Pajlug 25:11-15
Nqe cim:
“Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog” (Efexus 4:29)
Peb saib ntxiv Phau Txhais Tshiab HMOWSV:
“Tsis txhob cia tej lus phem tawm hauv nej lub qhov ncauj los, tsuas yog hais lo lus zoo uas tsim tsa lub neej raws li uas cheem tsum xwv thiaj li muaj nuj nqes rau cov uas tau hnov.”
Lus nug sawvdaws xav:
– Tej lus hais zoo muaj yam dabtsi tshwjxeeb?
– Tus Tswv haivneeg yuav tsum muaj tej lus hais zoo licas?
– Peb thov Vajtswv hloov yam dabtsi kom muaj tej lus hais zoo?
Vajntxwv Xalumoos hais meej tias Vajtswv haivneeg yuav tsum qhia tshwm kev txawj ntse los ntawm tej lus hais uas zoo. Tej lus hais yuav tsum muaj lub ntsiab ncaj ncees thiab coj tau txiaj ntsig rau tus mloog. Txawm tias thaum cheemtsum yuav tsum hais tej lus qhuab ntuas, los kuj yuav tsum ceev faj txog txojkev hais lus kom tus mloog kam txais yuav thiab zoo siab pauv hloov (Pajlug 15:23)
Tej lus hais zoo yuav tsum muaj tej yam tshwjxeeb li no: Thib ib, lo lus hais zoo yuav tsum hais rau lub sijhawm tsim nyog hais (nqe 11). Tej lus zoo tau muab piv zoo li tus kws txua nyiaj kub tso ib lub txiv kub uas ua zoo nkauj heev rau hauv ib lub thawv nyiaj, cov neeg txawj ntse yeej paub siv lus yog caij thiab yog sijhawm. Thib ob, tus hais lus zoo yuav tsum hais rau tus uas txaus siab mloog (nqe 12). Ib yam li cov hlaws kub muaj nqis yuav tsum dai rau qhov chaw tsim nyog xws li caj dab lossis txhais tes kom qhia tau tus neeg uas coj cov hlaws qhov kev zoo nkauj thiab txiaj ntsig. Yog muab hlaws dai rau npua, ces yuav raug npua tsuj thiab tig los tom tus uas dai hlaws rau (Mathais 7:6). Thib peb, lus hais zoo yuav tsum yog lus ncaj ncees thiab muaj tseeb. Tus neeg xa xov ncaj ncees yeej qhia tej lus tseeb raws li tus tswv hais, thiab ua tiav lub luag haujlwm uas tus tswv muab cob (nqe 13). Tiamsis, thaum hais lus khav theeb, ces tsis coj tau ib yam dabtsi zoo rau cov uas mloog thiab nws tus kheej, zoo ib yam li pom huab dub thiab cua tuaj tiamsis tsis los nag (nqe 14). Qhov kawg, lus hais zoo yuav tsum hais thaum tswj tau tus kheej lub siab tus, yuav tsum hais lus mos muag, coj kev zoo siab, txhawb zog rau tus uas mloog (nqe 15). Kev ua siab ntev thiab tsis chim sai tsis yog lub cim qhia tias tsis muaj zog, tiamsis yog lub cim ntawm kev muaj zog (saib Pajlug 16:32).
Txhua tus ntseeg yuav tsum thov Vajtswv thiab coj lub neej tshiab hauv Tswv Yexus Khetos. Ib qho ntawm cov cim qhia tias muaj kev hloov tshiab yog kev hloov hauv txojkev hais lus. Peb yuav tsum kawm thiab siv tej lus hais zoo kom coj tau txiaj ntsig rau lwm tus. Timthawj Paulus qhia tias: “Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog” (Efexus 4:29). Thov Vaj Ntsujplig qhia peb txhua tus niaj hnub hais tej lus zoo los txhawb zog, coj tau txiaj ntsig rau tus mloog, thiab qhia tshwm kev hlub, kev mos muag kom sib pab ua tau rau Vajtswv tau koobmeej.
Thov Vajtswv,
Tus Tswv, nyuam yaus ua Koj tsaug uas Koj twb zam nyuam yaus tej kev txhaum thiab hloov nyuam yaus los ua ib tug neeg tshiab hauv Koj lawm. Thov Koj pub kom nyuam yaus niaj hnub muaj siab txo hwjchim, hlub tibneeg, thiab tswj tus kheej, kom hais tau tej lus zoo uas txhawb zog thiab ua rau Koj tau koobmeej. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas quavntsej txog cov mloog yuav txais tau txiaj ntsig li cas dhau ntawm peb tej lus hais?
Nyeem Vajluskub hauv peb lub xyoo: Yelemis 42
Kênh Youtube BHKTHN:
