Klei Aê Diê Blŭ: II Klei Yăl Dliê 36:11-21
Êlan kliăng: “Ƀiădah diñu mưč nanao kơ phung mnuih Aê Diê tiŏ nao, bi êmut kơ klei Gơ̆ blŭ, djă djik djak kơ phung khua pô hưn êlâo Gơ̆, tơl klei Yêhôwa ngêñ đĭ lar kơ phung ƀuôn sang Gơ̆, tơl amâo dưi lŏ bi hlao ôh” (II Klei Yăl Dliê 36:16)
Klei êmuh ksiêm mĭn: Si mnuih Mtao Sêđêkia jing leh anăn ya klei soh ñu ngă leh? Ya jing boh jhat tơdah jih sa boh čar bi khăng ai tiê amâo čiăng kmhal kơ klei soh ôh? Ya ngă ênưih snăk drei bi êmut kơ klei Aê Diê mtă brei răng?
Mtao Sêđêkia jing anak êkei Mtao Jôsia pô huĭ mpŭ kơ Aê Diê. Y-Nêƀukanêtsar mtao čar Ƀaƀilôn mjing ñu mtao leh anăn mgô̆ ñu kat asei hŏng Aê Diê srăng dôk sĭt suôr hŏng čar Ƀaƀilôn jih hruê ñu dôk hdĭp. Jing msĕ si tlâo čô mtao jhat ƀai êlâo kơ ñu, Mtao Sêđêkia ăt “ngă klei jhat” mơh (êlan 12). Lu blư̆ Khua pô hưn êlâo Y-Yêrêmi iêo kwưh kơ Mtao Sêđêkia brei ñu lŏ wĭt kơ Aê Diê, đăm lŏ kkuh mpŭ kơ rup yang ôh, msĕ mơh, ñu mtrŭt Y-Sêđêkia dôk sĭt suôr hŏng čar Ƀaƀilôn kyuadah anăn jing klei Aê Diê čiăng. Ƀiădah ñu amâo bi luă gŭ ñu pô ôh ti anăp Khua pô hưn êlâo Y-Yêrêmi, pô blŭ klei kbiă mơ̆ng ƀăng êgei Aê Diê. Ñu hngah kơ klei kmhal kơ klei soh, “ñu ngă khăng kŏ leh anăn bi khăng ai tiê ñu amâo čiăng wir phă Yêhôwa Aê Diê Israel ôh.” (êlan 13). Jih jang phung knơ̆ng khua ngă yang leh anăn phung ƀuôn sang msĕ mơh “tui hlue jih klei jhat Yêhôwa bi êmut phung găp djuê mkăn ngă leh” (êlan 14), tơl diñu bi čhŏ sang Yêhôwa hŏng klei diñu kkuh mpŭ kơ rup yang.
Jih jang klei soh mtao, phung khua ngă yang leh anăn phung ƀuôn sang arăng răk leh tăm đruê̆ brei ƀuh klei jhat ƀai diñu amâo lŏ dưi bi hlao ôh. Wăt snăn dưn mơh, Aê Diê ăt khăp leh anăn gĭr hŏng diñu, kyuadah Gơ̆ pap kơ phung ƀuôn sang leh anăn kơ sang yang Gơ̆, Gơ̆ tiŏ nao phung hưn kơ diñu nanao, iêo jak diñu lŏ wĭt kơ Gơ̆. Ƀiădah diñu mưč nanao kơ phung mnuih Aê Diê tiŏ nao, bi êmut kơ klei Gơ̆ blŭ, djă djik djak kơ phung khua pô hưn êlâo Gơ̆ (êlan 16). Anei jing blư̆ tal êlâo hlăm Klei Bi Mguôp Hđăp, lu boh blŭ bi êdah kơ klei amâo huĭ mpŭ kơ Aê Diê čih mbĭt hlăm sa êlan. Klei anăn brei ƀuh diñu tơl amâo lŏ dưi bi hlao ôh leh anăn gao mmông leh čiăng tlaih mơ̆ng klei Aê Diê bi kmhal. Kyuanăn, klei pap Aê Diê jing hĕ klei amâo mâo pap ôh (êlan 15-17). Mtao Sêđêkia amâo gưt ôh kơ Khua pô hưn êlâo Y-Yêrêmi ƀiădah ngă klei bi kdơ̆ng hŏng čar Ƀaƀilôn ruê̆ dua păn thŭn ñu gưt. Aê Diê atăt mtao phung Kalđê hriê bi blah hŏng čar Yuđa leh anăn bi mdjiê lu mnuih mơ̆ng phung hđeh hlŏng kơ phung mduôn. Jih jang phung dôk hdĭp arăng atăt ba jing mnă. Diñu čuh sang yang Aê Diê leh anăn sang mtao, bi klưh mnư̆ ƀuôn Yêrusalem. Jih jang mnơ̆ng yuôm hlăm Sang kkuh mpŭ, hlăm sang mtao arăng mă ba kơ čar Ƀaƀilôn sơăi, msĕ si klei Aê Diê blŭ leh hŏng ƀăng êgei Khua pô hưn êlâo Y-Yêrêmi (êlan 21).
Mâo lu blư̆ hlăm klei hdĭp, drei ăt mĭn jih jang klei Aê Diê mtă brei răng sui snăk srăng truh amâodah amâo srăng truh sĭt ôh kyuadah drei ƀuh kơ drei ăt dôk êđăp ênang. Snăn yơh drei kăn lŏ gưt asăp lei kơ Aê Diê. Ƀiădah Aê Diê jing Pô doh jăk amâo dưi ngă ngai ôh kơ klei soh. Tơl kơ drei găn êgao leh anôk klei gĭr leh anăn klei pap Aê Diê leh anăn truh kơ anôk amâo lŏ dưi bi hlao ôh snăn drei srăng tŭ klei bi kmhal ktrŏ êdimima. Đăm dlăng hơăi mang ôh!
Mâo mơ̆ klei hlăm Klei Aê Diê Blŭ drei dôk “bi êmut” leh anăn “khăng kŏ, khăng ai tiê” amâo čiăng hlue ngă ôh?
Wah lač: Ơ Khua Yang, pap brei kơ kâo đa kyuadah kâo dlăng hơăi mang kơ klei Ih gĭr leh anăn kơ klei pap Ih. Đru kâo thâo răng tơdah hmư̆ klei Ih mtă mơ̆ng Klei Ih Blŭ čiăng kơ kâo kmhal kơ klei soh leh anăn lŏ wĭt kơ Ih êlâo kơ êgao mmông. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôtantô 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
