I Pêtrôs 4:12-14
“Ơ lu ‘nhŏng oh mă inh ‘mêm kơeng, iĕm đei boih tơdrong gleh truh wă pơlong lăng tơdrong lui iĕm, mă iĕm ‘nĕ kơ lăng hlĭch tơdrong kiơ hŏ, yua kơ tơdrong noh gô truh rim ‘nu kơ lu bơngai lui.”
(I Pêtrôs 4:12)
Nơ̆r jet tơchĕng pơwao:
– Jing bơngai lui kơ ‘Bok Krist, bơ̆n ‘nĕ kơ lăng hlĭch gah tơdrong kiơ? Yua kơ kiơ?
– Pơm thoi yơ wă kơ gơh chơt hiôk lăm tơdrong pơlong lăng?
– Bơ̆n kăl kơ hơmet thoi yơ wă huay kơ lăng hlĭch kơplah tơ’bưh hăm tơdrong pơlong lăng?
‘Bok Pêtrôs jơ̆ bơngai mă đêl ưh kơ lăp đon kơ ‘Bok Krist gô chu lôch tơ ‘long pơglang (Mathiơ 16:21-22). Mălei đơ̆ng rŏng kơ Kră Yang iung arih dơ̆ng, sư đei tơplih tôm tơdrong, păng dang ei sư pơ̆n nuih bơtho kơ lu bơngai lui Juđê hăm bơngai tơmoi oei arih jơ̆p jang kơ tơring thoi âu: “Ơ lu ‘nhŏng oh mă inh ‘mêm kơeng, iĕm đei boih tơdrong gleh truh wă pơlong lăng tơdrong lui iĕm, mă iĕm ‘nĕ kơ lăng hlĭch tơdrong kiơ hŏ, yua kơ tơdrong noh gô truh rim ‘nu kơ lu bơngai lui.” (trong 12). Kon pơlei ưh kơ gơh weh wer đơ̆ng tơdrong đe pơm kơnê̆, kơlih kơ thoi noh ‘nĕ kơ lăng hlĭch kơplah tơ’bưh hăm ŭnh tơdrong pơlong lăng, păng ‘nĕ lăng tơdrong ‘noh thoi hmă đĕch. Yua kơ ‘noh bơih trong Kră Yang wă kơ bơ̆n gơh đei păng hlôi mơn tơdrong pơmat hăm Kră Yang (trong 3). Ưh kơ sĭ lăng hlĭch đĕch ôh, na bơngai mă lui kơ ‘Bok Krist athei “iŏk tơdrong chơt hiôk đĕch” wă khan chơt hiôk tơpă!
Mălei wă kơ gơh chơt hiôk lăm tơdrong pơlong lăng, Bơngai Lui kăl kơ băt. Mă mônh, tơdrong chu iŏk pơmat ‘noh trong wă pơhrăm pơtơ̆p đon lui “Thoi noh na truh bơ̆n tơ’bơ̆p Yêsu Krist mơsêh mơyang jur ning mônh bơ̆n gô hiôk chơt hăm Sư” (trong 13). Mă ‘bar, chu pơmat yua kơ Kră Yang ‘noh đei pŭn hiôk, Kră Yang kư̆m đei khan kơplah Sư bơtho tơ kông sơ̆, “Hiôk bĕ lu iĕm, mă đe pơjăm-pơjuă iĕm, pơm kơnê̆ kơ iĕm, dah bâu roi ‘bơm iĕm tôm tơdrong yua kơ iĕm lui kơ Inh.” (Mathiơ 5:11). Mă pêng, Kră Yang ưh kơ lê̆ Bơngai Lui chu pơmat kơdrô̆ ôh, kơplah đĭ jơhngơ̆m tơnăp hăm Sư, mălei đei Yang Bơhngol ‘Lơ̆ng oei hơdai păng thim jơhngơ̆m pran, “Iĕm hiôk yua kơ iĕm đei Yang Bơhngol ‘lơ̆ng mơsêh mơyang đơ̆ng ‘Bok Kei-Dei jur oei hăm iĕm bơih” (trong 14).
Kră Yang ưh kơ đei pơkă khan bơngai mă kiơ̆ Sư gô ling lang tơproh ‘lơ̆ng, hơđơ̆ng ôh. Mălei Sư khan “Ơ lu ‘nhŏng oh mă inh ‘mêm kơeng, iĕm đei boih tơdrong gleh truh wă pơlong lăng tơdrong lui iĕm, mă iĕm ‘nĕ kơ lăng hlĭch tơdrong kiơ hŏ, yua kơ tơdrong noh gô truh rim ‘nu kơ lu bơngai lui.” (trong 12). Thoi noh, Bơngai Lui kăl kơ ling lang hơmet tơ’bưh hăm ŭnh tơdrong pơlong lăng hăm jơhngơ̆m ưh kơ lăng hlĭch kiơ ôh, mălei lăng tơdrong noh bơih jơ năr wă kơ đon lui lăm Kră Yang gơh pơhrăm pơtơ̆p wă kơ wơ̆ ‘lŏ, athei chơt hiôk bĕ yua kơ bơ̆n chơt hiôk gơh iŏk pơmat yua kơ Kră Yang, đơ̆ng noh, bơ̆n băt Kră Yang Yêsu đei chu pơmat thoi yơ yua kơ bơ̆n. Tơdrong chu pơmat yua kơ Anăn Kră Yang gô đei tơdrong pŭn hiôk thoi nơ̆r Sư pơkă, dah bơ̆n kư̆ kơjăp ưh kơ sơngah achăng tơdrong lui. Rŏ lăng lu bơngai lăm hnam dơnŏ, buăl juăt ataih kơ bơ̆n kơplah bơ̆n tơ’bơ̆p tơdrong pơmat, tơdrong pơlong truh. Mălei Yang
Bơhngol ‘lơ̆ng ling lang oei hơdai hăm bơ̆n lăm dôm tơdrong truh tih krưp noh. ‘Nĕ kơ lăng hlĭch kư̆ kơjăp yak năm đĕch.
Ơ Kră Yang, jơ̆ ‘Bă mă ‘mêm! Apinh nơ̆r Ih năr ‘nâu chih răk lăm jơhngơ̆m inh, wă kơ inh ling lang đei jơhngơ̆m krăng wă tơ’bơ̆p tơ’bưh hăm dôm tơdrong pơlong lăng ayơ. Apinh Ih bơwei păng thim jơhgơ̆m pran wă kơ inh gơh kĕ hlôi, păng rai pran hloh lăm đon lui. Krao khan yua anăn Kră Yang Yêsu Krist, Amen.
Lu bơ̆n hăm lăng hlĭch ưh kơplah tơ’bưh hăm ŭnh tơdrong pơlong lăng?
Đŏk Sơ̆p Hla bơar ‘Bok Kei-Dei lăm pêng sơnăm: Galati 1
Kênh Youtube BHKTHN:
