II Xwmtxheej Vajntxwv 36:11-21
Nqe cim:
“Tiamsis lawv saib tsis tau Vajtswv cov cevlus, tsis quavntsej nws tej lus thiab luag cov cev Vajtswv lus plig mus txog thaum tus Tswv chim rau nws haivneeg, lawv thiaj khiav tsis dim tus Tswv txojkev rau txim li” (II Xwmtxheej Vajntxwv 36:16)
Lus nug xav:
– Vajntxwv Xedekiyas yog ib tug neeg zoo li cas thiab ua txhaum qhov twg?
– Nqi zog thaum lub tebchaws tawv ncauj tsis lees txim?
– Vim li cas peb pheej tsis mloog lus thaum tus Tswv qhuab ntuas?
Vajntxwv Xedekiyas yog Vajntxwv Yauxiyas tus tub. Nws raug cov neeg Npanpiloos tus Vajntxwv Nenpukajnexales yuam kom tuav tus Tswv lub npe coglus ncaj ncees rau cov Npanpiloos mus li. Zoo ib yam li peb tug vajntxwv ua ntej, Vajntxwv Xedekiyas kuj “ua txhaum rau tus Tswv” (nqe 12). Tus cevlus Yelemis hais kom Vajntxwv Xedekiyas cia li los cuag tus Tswv, tsis txhob mus pemlom lawm, Yelemis ntuas kom vajntxwv ncaj ncees rau Npanpiloos vim qhov ntawd yog tus Tswv dej siab. Tiamsis vajntxwv tsis txo hwjchim thaum hnov Yelemis tus uas yog Vajtswv tus neeg ntuas. Vajntxwv tsis kam lees txim, “nws muaj lub siab tawv tsis kam lees txim thiab tig los cuag tus Tswv uas yog cov Yixalayees tus Vajtswv” (nqe 12-13). Cov povthawj hlob thiab cov pejxeem coob heev kuj mus “ua raws li txhua yam kev qias vuab tsuab uas lwm haiv neeg ua” mus txog qib uas ua qias tus Tswv lub tuamtsev vim lawv tej kev pemlom.
Tej kev txhaum uas vajntxwv, cov povthawj, nrog rau tej pejxeem ua loj mus txog qib uas phem kawg nkaus tsis muaj kev yuav cawm tau lawv. Txawm yog li ntawd los, tus Tswv tseem ua siab ntev, vim hlub cov pejxeem thiab Nws lub Tuamtsev, Nws thiaj txib ntau tus cevlus mus qhia lawv, nqua hu kom lawv tig rov los cuag tus Tswv. Tiamsis lawv thuam cov neeg qhia Vajtswv Txojlus, saib tsis taus tus Tswv tej lus qhia, luag cov cevlus plig (nqe 16). Nov yog thawj zaug nyob hauv Phau Vajluskub Qub, cov lus qhia tshwm txojkev tsis hwm tus Tswv tau muab tso rau hauv ib nqe lus. Qhov no qhia paub tias lawv tsis muaj txojkev cawm thiab yuav raug Vajtswv rau txim lawm. Yog li ntawd, tus Tswv uas yog kev hlub thiaj tsis hlub lawv lawm (nqe 15-17). Vajntxwv Xedekiyas tsis mloog tus cevlus Yelemis hais, nws tawmtsam cov Npanpiloos tom qab uas mloog lus tau cuaj xyoos. Tus Tswv tso cov neeg Npanpiloos tuaj tua cov Yudas txij tus laus mus txog tus hluas. Cov uas seem nyob puavleej raug ntes mus ua qhev. Lub Tuamtsev thiab tej nroog kub hnyiab tas, tej ntsayeej nroog Yeluxalees puastsuaj huvsi. Tej khoom muaj nqis hauv lub Tuamtsev, vajntxwv lub loog puavleej raug coj mus rau tebchaws Npanpiloos, ib yam nkaus li Vajtswv Txojlus uas Yelemis qhia (nqe 21).
Muaj ntau zaus nyob hauv kev ua neej, peb pheej xav tias tus Tswv tej lus ceebtoom ntev mam li muaj lossis yuav tsis muaj hnub tshwm muaj li, vim yus tseem nyob kaj siab. Yog li peb thiaj tsis kam ua raws li Vajtswv Txojlus qhia. Tiamsis Vajtswv tus uas dawbhuv ntxub txojkev txhaum. Thaum peb hla dhau tus nrim ua siab ntev ntawm tus Tswv thiab mus txog qhov uas kho tsis tau zoo ces yuav raug txim hnyav heev. Tsis txhob saib tsis taus!
Thov Vajtswv,
Tus Tswv, thov Koj zam txim vim nyuam yaus saib tsis taus Koj txojkev ua siab ntev, zam txim. Thov Koj pab kom nyuam yaus paub ceevfaj tej lus Koj qhia, tig los lees txim ua ntej yuav lig. Nyuam yaus tuav Tswv Yexus lub npe thov, Amees.
Puas muaj qhov twg nyob hauv Vajtswv Txojlus peb tabtom “thuam” thiab “tawv ncauj” tsis ua raws?
Nyeem Vajluskub hauv peb lub xyoos: I Kauleethaus 2
Kênh Youtube BHKTHN:
