Phau Ntawv Nkauj 4:1-8
Nqe cim:
“Thaum kuv qhau cev pw, kuv tau zoo tsaug zog tso siab lug, tus Tswv, tsuas yog koj tib leeg xwb, thiaj pub kuv muaj kev kaj siab” (Phau Ntawv Nkauj 4:8)
Lus nug xav:
– Koj pom tau tias tus uas sau Phau Ntawv Nkauj 4 tabtom nyob rau lub tsamthawj twg?
– Phau Ntawv Nkauj no qhia rau peb paub dabtsi ntsig txog tus Tswv thiab tibneeg?
– Peb kawm tau qhov tseeb twg thiab siv rau kev ua neej hnub no li cas?
Dhau Phau Ntawv Nkauj 4, yog cov lus Vajntxwv Daviv thov Vajtswv tas siab, peb pom Daviv tej lus thov. Nws ntseeg hais tias Vajtswv yog tus uas ncaj ncees, muaj kev hlub (nqe 1). Tus Tswv npaj cov neeg zoo rau Nws, Nws mloog lawv tej lus thov thiab teb rau lawv raws li Nws txojkev ncaj ncees (nqe 1, 3). Nws yog tus uas tsimnyog tau txais kev pehawm thiab txaus siab nrog rau txojkev ncaj ncees (nqe 5). Nws tivthaiv, muab pub thiab ua kom muaj kev zoo siab (nqe 7-8). Tsuas yog tus Tswv thiaj pub tau txojkev thajyeeb, kaj siab thiab kev zoo tseeb rau peb xwb. Tus Tswv txojkev zoo siab uas pub rau peb loj dua tej khoom uas peb tau.
Phau Ntawv Nkauj 4 qhia rau peb pom ob txojkev ua neej. Vajntxwv Daviv thiab cov neeg ntseeg Vajtswv taij thov thiab mloog tus Tswv lus mus tas lawv sim neej. Thaum raug txomnyem, lawv thov tus Tswv pab xwb tsis vamkhom tibneeg lossis ib lub zog qhov twg pab li (nqe 1). Lawv ntseeg hais tias Vajtswv muaj hwjchim, Nws yuav mloog lawv tej lus thov thiab pub txhua yam rau lawv. Lawv muab txojkev ncaj ncees, ntseeg siab thiab mloog lus fij rau Nws (nqe 5). Lawv nrhiav txojkev zoo siab los ntawm qhov uas nrog Vajtswv sib raug zoo, tsis yog cia siab rau tej khoom ntiajteb (nqe 7). Lawv tau txais txojkev qab siab thiab kaj siab, vim tus Tswv muaj hwjchim thiab ua li Nws hais nrog nraim lawv nyob. Dua li ntawd, cov neeg uas tawmtsam tus Tswv nrhiav kev txaus siab rau tej khoom. Lawv nyiam tej uas tsis muaj qabhau thiab caum txojkev dag (nqe 2). Lawv ua xyem xyav txog tus Tswv txojkev ua zoo (nqe 6). Lawv hais tias kaj siab yog los ntawm txojkev npluanuj thiab muaj txhua yam thaum caum tej ntawd (nqe 7). Thaum kawg, lawv tsis muaj kev txaus siab thiab ua neej nyuaj siab ntsuav, vim txhua yam uas lawv caum tsis ruaj khov, tsis txaus rau lawv txojkev ntshaw.
Lub neej yog tsis muaj kev zoo siab thiab kaj siab ces yog lub neej tsis muaj tus Tswv nyob hauv! Lub neej uas kaj siab tsis yog tsis muaj cua daj cua dub ntsawj raug xwb, tiamsis yog lub neej muaj Vajtswv nrog nraim, tau Nws tiv thaiv thiab pab cawm. Peb yog hom neeg twg? Txojkev zoo siab tseeb tsis yog muaj txhua yam ntau tiamsis kev zoo siab tseeb yog tus Tswv pub. Hauv txhua yam haujlwm, thov Vajtswv qhia kom peb tas siab nrhiav Nws, txhim tu yus tus kheej los ntawm Vajtswv txojkev ncaj ncees thiab kev hlub. Cia li ntseeg tus Tswv, coj raws nraim Vajtswv Txojlus thiab ua zoo tabmeeg Nws, peb yuav tau txais txojkev kaj siab thiab kev zoo siab hauv txhua lub tsamthawj.
Thov Vajtswv,
Tus Tswv, qhuas Vajtswv tus ua tau txhua yam, ua li Nws hais thiab hlub nyuam yaus! Nyob hauv Koj tus duab ntxoov ntxoo nyuam yaus kaj siab thiab zoo siab. Thov Leej Txiv pab nyuam yaus kom muaj kev ntseeg, thiab paub nyob ntsiag to mloog tus Tswv hais, ntsia pom tej haujlwm zoo uas Nws ua hauv nyuam yaus lub neej. Nyuam yaus tuav Tswv Yexus lub npe thov, Amees.
Peb muaj kev zoo siab thiab kaj siab tseeb hauv tus Tswv lawm tau?
Nyeem Vajluskub hauv peb lub xyoos: I Kauleethaus 1
Kênh Youtube BHKTHN:
