Phau Ntawv Nkauj 138:1-8
Nqe cim:
“Tus Tswv, kuv ua koj tsaug kawg siab kawg ntsws, kuv hu nkauj qhuas koj tabmeeg tej vajtswv” (Phau Ntawv Nkauj 138:1)
Lus nug rau sawvdaws xav:
– Vajntxwv Daviv qhia tshwm nws kev nco tus Tswv txiajntsig li cas?
– Nws tau saj tej yam twg hauv lubneej nrog tus Tswv mus?
– Nws txhawb peb kev txhawb nqa Vajtswv li cas?
Phau Ntawv Nkauj 138 yog zaj lus sau zog txog Daviv kev ua tus Tswv tsaug, yog ib tug neeg uas zeem paub yus lub neej tagnrho yog Vajtswv tug. Lo lus qhib thawj nws tshaj tawm hais tias nws yuav ua tus Tswv tsaug tas nws lub siab thiab yuav nco ntsoov tus Tswv txiajntsig, zoo siab hlo hu nkauj qhuas Vajtswv tabmeeg tej vajtswv (nqe 1). Nws tig xubntiag pehawm tus Tswv tuaj rau ntawm lub Tuamtsev (nqe 2), qhia tshwm nws kev coglus rau tus Tswv hauv txhua yam.
Vajntxwv Daviv twb tau saj tus Tswv kev ntxiv zog thiab teb nws tej lus thov ntau zaus dhau los ntawm nws kev taij thov tus Tswv (nqe 3). Vim li ntawd, nws yeej nco ntsoov tus Tswv txiajntsig thiab tseem cia siab rau tus Tswv heev ntxiv. Tag nrho hauv Vajntxwv Daviv lubneej, tej tebchaws ua yeebncuab tau tuaj vij lub tebchaws Yixalayees (2 Xamuyees 8:1-10). Txawm li ntawd los, nws ntseeg hais tias muaj ib hnub, tej vajntxwv hauv ntiajteb no yuav zeem paub tus Tswv yog tus muaj hwjchim loj kawg nkaus tsimnyog lawv pehawm (Yaxayas 45:23; Phau Ntawv Nkauj 22:27). Nws tos ntsoov txog hnub ntawd, thaum uas Vajtswv lub siab hlub tshua thiab Nws txoj kev zoo tau qhuas thoob ntiajteb (nqe 4-6).
Daviv txoj kev qhuas Vajtswv tsis yog pehawm do dus xwb, tiamsis yog hais raws li tej uas nws twb tau saj dhau los lawm. Nws nco ntsoov tus Tswv txiajntsig vim qhov uas tus Tswv muaj siab dawb siab zoo, thiab qhov tseeb uas ruaj khov nyob ntawm tus Tswv. Thaum xav txog tus Tswv tej yam ntxwv uas zoo kawg nkaus ua rau vajntxwv Daviv tseg tsis tau kev hu nkauj ua tus Tswv tsaug. Nws rov hais ntxiv txog nws kev cia siab rau tus Tswv kev tiv thaiv (nqe 7). Nws ntseeg hais tias tus Tswv yeej nyob ntawm nws ib sab pab nws hla dhau tej kev khwv hauv lub neej. Nws thov Vajtswv kom Vajtswv ua tiav tej uas Vajtswv tau pib ua rau hauv nws lubneej, thiab siv nws lubneej li yam cuabyeej ua kom tiav Vajtswv tus dej siab (nqe 8).
Daviv tej lus thov Vajtswv qhia peb hais tias tus Tswv muaj homphaij rau txhua tus tibneeg. Peb tshwmsim los ua neej hauv ntiajteb tsis yog xwb tim muaj tiamsis Vajtswv pub cai. Vajtswv tsim peb los zoo kawg nkaus xav tsis thoob thiab muaj homphiaj meej meej rau txhua tus (Phau Ntawv Nkauj 139:14). Peb yuavtsum ntse ntsuav zeem paub Vajtswv lub homphiaj rau yus lubneej thiab mloog Nws lus ua kom tiav lub homphiaj ntawd raws li Vajtswv kev coj.
Phau Ntawv Nkauj 138 yog tej pajlug Daviv sau qhia tshwm nws kev nco tus Tswv txiajntsig tiag tiag, txo hwjchim thiab nyob hauv tus Tswv kev tswj kav. Nws qhuas tus Tswv txoj kev hlub uas ruaj khov, tej haujlwm loj kawg nkaus uas tus Tswv tau ua. Nws kuj qhuas txog tus Tswv kev nrog nraim thiab tiv thaiv nws lub neej dhau los. Dhau qhov ntawd, nws xav txhawb peb lub zog kom txo hwjchim thiab los nyob hauv tus Tswv, muaj kev ntseeg ruaj khov, tas siab ua tus Tswv tsaug, txhawb nqa tus Tswv, yog Tus uas pab cawm peb.
Thov Vajtswv,
Tus Tswv, nyuam yaus ua Koj tsaug rau Koj txoj kev hlub, Koj txoj kev ua zoo rau nyuam yaus lubneej. Thov pab nyuam yaus nco ntsoov Koj tej txiajntsig, tas siab qhuas Koj, ua Koj tsaug tas nyuam yaus lubneej. Nyuam yaus tuav Tswv Yexus khetos lub npe thov, Amees.
Ib tsoom mloog uas hmov tshua,
Peb puas tas siab ua Vajtswv tsaug hauv lub neej thaum tau zoo thiab txomnyem?
Nyeem Vajluskub hauv peb lub xyoo: Yelemis 26
Kênh Youtube BHKTHN:
