Klei Aê Diê Blŭ: Klei Mmuñ Hđăp 4:1-8
Êlan kliăng: “Kâo srăng đih leh anăn pĭt hŏng klei êđăp ênang; kyuadah knŏng Ih, Ơ Yêhôwa, brei kâo dôk mdei hŏng klei hơĭt” (Klei Mmuñ Hđăp 4:8)
Klei êmuh ksiêm mĭn: Ih ƀuh pô čih Klei Mmuñ Hđăp mrô 4 dôk hlăm ya klei truh? Klei Mmuñ Hđăp anei brei drei thâo ya klei kơ Yêhôwa leh anăn kơ mnuih? Ya klei sĭt nik drei mă tŭ leh anăn si ngă drei yua klei hriăm hruê anei?
Mơ̆ng Klei Mmuñ Hđăp mrô 4, jing klei Mtao Đawit wah lač hŏng jih ai tiê, drei dưi thâo kral klei ñu kwưh akâo kơ klei bi mtlaih hŏng jih ai tiê anei. Ñu đăo sĭt Aê Diê jing Pô kpă ênô leh anăn bŏ hŏng klei pap (êlan 1). Aê Diê pioh leh kơ Ñu pô mnuih thâo mpŭ kơ Ñu, Ñu dôk hmư̆ leh anăn lŏ wĭt lač kơ klei digơ̆ wah lač tui si klei kpă ênô Ñu (êlan 1,3). Ñu jing Pô mă tŭ klei kkuh mpŭ leh anăn mơak hŏng mnơ̆ng ngă yang jing klei kpă (êlan 5). Ñu kiă kriê, tuh brei leh anăn brei klei jăk mơak (êlan 7-8). Knŏng Aê Diê yơh brei kơ drei klei êđăp ênang, klei mdei hơĭt leh anăn klei hơ̆k mơak sĭt. Klei mơak Ñu brei prŏng êdimima, prŏng hĭn kơ klei mâo mnơ̆ng lu êbeh.
Klei Mmuñ Hđăp mrô 4 brei drei ƀuh mâo dua knhuah hdĭp. Mtao Đawit leh anăn phung huĭ mpŭ kơ Aê Diê srăng tui duah leh anăn gưt kơ Aê Diê jih hruê digơ̆ dôk hdĭp. Hlăm klei knap mñai, digơ̆ srăng iêô kwưh akâo klei bi mtlaih mơ̆ng Aê Diê, amâo djŏ knang kơ mnuih amâodah kơ phung mâo klei dưi mkăn ôh (êlan 1). Digơ̆ đăo kơ Aê Diê Pô mâo jih klei myang, Pô sĭt suôr hmư̆ nanao klei digơ̆ kwưh akâo leh anăn brei kơ digơ̆ jih jang mnơ̆ng digơ̆ čiăng. Digơ̆ myơr klei kpă jing mnơ̆ng ngă yang, đăo leh anăn gưt asăp kơ Aê Diê (êlan 5). Digơ̆ duah klei mơak hlăm klei bi mguôp sĭt suôr hŏng Aê Diê amâo djŏ hlăm dŏ ngăn lăn ala ôh (êlan 7). Digơ̆ mâo klei hơĭt leh anăn klei êđăp ênang hlăm ai tiê kyuadah Aê Diê mâo jih klei myang leh anăn sĭt suôr hŏng digơ̆. Mdê hŏng klei anăn, phung bi kdơ̆ng hŏng Aê Diê tui duah klei bi hrăp mơ̆ng dŏ ngăn. Diñu khăp kơ klei hơăi mang leh anăn tui duah klei luar (êlan 2). Diñu đing kơ klei jăk Aê Diê (êlan 6). Diñu lač klei mơak mâo mơ̆ng klei mdrŏng sah kyuanăn diñu tui duah klei anăn (êlan 7). Ti knhal tuč, diñu amâo srăng mâo klei bi hrăp ôh leh anăn diñu hdĭp hlăm klei rŭng răng kyuadah jih jang mnơ̆ng diñu tui duah djăl êgao tuč leh anăn amâo dưi brei ôh mnơ̆ng diñu čiăng hgăm hlăm ai tiê diñu.
Mnuih amâo mâo ôh klei mơak leh anăn klei hơĭt jing mnuih amâo mâo Aê Diê dôk mbĭt ôh! Sa čô mnuih mâo klei êđăp ênang amâo djŏ ñu amâo tuôm hŏng klei knap mñai ôh, ƀiădah mâo Aê Diê dôk mbĭt hŏng ñu, kiă kriê leh anăn bi mtlaih ñu. Ti phung mnuih drei jing? Klei mơak sĭt amâo kbiă hriê mơ̆ng dŏ ngăn ôh, ƀiădah klei mơak sĭt jing dŏ Aê Diê brei. Hlăm jih jang bruă, brei drei tui duah Aê Diê hŏng jih ai tiê, čiêm rông drei pô hŏng klei sĭt suôr, klei kpă ênô leh anăn klei pap Aê Diê. Knang bĕ kơ Khua Yang, djă păn kjăp ti Klei Ñu Blŭ leh anăn êbat hŏng klei kpă ênô ti anăp Ñu, drei srăng mâo klei êđăp ênang leh anăn klei mơak hlăm jih jang klei truh.
Drei mâo leh klei mơak leh anăn klei êđăp ênang sĭt hlăm Khua Yang mơ̆?
Wah lač: Ơ Khua Yang, mpŭ mni kơ Ih, jing Ama kâo Pô Mâo Jih Klei Myang, sĭt suôr leh anăn bŏ hŏng klei khăp! Kâo mâo klei mơak leh anăn klei êđăp ênang hlăm siap myang Ih. Đru kâo knang leh anăn gưt asăp kơ Ih nanao, leh anăn thâo dôk ñăt kăp hmư̆ asăp Ih, leh anăn ƀuh bruă jăk Ih hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
