I Petus 4:10-11
Nqe cim:
“Vajtswv twb pub koob hmoov rau nej txhua tus lawm, yog li ntawd nej yuav tsum siv tej koob hmoov uas nej tau ntawd kom muaj nqis rau lwm tus” (I Petus 4:10)
Lus nug xav:
– Tus Tswv tus neeg saib xyuas tej koob hmoov Nws pub ua dabtsi?
– Tus neeg ntawd cheemtsum qhia tawm lub siab ncaj ncees, lub siab ua haujlwm thiab lub homphiaj li cas?
– Peb ua tus neeg saib xyuas ncaj ncees rau tus Tswv zoo li cas?
Cov ntseeg Yexus uas tau Vajtswv muab koob hmoov rau, txhua tus puavleej tau. Vajtswv pub koob hmoov tsis yog muab khaws cia rau yus lossis siv raws li yus nyiam. Tiamsis Vajtswv Txojlus qhia tias, “nej yuav tsum siv tej koob hmoov uas nej tau ntawd kom muaj nqis rau lwm tus” (nqe 10). Txhua tus ntseeg Yexus cheemtsum Vaj Ntsujplig qhia thiab coj kom ua tau cov ntseeg loj hlob, saib pom tej koob hmoov Vajtswv pub yog pab lwm tus, ib leeg txhim kho ib leeg, koomtes nthuav dav Vajtswv lub Tebchaws raws li qhov Vajtswv muab rau peb.
Tus neeg uas saib xyuas tus Tswv tej koob hmoov yuav tsum muaj lub siab ncaj ncees, ua tas siab, tas zog hauv txhua tes haujlwm tus Tswv muab. Vajtswv pub nyias muaj nyias ib txoj koob hmoov sib txawv. Ntawm Vajtswv xubntiag, tus neeg uas qhia Vajtswv Txojlus kuj tseemceeb zoo ib yam li ua haujlwm pab lwm tus. Tus Tswv tsis ntaus nqis tes haujlwm loj lossis me, tej haujlwm luag pom lossis ntsiag to, Nws tsuas ntaus nqis tus neeg uas lub siab ncaj ncees lossis tsis ncaj xwb. Yog li ntawd, thaum pib ua txhua yam haujlwm ces yuav tsum vamkhom tus Tswv lub zog ua kom tas siab, tas zog: “Tus uas qhia Vajtswv txojlus, nws yuav tsum qhia; tus uas pab ua haulwm, nws yuav tsum siv nws lub dag lub zog uas Vajtswv pub rau nws” (nqe 11).
Tus neeg saib xyuas ncaj ncees rau tus Tswv tsis ua txog tog, tsis lam tau lam ua, ua kom tas cai, zam qhov hnyav ua qhov sib. Tiamsis pib ua haujlwm los ntawm kev thov Vajtswv, thov tus Tswv pub tswvyim kom kos tau zeemmuag thiab ua tib zoo npaj kom ua tiav tes haujlwm tus muab rau ua. Nco ntsoov tias tus Tswv yog tus uas saib xyuas thiab ntaus nqis txhua tes haujlwm peb ua tsis yog tibneeg. Thiab Vajtswv lub homphiaj yog xav kom tus neeg saib xyuas ncaj ncees yog tej lus qhia, txhua tus tes haujlwm tsis yog khav tus kheej tiamsis puavleej yog coj mus rau tus Tswv“nej cov uas ntseeg Yexus Khetos ua li ntawd, nej yuav ua rau Vajtswv tau ntsejmuag” (nqe 11).
Tus Tswv pub koob hmoov rau peb ua Nws tes haujlwm, ib leeg pab ib leeg kom kev ntseeg loj hlob, txhim tsa Pawg Ntseeg vammeej nyob hauv ntiajteb no, thiab ua txhua yam yog ua rau tus Tswv tau ntsejmuag. Thov tsis txhob piv qhov yeej swb tiamsis cia li thov tus Tswv pub rau peb ua tau tus neeg saib xyuas ncaj ncees rau tus Tswv ntawm tes haujlwm yau dua. Niaj hnub qhia tawm lub siab xav zoo, lub zog ntawm tus Tswv rau kev ua haujlwm, thiab thaum ua haujlwm los rau siab ntso ua ib yam li yog ua rau tus Tswv tsis yog ua rau neeg (Kaulauxais 3:23). Dua li ntawd, nco ntsoov tus Tswv tej lus qhia hauv tsab ntawv Filipis 4:13:“Kuv muaj cuabkav ua tau txhua yam los ntawm Khetos tus uas txhawb kuv lub zog”
Thov Vajtswv,
Vajtswv, nyuam yaus ua Koj tsaug vim Koj pub tej koob hmoov sab ntsujplig. Thov Vaj Ntsujplig pab kom nyuam yaus ua tiav txhua tes haujlwm Koj muab thiaj ua rau Koj tau ntsejmuag dhau los ntawm nyuam yaus kev ua Koj tes haujlwm ncaj ncees. Nyuam yaus tuav Tswv Yexus lub npe thov, Amees.
Peb puas tas siab ua haujlwm zoo ib yam li tus neeg saib xyuas ncaj ncees rau tus Tswv lawm tau?
Nyeem Vajluskub hauv peb lub xyoos: Exekees 19
Kênh Youtube BHKTHN:
