Pajlug 27:1-2
Nqe cim:
“Tsis txhob khav rau tagkis. Koj twb tsis paub hais tias thaum tseem tsis tau txog tagkis yuav muaj xwm dabtsi” (Pajlug 27:1)
Lus nug xav:
– Vim li cas tsis txhob khav rau tagkis?
– Vajntxwv Xalumoos qhia nws cov menyuam li cas txog kev txo hwjchim?
– Yuav ua li cas kom peb ua tau rau Vajtswv tau ntsejmuag, tsis yog ua rau peb tau qhuas?
Ua neej nyob tsis ruaj khov, yog li tsis txhob khav, tsis txhob rov qhuas tus kheej. Vajntxwv Xalumoos ceebtoom peb kom tsis txhob cia siab rau yus lub neej tom ntej. Tibneeg muaj nrim thiab tsis paub tom ntej yuav muaj xwm dabtsi los raug lub neej. Lo lus “tagkis” (nqe 1) muaj lub ntsiab hais txog tej kev cia siab nyob tom hauv ntej xws li ua tau txhua yam, npluanuj, muaj meejmom, muaj koob npe…, tiamsis tsis txhob khav vim tej ntawd tsis ruaj tsis khov. Yog qhov uas peb pom ntsoov tamsim no peb tuav tsis tau cia thiab tsis ruaj khov, yuav ua li cas hais tau tias tom ntej yuav ruaj khov tau. Kx William McKane sau hais tias, ib tug neeg txawj ntse “tsis tau hais lus lossis npaj txhua yam rau yus zoo li yus yog tus muaj cai txiav txim siab ua rau yus lub neej tom ntej”. Dua li, tus neeg ntse cia siab rau Vajtswv tus uas pub kev ua neej raws txojkev ncaj ncees, thiab rhuav tshem tibneeg tej kev npaj tsis raws li Nws txojkev tswj. Khav rau tagkis qhia tshwm lub siab khavtheeb thiab vamkhom tus kheej heev dua li uas ntseeg siab rau Vajtswv. Tus neeg txawj ntse tiag yog tus uas ua neej txhua hnub raws txojkev ntseeg, kev paub hais tias tagnrho txhua yam puavleej nyob hauv Vajtswv txojkev tswj saib.
Dhau qhov ntawd, Vajntxwv Xalumoos hais txog qhov txo hwjchim yog yam uas cheemtsum hais heev dua qhov khav tus kheej: “koj tsis txhob rov qhuas koj” (nqe 2). Thaum khav txog tej uas tus kheej ua tau, yuav yoojyim poob rau kev khavtheeb thiab hais lus tshaj qhov muaj tiag. Yuav tau nco ntsoov, Vajtswv ntxub tus uas khavtheeb (Phau Ntawv Nkauj 5:5), thiab lub tebchaws, tej neeg sawvdaws tsis nyiam lossis saib tsis taus tus neeg uas khavtheeb. Thaum yus rov khav tus kheej dhau, yuav ua rau yus poob hwv, vim txhua tus neeg yuav pom yus qhov kev ua neej tsis zoo li tej lus yus hais. Dua li ntawd, qhov uas tsa yus rau qhov chaw siab yuav ua rau yus nyob lub meejmom peevxwm ncav tsis cuag, ces yuav poob ntsejmuag thiab ua tsis tau hauv kev ua neej. Qhov zoo tshaj ces yog cia li ua rau lwm tus saib koj muaj nqis, vim lawv pom tej kev zoo uas koj ua, tsis txhob yog koj lub qhov ncauj hais kom lwm tus qhuas koj.
Vajtswv saib lub siab txo hwjchim muaj nqis. Vajtswv cov menyuam yuav tsum ua neej los ntawm kev txo hwjchim thiab cia siab rau tus Tswv tej lus qhia. Txhua yam kev npaj ntawm lub neej, cia npaj raws li lub tswvyim txawj ntse, muab txhua yam tso rau Vajtswv. Cia li ncaj ncees ua tus Tswv haujlwm, tsis nrhiav kev ua kom lwm tus pom thiab qhuas. Vajtswv yog tus uas tuav peb lub neej tom ntej thiab Nws yog tus uas yuav muab nqi zog rau cov neeg txo hwjchim.
Thov Vajtswv,
Vajtswv, thov Koj saib nyuam yaus lub siab. Thov Koj pub kom nyuam yaus muaj kev txawj ntse zeem paub qhov cuav hauv lub neej thiab tswj tuav nyuam yaus tsis poob rau tej vojhluas dag ntxias. Thov kom tej lus hais thiab ua neej ntawm nyuam yaus qhia tshwm kev txo hwjchim thiab ntseeg Vajtswv. Nyuam yaus tuav Tswv Yexus lub npe thov, Amees.
Peb hais lus tseeb, muaj kev hlub thiab txhim tsa zoo li cas?
Nyeem Vajluskub hauv peb lub xyoo: Tshwmsim 7
Kênh Youtube BHKTHN:
