I Kauleethaus 3:1-8
Nqe cim:
“Kuv yog tus cog, Apaulaus yog tus ywg dej, tiamsis tus uas ua kom loj hlob yog Vajtswv” (I Kauleethaus 3:6)
Lus nug xav:
– Timthawj Paulus xav hais dabtsi thaum muab nws thiab Apaulaus hu ua “tubtxib”?
– Paulus siv tus duab kev cog qoob cog loo los txhais yam dabtsi?
– Peb pheej muaj tus cwjpwm twg rau cov neeg nrog peb ua Vajtswv haujlwm?
Hauv thawj feem, Timthawj Paulus qhia paub lub siab ntawm tus neeg ntiajteb, tsis tau loj hlob kev ntseeg yog khib, sib cav sib ceg. Lawv xaiv caum thiab qhuas cov thawj, faib ua pab ua pawg (nqe 1-4). Yog li ntawd, Paulus coj kom lawv muaj tus cwjpwm yog, loj hlob dua, qhov ntawd yog lub siab ua tubtxib (nqe 5). Thaum muab nws hu ua “tubtxib”, Timthawj Paulus tsis hais txog “qib haujlwm” tiamsis Paulus piav tus Tswv tes haujlwm nws thiab Apaulaus ua pab rau cov ntseeg zoo ib yam li tus tubtxib.
Timthawj Paulus siv tus duab cog qoob cog loo los txhais qhia qhov uas lawv pheej xav tias Apaulaus thiab Paulus nyias ua nyias haujlwm, tseeb tiag nkawd yeej yog phoojywg sib koom ua haujlwm tiamsis yog nyias ua nyias txoj haujlwv txawv xwb: Paulus yog tus cog, Apaulaus yog tus ywg. Ua lwm seem lus hais, hauv lub siab ua haujlwm ntawm tus tubtxib, Timthawj Paulus thiab Apaulaus yog ob tug sib pab ua tsis yog ib leeg txeeb ib leeg tes haujlwm ua. Tabmeeg ntawm Vajtswv, nkawd ob leeg “puavleej tau nqi zog ib yam”, tsis yog tus no tseemceeb, tus tod tsis tseemceeb. Nkawd ob leeg koom ua tes haujlwm Vajtswv txib, thiab “yuav tau txais nqis zog raws li tes haujlwm uas nkawd ua”. Vajtswv tsis ntaus nqi tes haujlwm peb ua los ntawm qhov piv saib leejtwg ua ntau dua, leejtwg ua tsawg dua, leejtwg ua haujlwm tseemceeb dua. Tus Tswv tsis muab tus neeg no tes haujlwm mus piv rau tus tod muab nqi zog. Sib piv yog lub siab uas ntiajteb ua vim sib piv yuav ua rau muaj kev khib.
Timthawj Paulus lub siab saib taus tus neeg nrog nws ua haujlwm pib muaj thaum chiv thawj, Paulus zeem paub nws thiab lwm tus puavleej yog “tubtxib”. Peb txhua tus txawm yog timthawj, xibhwb, qhia kev ntseeg, tus ntseeg… puavleej yog “tus Tswv cov tubtxib”, nyias ua nyias tes haujlwm Vajtswv cob. Peb pheej pom yus ua ntau dua lwm tus. Txawm yog li ntawd los, Timthawj Paulus qhia hais tias tawg paj txi txiv yog nyob ntawm tus Tswv ua. Paulus hais ob zaug, tus ua kom loj hlob yog Vajtswv” (nqe 6-7). Thaum Timthawj Paulus hais “Tus uas cog thiab tus uas ywg dej yeej tsis tseemceeb dabtsi”, tsis yog Paulus ntaus nqi nqis tus neeg ua timkhawv qhia tus Tswv zaj lub luag haujlwm, tiamsis Paulus hais kom Pawg Ntseeg muaj qhov kev ntsia yog txog lub luag haujlwm ntawm “Vajtswv cov tubtxib”. Nimno, qhov tu siab yog ntau tus neeg hauv peb cov tabtom muab cov neeg uas ua lwm txoj haujlwm saib zoo ib yam sib tw ua, yog li thiaj xeeb lub siab khib, cais pab pawg. Los ntawm qhov kev ntsia yog lub meejmom yus ua, lwm tus ua, thiab tus Tswv pab peb yuav tsis muaj kev sib cav sib ceg, tsis muaj cov neeg nrog ua haujlwm saib zoo li sib tw, tiamsis ib leeg saib taus ib leeg thaum ua haujlwm.
Thov Vajtswv,
Vajtswv, thov Koj qhia nyuam yaus paub tias nyuam yaus thiab cov kwvtij hauv Pawg Ntseeg puav leej yog tabtom sib koom txhim tsa Vajtswv lub Tebchaws. Thov Koj pub kom nyuam yaus muaj lub siab saib taus thiab pab txhawb kev txhim tsa Vajtswv Pawg Ntseeg. Nyuam yaus tuav Tswv Yexus lub npe thov, Amees.
Zaj kawm hnub no hloov tau peb tus cwjpwm thiab txojkev xav zoo li cas?
Nyeem Vajluskub hauv peb lub xyoo: Hauxeyas 9
Kênh Youtube BHKTHN:
