Klei Aê Diê Blŭ: Klei Bi Hriêng 25:11-15
Êlan kliăng: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mmông găl, čiăng dưi bi mbha klei pap kơ phung dôk hmư̆” (Êphêsô 4:29)
Klei êmuh ksiêm mĭn: Si klei bi êdah kơ klei blŭ găl djŏ? Si klei blŭ brei phung ƀuôn sang Aê Diê mâo? Ya klei drei akâo kơ Aê Diê brei bi mlih čiăng mâo klei blŭ bi găl djŏ?
Mtao Salômôn mñă phung ƀuôn sang Aê Diê brei bi êdah klei thâo mĭn hlăm klei blŭ. Klei blŭ brei mtô boh phŭn kpă ênô leh anăn ba klei tŭ dưn kơ phung hmư̆. Wăt tơdah hlăm boh klei brei blŭ klei ƀuah mkra djŏ klă, ƀiădah ăt brei mđing kơ klei srăng blŭ kñăm đru kơ phung hmư̆ ênưih thâo săng, mơak lŏ mkra wĭt (Klei Bi Hriêng 15:23).
Klei blŭ găl djŏ brei mâo klei bi êdah snei: Tal sa, klei blŭ djŏ klă brei blŭ djŏ mmông (êlan 11). Klei blŭ bi hmô msĕ si phung tuh mah dưm sa boh mah mƀlir hlăm jar mkra hŏng prăk, phung thâo mĭn thâo yua klei blŭ djŏ boh klei, djŏ mmông. Tal dua, pô blŭ thâo mĭn brei blŭ hŏng mnuih thâo dôk hmư̆ (êlan 12). Msĕ si añŭ kông mah yuôm brei buh amâodah băk djŏ anôk, msĕ si kkuê, kngan čiăng hưn mdah klei jăk siam, yuôm bhăn phung buh. Tơdah bhĭr añŭ yuôm kơ ŭn, diñu srăng juă ti jơ̆ng leh anăn wĭr kĕ pô brei (Y-Mathiơ 7:6). Tal tlâo, klei blŭ thâo mĭn brei jing klei blŭ djŏ hnơ̆ng, kpă ênô. Pô arăng tiŏ nao sĭt suôr hŏng pô tiŏ nao ñu hưn klă boh phŭn brei hưn, bi leh bruă klam khua jao (êlan 13). Bi phung blŭ luar, ƀuăn amâo ngă, amâo ba ôh klei tŭ dưn kơ phung dôk hmư̆ leh anăn wăt kơ pô, amâo mdê ôh hŏng knam jŭ, mâo angĭn, ƀiădah amâo mâo hjan (êlan 14). Knhal tuč, jing klei blŭ djŏ găl brei blŭ hlăk êjai hơĭt ai tiê, brei blŭ êdu êun, ba klei mđĭ ai phung dôk hmư̆ (êlan 15). Dôk ñăt leh anăn amâo djăl ăl ôh amâo djŏ jing klei bi knăl kơ klei êdu awăt ôh ƀiădah jing mơ̆ng ai ktang (bi msĕ Klei Bi Hriêng 16:32).
Grăp čô phung đăo kơ Krist brei wah lač leh anăn hlue si klei klei hdĭp mrâo hlăm Khua Yang Yêsu Krist. Sa hlăm dŭm klei bi knăl kơ klei mlih mrâo jing bi mlih hlăm klei blŭ. Brei drei hriăm leh anăn yua klei blŭ găl djŏ čiăng ba klei tŭ dưn kơ pô mkăn. Khua ƀĭng kna Y-Pôl mtô: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mmông găl, čiăng dưi bi mbha klei pap kơ phung dôk hmư̆” (Êphêsô 4:29). Akâo kơ Yang Mngăt Jăk mtô lač kơ grăp čô drei brei blŭ klei jăk čiăng mđĭ ai, ba klei tŭ dưn kơ phung dôk hmư̆, leh anăn bi êdah klei khăp, luă gŭ kñăm bi đru guh kơang Anăn Khua Yang.
Drei mđing kơ pô dôk hmư̆ srăng mâo ya klei tŭ dưn hlăm klei pô blŭ mơ̆?
Wah lač: Ơ Aê Diê, kâo bi mni kơ Ih pap brei leh klei soh kâo leh anăn bi mlih kâo jing mnuih mrâo hlăm Ih. Akâo kơ Khua Yang đru kâo luă gŭ nanao, bi khăp nanao, djŏ hnơ̆ng čiăng mâo nanao klei blŭ djŏ ba klei mđĭ ai leh anăn bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 42
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
