Klei Aê Diê Blŭ: Klei Mphŭn Dơ̆ng 4:1-7
Êlan kliăng: “Tơdah ih ngă jăk, amâo djŏ hĕ kâo srăng tŭ ih? Tơdah ih amâo ngă jăk ôh, klei soh dôk kăp ti ƀăng bhă čiăng mă ih, ƀiădah brei ih dưi hŏng ñu.” (Klei Mphŭn Dơ̆ng 4:7)
Klei êmuh ksiêm mĭn: Ya ngă Aê Diê mă mnơ̆ng Y-Aƀel myơr ƀiădah hngah kơ mnơ̆ng Y-Kain myơr? Ya klei drei hriăm mơ̆ng klei Aê Diê mtă hưn brei răng?
Leh Aê Diê suôt mơ̆ng war djam Êđen jăk mơak, Y-Ađam tlăng ksul lăn, mă bruă suăi êmăn čiăng mâo mnơ̆ng ƀơ̆ng huă. Aê Diê brei kơ diñu dua čô anak jing Y-Kain leh anăn Y-Aƀel. Jih dua hriê kơ prŏng, lŏ dơ̆ng mă bruă ama diñu, Y-Kain pla mjing bi Y-Aƀel mgăt biăp. Truh wưng, diñu myơr mơ̆ng kơ Aê Diê mơ̆ng ya mnơ̆ng diñu mâo: Y-Kain myơr boh mơ̆ng lăn bi Y-Aƀel myơr phung êđai biăp mđai tal êlâo leh anăn prăi digơ̆. Khua Yang tŭ Y-Aƀel leh anăn mnơ̆ng ñu myơr ƀiădah Khua Yang amâo tŭ ôh Y-Kain leh anăn mnơ̆ng ñu myơr (êlan 3-5).
Klei Aê Diê Blŭ amâo lač ôh mta phŭn ƀiădah lač kơ ai tiê grăp čô tơdah mprăp mnơ̆ng myơr. Hlăk êjai Y-Kain myơr boh mơ̆ng lăn, amâo mâo klei hrŏng ruah ôh, bi Y-Aƀel myơr “myơr phung êđai biăp mđai tal êlâo leh anăn prăi digơ̆” (êlan 4). Mnơ̆ng Y-Aƀel myơr mâo klei ruah klă mngač, anăn jing kdrêč jăk hĭn hlăm êpul, lač kơ ai tiê mđing kơ Khua Yang. Pô čih hră Hêbrơ mblang bruă Y-Aƀel ngă jing bruă ngă mơ̆ng klei đăo: “Hŏng klei đăo Y-Aƀel myơr kơ Aê Diê mnơ̆ng ngă yang jăk hĭn kơ Y-Kain. Hŏng klei đăo anăn Aê Diê tŭ ñu jing kpă” (Hêbrơ11:4).
Êngao anăn, kyua Khua Yang “Ƀiădah Khua Yang amâo tŭ ôh Y-Kain leh anăn mnơ̆ng ñu myơr. Y-Kain ăl snăk leh anăn ƀô̆ mta ñu ktrŏ” (êlan 5). Y-Kain bi êdah leh knuih sĭt ñu, ăl leh anăn mâo ai tiê phĭ hŏng Aê Diê kyua amâo dlăng ôh kơ ñu. Aê Diê ktrâo leh klei soh hlăm klei hdĭp ñu: “Si ngă ih ăl leh anăn ƀô̆ mta ih ktrŏ? Tơdah ih ngă jăk, amâo djŏ hĕ kâo srăng tŭ ih?” (êlan 6-7a). Aê Diê brei Y-Kain ƀuh knuih huĭ hyưt ñu ngă leh anăn êdu êun mblang klei ñu ngă amâo djŏ jing bruă jăk ôh. Aê Diê ăt ktrâo êlan kơ Y-Kain kmhal klei soh, bi mlih, leh anăn hưn brei răng kơ klei soh dôk kăp. Brei ñu mâo bruă klam bi kdơ̆ng, mkhư̆ klei soh, đăm brei ñu dưi hĭn ôh: “Tơdah ih amâo ngă jăk ôh, klei soh dôk kăp ti ƀăng bhă čiăng mă ih, ƀiădah brei ih dưi hŏng ñu” (êlan 7b).
Phung roh drei jing yang jhat ăt dôk kăp leh anăn yua lu hdră êlan mplư drei. Ƀiădah klei mplư truh snăn drei amâo ngă soh ôh. Klei yuôm bhăn hĭn jing brei drei bi mklă bruă si srăng ngă ti anăp klei mplư. Tơdah drei amâo čŏng mkhư̆, bi kdơ̆ng, snăn klei soh srăng dưi. Khua Yang čiăng kơ drei brei “kriê dlăng” klei mplư hrô kơ brei ñu kriê dlăng pô. Brei drei dưi ngă klei anăn hŏng klei nao giăm Aê Diê, knang kơ klei pap Ñu. Aê Diê ƀuăn Ñu jing Pô Sĭt suôr, “leh anăn Ñu amâo brei ôh klei mplư truh kơ diih êgao hĭn kơ ai ktang diih” (I Kôrantô 10:13).
Drei dôk kriê dlăng klei mplư čiăng đăm ngă soh, amâodah dôk brei klei soh kriê dlăng pô?
Wah lač: Ơ Khua Yang, akâo kơ Ih đru kâo thâo luă gŭ thâo kral klei soh pô. Tơdah klei mplư truh kơ kâo, brei kâo thâo knang kơ klei pap Ih leh anăn bi kdơ̆ng. Akâo kơ Ih đru ai tiê kâo leh anăn klei hdĭp kâo mpŭ nanao kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
