Chivkeeb 3:15, 20-24
Nqe cim:
“Kuv yuav ua kom koj thiab tus pojniam no ua yeebncuab, nws tus xeebntxwv thiab koj tus xeebntxwv yuav ua yeebncuab mus li. Nws tus xeebntxwv yuav tsoo koj taubhau kom ntsoog, thiab koj yuav tom nws lub lujtaws” (Chivkeeb 3:15)
Lus nug xav:
– Tus Tswv coglus tias cajces ntawm tus pojniam yuav tsoo nab lub taubhau kom ntsoog muaj lub ntsiab lus li cas?
– Ntawm lub txim ua txhaum uas tibneeg raug, Vajtswv tau ua li cas rau neeg?
– Tibneeg muaj txojkev cia siab zoo li cas?
Thaum tawm lus rau txim rau txojkev txhaum, tus Tswv hais rau Xatas hais tias hauv tus pojniam cajces yuav muaj ib tug “tsoo koj taubhau kom ntsoog” (nqe 15), txhais tau tias tus ntawd yuav kovyeej Xatas. Nov yog lo lus cog tseg zoo heev, qhia paub tias tus Tswv yeej hlub neeg heev. Tus uas los pab yuav kovyeej dab ntxwgnyoog lub hwjchim, pub rau neeg rov muaj txojkev sib raug zoo nrog tus Tswv. Qhov no yog thawj lo lus hais txog Tswv Yexus nyob hauv Phau Vajluskub, Nws yuav kovyeej dab lub hwjchim thaum Nws tuag saum ntoo khaublig thiab sawv hauv qhov tuag rov qab los.
Tsis yog coglus pub tus Cawmseej, Vajtswv kuj ua ib tes haujlwm muaj nqis heev: “Tus TSWV uas yog Vajtswv txawm muab tawv tsiaj los ua ris tsho rau Adas thiab nws tus pojniam, thiab muab rau nkawd hnav” (nqe 21). Ib tug tsiaj tuag theej kom neeg txojkev txhaum thiab kev txajmuag tau zam. Los tom qab no nyob hauv cov neeg Yixalayees, thaum ua txhaum lawv tuaj thov cov povthawj muab tsiaj tua hlawv fij daws kev txhaum. Thiab qhov loj tshaj yog saum tus ntoo khaublig, Vajtswv tus menyuam Yaj, uas yog Tswv Yexus raug muab tua tuag, ua qhov khoom fij “daws tau neeg ntiajteb tej kev txhaum”.
Vim ua txhaum, tibneeg raug ntiab tawm hauv lub vaj kaj siab mus nyob chaw txomnyem, tiamsis tibneeg lub neej tsis yog tas li ntawd. Lo lus cog tseg muaj tus Cawmseej los pab yog txojkev cia siab zoo heev, thiab yog Vajtswv txojkev npaj rau tibneeg txhaum. Vajtswv txib timtswv los zov lub vaj “tsis pub leejtwg mus ze tsob txiv ntoo uas cawm tau txojsia”, yog li tibneeg txawm yog yuav siv zog npaum twg los ua tsis tau kom yus muaj txojsia ntev (nqe 24). Tiamsis Vajtswv coglus rau cov uas ntseeg Tswv Yexus hais tias: “Cov uas ntxhua lawv tej tsoos tsho huv lawm, yog cov uas nyob kaj siab lug, lawv muaj feem mus noj cov txiv uas muaj txojsia thiab muaj feem mus ntawm cov roojvag mus rau hauv lub nroog” (Tshwmsim 22:14). Thaum ntseeg Tswv Yexus, peb twb tau ntxhua peb lub tsho hauv tus menyuam Yaj cov ntshav, tau cai mus ze tsob txiv uas cawm tau txojsia. Xav kom peb txhua tus puavleej yog cov uas ncaj ncees taug txojkev ntseeg, kovyeej dab ntxwgnyoog tej kev dag ntxias, kom txhua hnub peb tau koob hmoov nyob hauv tus Tswv, thiab kub siab lug tos hnub uas tus Tswv pub txojsia ntev dhawv mus ibtxhis nyob saum ntuj Ceebtsheej.
Thov Vajtswv,
Vajtswv, ua Koj tsaug; txawm yog nyuam yaus yog neeg txhaum, los Koj yeej qhib txojkev kom rov los cuag tau Koj. Ua Tswv Yexus tsaug, vim muaj Koj tsoo nab lub taubhau ntsoog, kovyeej Xatas lub hwjchim, yog li nyuam yaus thiaj tau txojsia ntev thaum los ntseeg Koj. Thov Koj pab kom nyuam yaus muaj kev cia siab, thiab tas siab qhia Txojmoo Zoo mus rau ntau leej. Nyuam yaus tuav Tswv Yexus lub npe thov, Amees.
Peb puas tabtom cia siab ntsoov rau tus Cawmseej lossis tseem ua neeg tas kev cia siab hauv kev ua txhaum?
Nyeem Vajluskub hauv peb lub xyoo: Hauxeyas 2
Kênh Youtube BHKTHN:
