Malakaus 10:35-45
Nqe cim:
“Tiamsis nej tsis txhob ua li ntawd; nej cov yog leejtwg xav ua tus hlob, tus ntawd yuav tsum ua sawvdaws tus tubtxib, thiab nej cov yog leejtwg xav ua tus thawj, tus ntawd yuav tsum ua sawvdaws qhev.” (Malakaus 10:43-44)
Lus nug xav:
– Ob tug timthawj tuaj thov tus Tswv txog yam dabtsi?
– Tshuav kaum leej tomqab ho xav li cas?
– Tus Tswv qhia li cas txog kev ua haujlwm saum Tebchaws Ceeb Tsheej?
– Peb siv zaj kawm no rau peb lubneej li cas?
Raws tus Tswv qab tau peb lub xyoos lawm, nimno twb tau hnov tus Tswv hais tias Nws yuav raug kev txomnyem, raug tua thiab sawv rov los, tiamsis cov thwjtim tseem tsis tau nkag siab txhij txhua txog Vajtswv lub homphiaj dhau ntawm Tswv Yexus tes haujlwm. Tus Tswv hais ua ntej txog tus ntoo khaublig tiamsis hauv cov thwjtim lub hlwb tsuas xav txog lub zwmtxwv hauv ntiajteb no xwb. Vim li ntawd, muaj ob tug Timthawj uas yog Yakaunpaus thiab Yauhas uas nrawm dua lwm tus thiaj tuaj thov hais tias: “Thaum koj ua vajntxwv zaum saum koj lub zwmtxwv uas ci ntsa iab, thov koj cia wb ib tug nyob ntawm koj sab xis, ib tug nyob ntawm koj sab laug” (nqe 37). Qhov tseeb tiag tsis yog tsuas muaj ob tug timthawj xav ntawd li xwb, tiamsis tag nrho 12 leej yeej muaj lub siab xav ntsoov li ntawd thiab. Yog li ntawd, thaum pom ob tug ncauj nrawm mus txeeb ob lub chaw siab tshajplaws hauv “Tswv Yexus lub tebchaws” lawm, ces 10 leej tomqab txawm chim kawg nkaus li (nqe 41)!
Khaws lub sijhawm ntawd, tus Tswv thiaj li qhia cov timthawj zaj kawm txog kev ua haujlwm tiag hauv Tebchaws Ceeb Tsheej. Nws hais rau lawv hais tias txhob kawm xyaum lwm haivneeg uas “cov thawj muaj hwjchim yuam kom cov pejxeem ua raws li lawv hais”, lawv nyob saum toj noj chaw siab, siv “hwjchim kav pejxeem”. Tiamsis nyob hauv tus Tswv, leejtwg xav ua loj yuav tsum “ua tus pab”; leejtwg xav ua thawj yuav tsum “ua sawvdaws tus tubtxib” (nqe 42-44). Tus thawjcoj hauv Tebchaws Ceeb Tsheej txawv deb ntawm neeg ntiajteb. Tus thawjcoj tsis siv hwjchim los txib neeg, quabyuam neeg tiamsis txo hwjchim ua haujlwm los ntawm lub siab zoo li “tubtxib”; tsis taij kom luag qhuas thiab saib hlob yus tiamsis khoov mus ntxuav txhua tus kotaw los ntawm lub siab zoo li “tus qhev”. Tus Tswv tsis yog tsuas hais ntawm ncauj xwb tiamsis Nws twb ua qauv tseg lawm. Nws hais tias: “Txawm yog Neeg Leej Tub los, nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (nqe 45).
Zaj kawm “ua sawvdaws qhev” uas tus Tswv qhia ua ntej Nws raug kev txomnyem yog ib zaj kawm muaj nqis kawg nkaus rau Vajtswv cov menyuam txhua tus, tsis yog tsuas qhia rau cov thawjcoj hauv Pawg Ntseeg xwb tiamsis tseem qhia rau cov thawjcoj hauv tej pab, tej pawg, tej tsev neeg thiab. Txhob cia leejtwg kawm raws neeg ntiajteb uas nrhiav meejmom lossis koobmeej rau yus tus kheej tiamsis cia li fij yus lub neej ua haujlwm kawg siab kawg ntsws pab lwm tus. Yog xav ua tau li ntawd, peb txhua tus tsis txhob coj neeg ntiajteb cov thawjcoj tej kev xav los rau hauv Vajtswv Pawg Ntseeg, tiamsis yuav tsum tso yus tus kheej kev muab hlob tseg raws li Vajtswv Txojlus qhia hais tias: “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug” (Filipis 2:3). Thov Vajtswv Txojlus qhuab ntuas peb muaj lubneej ua haujlwm kom yog nyob hauv lub caij nco txog tus Tswv Txomnyem thiab Sawv rov los xyoo no.
Thov Vajtswv,
Tus Tswv, thov zam txim rau nyuam yaus vim nyuam yaus tseem muaj lub siab xav ua thawj raws li neeg ntiajteb. Thov pub rau nyuam yaus kawm raws Koj tus qauv, txo hwjchim thiab kawg siab ntsws ua haujlwm pab lwm tus zoo li ib tug tub qhe rau txhua tus uas Koj muab tso rau hauv nyuam yaus lubneej. Nyuam yaus tuav Tswv Yexus Khetos lub npe thov, Amees.
Peb puas txaus siab “ua sawvdaws qhev” lawm tau?
Nyeem Vajluskub hauv peb lub xyoos: Exekees 34
Kênh Youtube BHKTHN:
