Galati 6:1; Yôhan 8:1-11
“Ơ ‘nhŏng oh, dah iĕm ‘bôh lu ‘nhŏng oh bơ̆n bơngai lui pơm tơdrong yoch, na lu iĕm mă lui kơjăp, iĕm athei tơgŭm sư pơm mă ‘lơ̆ng hŏ. Iĕm tơgŭm sư, iĕm kư̆m athei ‘mêm mơnat kơ sư mơ̆n, ‘nĕ hil kơ sư păng iĕm athei kơchăng akâu iĕm kơdih mơ̆n, hli kơ yang Satan kư̆m wă pơhlŭ pơlung iĕm.” (Galati 6:1)
Nơ̆r jet tơchĕng pơwao:
– Bơngai đei đon lui đei jơhngơ̆m thoi yơ hăm bơngai ưh kơ pơrơ̆ng pơm yoch?
– Dah bơngai kiơ̆ kơ tơdrong khôi juăt gô đei jơhngơ̆m thoi yơ?
– Tơdrong kơnhăm kơ ‘bar ‘nu ‘nâu thoi yơ?
– Lu bơ̆n ‘bôh nhen bơngai ayơ?
Minh lăm lu tơdrong ba ăn pă đei hơmĕng gah bơhngol păng pơrăm lăm hnam akŭm noh wă khan tơchĕng ưh kơ đei tơpă gah hnam akŭm. Lơ bơngai lui weh ataih đơ̆ng tơdrong tơ’bưh hăm bơngai lui păng huŏng răm gah bơhngol kơplah wei rong tơchĕng đĕch ưh kơ đei tơpă gah Hnam akŭm tơ ala teh âu nhen thoi khul tơpôl ‘lơ̆ng tôm; hloh kơ pŭ iŏk tơ lăm hnam akŭm Kră Yang Yêsu pơjing khul tơpôl kơ lu bơngai yoch sơng iŏk tơdrong ‘mêm Kră Yang păng arih dah băt lăm tơdrong ‘mêm noh, mă khan kơplah tơ’bơ̆p tơdrong glăi păng tơdrong yoch dih băl.
Khul bơngai lui ling lang oei đei tơdrong ưh kơ ‘lơ̆ng păng kơnê̆, bơngai lui mă khan bơngai thoi yơ kư̆m oei pơm tơdrong yoch (I Yôhan 1:8,10), mă khan lei ră, kơplah lu bơngai kiơ̆ khôi juăt ling lang đei tơdrong wă chơ chă, chơ chă tơdrong glăi wă sek tơlang, pơjăm lu bơngai pơm yoch dah lu bơngai ưh kơ pơrơ̆ng pơm yoch păng đơ̆ng noh pơ-ư kơdih akâu, lei na bơngai “Đei Yang Bơhngol ‘Lơ̆ng” bơngai lui kơjăp, yak lăm Yang Bơhngol ‘Lơ̆ng wă kơ Yang Bơhngol ‘Lơ̆ng pơgơ̆r, păng tơ’bôh Plei Yang Bơhngol ‘Lơ̆ng (Galati 5:22), mă khan oei lăng ‘bôh tơdrong yoch bơngai nai, mă-lei wă kơ tơdrong ‘mêm păng tơdrong hơgei Yang Bơhngol ‘Lơ̆ng yua iŏk bơ̆n tơgŭm bơngai noh tơbral păng hơmet ming lăm tơdrong ‘mêm Kră Yang.
Kơplah lu khul Pharisi păng thây Bơtho Tơdrong Juăt đe Juđê jô̆ jâu minh ‘nu bơngai drŏ-kăn pơm đi, lu sư anhăk bơngai drŏ-kăn năm ba tơ Yêsu wă klơ̆m păng tơmo kiơ̆ kơ tơdrong juăt Môis, păng lu sư kư̆m wă chă đon wă jâu Yêsu wă kơ Yêsu hil ưh kơ trŏ (Yôhan 1:11), wă pơma khan tơdrong hlơp ôn đơ̆ng rŏng nhen lĕ pơm kiơ̆ khôi juăt păng pơm trŏ kiơ̆ tơdrong lui ‘nâu mă-lei ră tă kơ jơhngơ̆m păng lăm tơdrong tơchĕng ưh kơ tơpă, pơ ang, păng hơlĕnh dêh, lăm âu, Kră Yang Yêsu, đei Yang Bơhngol ‘Lơ̆ng jur oei hơdai păng sư (Luka 3:22; 4:1), đei tơ’bôh mă khan Kră Yang băt kơ năl bơngai drŏ-kăn âu pơm yoch (Yôhan 8:11), Mă-lei tơdrong Kră Yang lăng ưh kơ trŏ wă jô̆ jâu kơ sư ôh păng achăng tŭk sư mă-lei wă tơgŭm sư huay pă pơm yoch dơ̆ng, ‘nâu kư̆m dai jơhngơ̆m lu bơngai kiơ̆ Kră Yang kăl kơ đei hăm lu bơngai ưh kơ pơrơ̆ng pơm yoch (trong 1). ‘Bok bơtho R.C.Sproul đei pơma khan: “Tơdrong gĭt kăl hloh athei đei tơdrong hơ găt kơjung gah tơdrong pơma dơnuh lăm Hnam Akŭm, mă-lei lu tơdrong ‘nâu gô ba truh tơdrong anat tơpă, dah lu bơ̆n ưh kơ pơ’lơ̆ng dan tơdrong gĭt kơjung kơ tơdrong ‘mêm păng ‘mêm mơnat, apinh Kră Yang ăn kơ lu bơ̆n tơdrong hơgăt ‘lơ̆ng rơgoh, noh tơdrong trŏ, lei na pơm ăn kơ anih noh ưh kơ đei tơdrong ‘mêm lăm hnam akŭm?
Ơ Kră Yang, apinh Ih tơgŭm inh arih păng yua năm lăm tơdrong hơdah Ih păng ‘lơ̆ng rơgoh đơ̆ng Yang Bơhgol ‘Lơ̆ng, păng đơ̆ng noh gơh pơma dơnuh hăm bơngai nai lăm tơdrong ‘mêm gĭt kăl dêh mă inh đei yua iŏk đơ̆ng Ih,. krao khan yua anăn Kră Yang Yêsu Krist, Amen.
Lu bơ̆n ngăl pơma dơnuh hăm bơngai ưh kơ pơrơ̆ng pơm yoch kiơ̆ kơ khôi juăt dah tơdrong ‘mêm ăn đĕch păng ‘mêm mơnat?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Mika 1
Kênh Youtube BHKTHN:
