Philip 1:3-8
“Mưh đon inh ‘blŏk kơ iĕm, inh bơnê kơ ‘Bok Kei-Dei.” (Philip 1:3)
Nơ̆r jet tơchĕng pơwao:
– ‘Bok Pôl pơm kiơ rim wơ̆t sư ‘blŏk kơ bơngai lui tơ Hnam Akŭm Philip?
– Sư băt bơnê păng bơnê kơ Kră Yang gah tơdrong kiơ tơ anih lu sư?
– Lăm tơdrong krao khan tang lu bơ̆n juăt ‘noh kiơ?
Sơ̆p Hla ar Nơ̆r ‘Bok Kei-Dei âu pơma kơ tơdrong chơt hiôk, jơhngơ̆m băt bơnê, păng đei jơhngơ̆m krao khan bơnê kơ Kră Yang lăm ‘Bok Pôl rim wơ̆t sư ‘blŏk kơ Khul Bơngai Lui tơ pơlei Philip. Sư băt bơnê păng nơ̆r bơnê kơ Kră Yang gah tơdrong wang hơdai bơngai lui tơ pơlei Philip lăm tơdrong chă bơtho Tơdrong ‘Nao ‘Lơ̆ng. Lu sư wang hơdai klah asong tơdrong pŭn hiôk păng tơdrong anat anot lăm tơdrong jang gleh glăn pơmat tat âu (tr 3-6). ‘Bok Pôl tơ’bôh jơhngơ̆m ‘mêm mơnat sư hăm lu bơngai tơ pơlei Philip. Sư đei ‘blŏk kơ dôm tơdrong chơt hiôk dah ơh sơ’ngon lăm tơdrong ră roi Anăn Kră Yang wơ̆t blŭng a sư truh tơ pơlei Philip ( Tơdrong Jang 16:6-40). Mă khan kơplah sư oei lăm hnam phak, mă-lei jơhngơ̆m sư oei ‘blŏk kơ lu sư hăm jơhngơ̆m hiôk chơt păng băt bơnê. Jơhngơ̆m ‘mêm mơnat sư hăm bơngai lui tơ pơlei Philip jơ̆ jơhngơ̆m ‘mêm mơnat,’mêm kơeng ‘noh pơm tơ’bôh tơdrong ‘mêm Kră Yang Yêsu Krist. ‘Nok Pôl ling-lang chơt hiôk kơplah sư pơm tơ’bôh tơdrong ‘mêm sư hăm kon pơlei Kră Yang, thoi sư đei khan hăm bơngai lui tơ Têsalônik khan sư wei rong lu sư iơ̆m dim nhen thoi bơngai mĕ tơmŏm kon păng wă klah asong tơdrong arih sư kơ lu sư (I Têsalônik2:7-8).
Đei jơhngơ̆m bơnê kơ Kră Yang kơplah krao khan tang pơm mah mai lăm chăl arih krao khan ‘Bok Pôl. Jơhngơ̆m băt bơnê păng nơ̆r bơnê kơ Kră Yang ling-lang pơm tơ’bôh rơđah nhen lăm nơ̆r sư krao khan lăm kơthơ sư chih kơ Khul Bơngai Lui. Sư ‘bôh tơdrong ‘mêm mơnat Kră Yang oei jơ̆p anih, tơ rim chăl arih đei tơplih, tơ rim ‘nu jơhngơ̆m ‘lơ̆ng đei pơm tơ’bôh, păng lăm rim tơdrong đei pơlong. Đơ̆ng đei tơdrong truh, ‘Bok Pôl ưh kơ đei layơ khan ưh kơbăt bơnê kơ Kră Yang, păng mă kơplah oei lăm hnam phak kơplah dang ei (tr 7,13-14), sư ưh kơ tơchĕng kơ sư kơdih mă lei sư ling-lang ‘blŏk tơchĕng kơ lu ‘nhŏng oh wă kơ đei jơhngơ̆m chơt hiôk păng bơnê kơ Kră Yang. Lơ Bơngai Lui bơnê kơ Kră Yang kơplah đei tơdrong hiôk chơt huay kơ đei tơdrong kiơ truh păng đei pŭn hiôk. Mă-lei hăm ‘bok Pôl, sư bơnê kơ Kră Yang, mă khan đei tơdrong anat anot truh thoi sư đei pơtrŭt kon pơlei Kră Yang: “Iĕm ‘nĕ kơ hli, ưh kơ hli minh tơdrong kiơ ôh. Mălei iĕm athei krao khan apinh ‘Bok Kei-Dei wei-lăng păng tơgŭm iĕm lăm tôm tơdrong păng athei băt bơnê kơ Sư” (Philip 4:6).
Dang ei, lăm lu kon pơlei Kră Yang ngăl kơ’bah jơhngơ̆m bơnê kơ Kră Yang kơplah krao khan, krao khan tang. Lu bơ̆n ngăl năm hăm Kră Yang wă krao khan apinh Sư hơmet tơdrong anat bơ̆n kơdih păng bơngai nai, lu bơ̆n bơnê kơ Kră Yang gah dôm tơdrong Kră Yang tơgŭm bơ̆n, mă lei hiơt kơ dôm tơdrong Kră Yang đei tơgŭm lu ‘nhŏng oh bơ̆n. Apinh Kră Yang tơgŭm lu bơ̆n ‘blŏk tơtăm , đĭ jơhngơ̆m ‘mêm mơnat dih băl, ‘bôh dôm tơdrong Kră Yang ăn kơ lu ‘nhŏng oh, wă kơ đei lơ tơdrong chơt hiôk bơnê kơ Kră Yang kơplah krao khan, krao khan tơgŭm.
Ơ Kră Yang, apinh Ih mơnat kơ inh yua kơ inh kơ’bah tơdrong bơnê kơplah krao khan. Apinh bơtho inh băt bơnê kơ Ih ling-lang kơplah đei tơdrong gleh truh, bơnê kơ Ih gah inh păng ‘nhŏng oh inh. Yua anăn Kră Yang Yêsu Krist, Amen.
Lu bơ̆n hăm bơnê kơ Kră Yang kơplah krao khan ưh?
Đŏk Sơ̆p Hla ar ‘Bok Kei-Dei lăm pêng sơnăm: Jêrêmi 29
Kênh Youtube BHKTHN:
