lu nhôn băt lăng gĭt păng pơjing dôm tơdrong tơ’bưh hăm rim bơngai lăm tơdrong gơh hơgei đơ̆ng Kră Yang, apinh Ih ăn kơ lu nhôn đei nơ̆r pơma lĕch đơ̆ng lăm jơhngơ̆m ‘mêm mơnat, tơpăt tơpă păng kơchăng lăm jơ năr păng nơ̆r pơma. Krao khan yua anăn Kră Yang Yêsu Krist, Amen.
Lu bơ̆n hăm mơn đêl thoi yơ lăm nơ̆r pơma mă ưh kơ trŏ? Lu bơ̆n hơmet tơplih thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 5
Kênh Youtube BHKTHN:
