Yausuas 3:6-17
Nqe cim:
“Tiamsis Yexus teb hais tias, tsis yog li ntawd, cov neeg uas hnov Vajtswv Txojlus thiab ua raws li Txojlus ntawd, thiaj yog cov uas tau koob hmoov!” (Lukas 11:28)
Lus nug xav:
– Tus Tswv hais li cas rau Yausuas?
– Yausuas hais rau cov pejxeem kom yuav tsum ua dabtsi ua ntej thaum hla dej mus? Nqi zog yog dabtsi?
– Peb siv zaj kawm no rau peb lub neej nrog tus Tswv mus zoo li cas?
Ua ntej hla dej Yauladees mus rau sab tid, tus Tswv hais rau Yausuas, Nws yuav nrog Yausuas ib yam li uas Nws twb nrog Mauxes. Tus Tswv hais kom Yausuas samhwm cov povthawj thaum mus txog ntawm ntug dej, lawv yuav tsum sawv hauv dej kwv lub Phijxab mus txog thaum tus Tswv qhia qhov tshiab rau lawv ua.
Yausuas tso cov pejxeem txav mus ze thiab mloog tus Tswv tej lus qhia. Yausuas hais tias tus Tswv yuav coj lawv hla tus dej Yauladees, thiab lub Phijxab pivtxog qhov uas tus Tswv nrog lawv nyob thiab mus ua ntej lawv. Vim qhov no lawv yuav paub tias Vajtswv yog tus uas nrog nraim lawv thiab Nws yuav caum lwm haivneeg khiav tawm hauv lub tebchaws coglus tseg mus. Lawv yuav tau xaiv kaum ob leeg sawvcev cov xeem Yixalayees. Yausuas kuj qhia paub thaum cov povthawj kwv lub Phijxab tso kotaw hauv dej ces dej yuav faib ua ob sab thiab cov pejxeem mus dhau. Cov pejxeem thiaj ua raws txhua yam uas tus Tswv hais, rhuav tsevntaub thiab hla dej raws cov povthawj kwv lub Phijxab mus. Lawv mus raws li kev mloog lus txawm yog lub caij no dej tabtom loj puv ntug. Tus Tswv haivneeg mus raws li kev ntseeg vim lawv ntseeg hais tias Vajtswv yuav nrog nraim lawv, coj lawv txoj hau kev thiab pub kom lawv muaj yeej. Thaum cov povthawj txhais taw rhais ruam mus ntawm txojkev ntseeg thiab kev mloog lus mus hauv dej, kiag lub sijhawm ntawd cov ntshua dej ntws los txawm nres thiab nyob ua ib pawg. Cov pejxeem hla dej mus kev qhua qhawv, cov povthawj sawv kev qhuav qhawv kwv lub Phijxab.
Cov neeg Yixalayees pom tej txujci tseemceeb uas tus Tswv ua vim lawv mloog lus. Ua ntej yuav hla dej mus, lawv twb “txav mus ze thiab mloog” tus Tswv tej lus qhia. Lawv tsis ua raws li siab nyiam, tsis nug lossis tsis ua xyem xyav li, tsuas paub ntseeg thiab ua li Vajtswv hais xwb. Qhov no yog tej txujci tseemceeb ua tus Tswv ua thiab lawv tseem yuav pom tom ntej yog tias lawv mloog tus Tswv lus.
Yog tus ntseeg Yexus, peb kuj yuav tsum muab qhov kev ntseeg thiab kev mloog Vajtswv lus tso ua ntej, txawm yog qhov yuav nyuaj los xij. Peb yuav raug kev sim siab kom ua tej yam yus pom heev dua nyiam ua li Vajtswv nyiam. Peb kuj yuav nug lossis tsis kam ua li tus Tswv qhia, tsis kam mus ntawm txojkev ntseeg, tsis kam tso tseg tej uas yus muaj rhais ruam nqis hauv dej. Thov Vajtswv pub rau peb kawm tau cov Yixalayees thiab cov povthawj thaud tus qauv ntseeg thiab ua li tus Tswv hais, kam “txav mus ze thiab mloog” tus Tswv qhia kom peb paub Nws nplooj siab thiab ua raws li Nws qhia, yog ua li peb yuav pom tej txujci tseemceeb uas tus Tswv ua nyob hauv peb kev ua neej.
Thov Vajtswv,
Vajtswv, thov Koj qhia kom nyuam yaus ua neeg mloog lus txhua lub tsamthawj. Thov pab kom nyuam yaus niaj hnub txav mus ze tus Tswv thiab mloog Nws lus kom nyuam yaus pom tej txujci tseemceeb, tus Tswv nrog, kev coj thiab pab cawm hauv kev ua neej. Nyuam yaus tuav Tswv Yexus lub npe thov, Amees.
Peb pom yus puas tau mloog Vajtswv lus hauv txhua kis kev ua neej lawm tau?
Nyeem Vajluskub hauv peb lub xyoo: Tshwmsim 6
Kênh Youtube BHKTHN:
