Chivkeeb 4:1-7
Nqe cim:
“Tiamsis yog koj ua phem, txojkev txhaum zov rawv ntawm koj qhovrooj yuav tom koj. Txojkev txhaum xav ua tus kav koj, tiamsis koj yuav tsum ua kom koj kovyeej nws.” (Chivkeeb 4:7)
Lus nug xav:
– Vim licas Vajtswv txais yuav Anpees cov khoom fij tiamsis ho tsis txais yuav Ka-ees cov khoom fij?
– Peb kawm tau dabtsi dhau ntawm tus Tswv lo lus ceebtoom?
Tomqab uas raug ntiab tawm hauv lub Vaj Edees koob hmoov, Adas yuav tsum tau ua teb, ua haujlwm hnyav thiaj li muaj mov noj. Vajtswv pub rau nkawd muaj ob tug tub uas yog Ka-ees thiab Anpees. Nkawd loj hlob tuaj, kuj khaws ua niam txiv tes haujlwm, Anpees yog ib tug tub yug yaj, tiamsis Ka-ees yog ib tug tub ua qoobloo. Txog lub caij, nkawd muab qhov txhia chaw uas nkawd muaj los fij rau tus Tswv: Ka-ees muab tej qoobloo coj tuaj fij, tiamsis Anpees ho muab tsiaj tua fij. Vajtswv txaus siab rau Anpees cov khoom fij, tiamsis Nws tsis quavntsej txog Ka-ees cov (nqe 3-5).
Vajluskub tsis hais meej txog keebtiv tsis txais, tiamsis ho piav txog nplooj siab ntawm tus neeg fij khoom. Ka-ees muab qoob loo coj tuaj fij xwb, nws tsis xaiv li, tiamsis Anpees ho muab “muab nws tej menyuam yaj uas yog thawj tug, coj tuaj tua, thiab nws xaiv tej nqaij zoo fij rau Vajtswv” (nqe 4). Anpees cov khoom fij tau muab xaiv zoo heev, ntawd yog tus uas zoo tshajplaws hauv pab yaj, qhia tau tias nws muaj lub siab ncaj ncees hwm tus Tswv. Tus sau Henplais tau piav txog Anpees txoj haujlwm ntawd yog los ntawm txojkev ntseeg: “Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees, rau qhov tej uas Anpees muab fij rau Vajtswv ntawd haum Vajtswv siab” (Henplais 11:4).
Tsis tas li ntawd xwb, vim “Ka-ees thiab nws tej khoom fij tsis haum Vajtswv siab. Yog li ntawd, Ka-ees thiaj chim thiab ua ntsejmuag npautaws vog” (nqe 5). Ka-ees tau ua qhia tshwm nws tus cwjpwm tseeb, uas yog chim thiab iab siab rau Vajtswv vim tsis quavntsej txog nws. Vajtswv tau taw qhia qhov yuamkev hauv nws lubneej hais tias: “Vim li cas koj yuav chim ua luaj li? Vim li cas koj ua ntsejmuag npautaws vog li ko? Yog koj yeej ua qhov zoo, kuv yuav txais koj tej khoom fij” (nqe 6-7a). Vajtswv qhia rau Ka-ees pom nws tus kheej lub siab thiab qhia hais tias qhov uas nws ua li ntawd tsis yog qhov zoo. Vajtswv kuj taw qhia txojkev pab kom Ka-ees lees kev txhaum, hloov siab, thiab ceebtoom txog txojkev txhaum tabtom nyob tos ntawm nws qhov rooj. Nws yuav tsum tawmtsam, tswj tej kev txhaum, txhob cia kev txhaum kov yeej: “Tiamsis yog koj ua phem, txojkev txhaum zov rawv ntawm koj qhovrooj yuav tom koj. Txojkev txhaum xav ua tus kav koj, tiamsis koj yuav tsum ua kom koj kovyeej nws” (nqe 7b).
Peb tus yeebncuab yog dab Ntxwjnyoog uas tseem tabtom nyob tos rawv thiab nrhiav ntau txojkev los ntxias peb. Tiamsis ntsib kev dagntxias tsis tau txhais hais tias peb yuav tsum ua txhaum. Qhov tseemceeb yog peb yuav txiav txim siab ua li cas thaum ntsib kev ntxeev ntxias. Yog peb tsis cim civ tiv thaiv, tawmtsam, ces kev txhaum yuav kovyeej peb. Vajtswv xav kom peb yuav tsum “kav” txojkev txhaum, txhob cia tej ntawd kav peb. Peb muaj peevxwm ua tau li ntawd los ntawm qhov uas tig mus cuag tus Tswv, cia siab rau Nws txojkev hlub tshua. Vajtswv yog tus Ncaj ncees, Nws coglus tseg hais tias: “tiamsis thaum raug kev sim siab nws yuav qheb kev rau nej dim kom nej thiaj li thev taus” (I Kauleethaus 10:13).
Thov Vajtswv,
Tus Tswv, thov pab nyuam yaus kom paub txo hwjchim zeem paub tus kheej tej kev txhaum. Thaum ntsib kev dagntxias, thov pub rau nyuam yaus paub cia siab rau Koj txojkev hlub tshua thiab tawm tsam mus txog qhov kawg. Thov kom nyuam yaus lub siab thiab lubneej niaj hnub txhawb nqa Koj. Nyuam yaus tuav Yexus Khetos lub npe thov, Amees.
Peb puas tabtom tswj kav tej kev ntxias kom tsis txhob ua txhaum, lossis peb tabtom cia kev txhaum tswj kav peb?
Nyeem Vajluskub hauv peb xyoos: I Kauleethaus 12
Kênh Youtube BHKTHN:
