I Petus 1:17-21
Nqe cim:
“Thaum nej thov Vajtswv, nej hu nws hais tias Txiv, Vajtswv yog tus uas txiav txim rau txhua tus raws li tes haujlwm uas sawvdaws tau ua los lawm, nws tsis xaiv leejtwg ntsejmuag; yog li ntawd nej yuav tsum hwm Vajtswv mus tas nej simneej uas nyob hauv ntiajteb no.” (I Petus 1:17)
Lus nug rau sawvdaws xav:
– Yog twb paub meej hais tias Vajtswv yog tus uas tsis xaiv leejtwg ntsej muag, tus ntseeg yuav tsum ua neej li cas?
– Tswv Yexus twb them tus nqi dabtsi kom peb tau ua Tus tsis xaiv leejtwg ntsejmuag cov menyuam?
– Peb yuav ua neej li cas kom tsis ntshai thaum sawv tabmeeg ntawm Tus tsis xaiv leejtwg ntsejmuag xubntiag?
Cov ntseeg yuav tsum paub hais tias Vajtswv yog tus uas yuav txiav txim rau txhua tus tibneeg tej haujlwm raws kev ncaj ncees, vim Nws yog “Tus tsis xaiv leejtwg ntsejmuag.” Vajtswv tsis txiav txim ib tug neeg raws li tus ntawd lub meejmom hauv ntiajteb, tes haujlwm hauv Pawg Ntseeg, nws tebchaws, lossis tej cuab tam uas nws muaj, tej ntawd tsuas yog yam uas yuav dua mus, hnub no nyob taigkis ploj xwb, tiamsis Vajtswv txiav txim raws li tej haujlwm uas lawv ua. Yog twb paub hais tias Vajtswv yog tus ncaj ncees kawg nkaus, ces tib txoj haukev pab kom tsis raug txiav txim thiab ua haum Vajtswv siab yog kev ua neej hwm Vajtswv kawg siab kawg ntsws (nqe 17). Thaum Timthawj Petus mus ua timkhawv txog Vajtswv rau Kauneli-us, nws hais tias: “Nimno kuv paub tseeb hais tias Vajtswv tsis xaiv leejtwg ntsejmuag. Txawm yog haivneeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab” (Tes Haujlwm 10:34-35). Lub neej hwm Vajtswv kawg siab kawg ntsws yuav pab kom peb tsis khav theeb, muab hlob, thiab tsis muab peb tus kheej piv nrog cov neeg phem txojkev vam meej, tiamsis paub xyuamxim hauv tej lus peb hais thiab tej haujlwm peb ua tabmeeg tus Tswv thiab lwm tus kom ua haum Vajtswv siab. Timthawj Paulus ua qauv hauv kev txo hwjchim kawg nkaus thaum nws hais tias: “Kuv niaj hnub tswj rawv kuv lub cev rau qhov kuv yeej yog tus uas qhia lwm tus. Yog kuv tsis tswj kuv lub cev ntshai nyob tsam kuv tsis tau nrog luag sib tw khiav” (I Kauleethaus 9:27).
Los ntawm lub meejmom ua “Tus uas tsis xaiv leejtwg ntsejmuag” li me nyuam, peb yuav tsum lees paub tias peb tus kheej yeej tsis muaj peevxwm dim taus ntawm kev txhaum, txawm peb siv nyiaj kub los yog tej cuab tam hauv lub ntiajteb no los yeej txhiv tsis tau peb dim ntawm kev txhaum raws roj ntsha thiab tej kev txhaum nrwb nrhiav. Tiamsis Vajtswv yog tus uas tau txhiv peb dim ntawm kev txhaum lub txim los ntawm ib tug nqi uas kim kawg nkaus. Vajtswv Txojlus qhia hais tias: “Yam uas Vajtswv muab txhiv nej yam ntawd tsis poob nqi li tej nyiaj tej kub…, yam ntawd yog Yexus Khetos cov ntshav uas muaj nqis heev, Yexus Khetos zoo li tus menyuam yaj uas tsis muaj ib qho phem lossis dub doog li” (nqe 18-19). Vim hlub tibneeg, Vajtswv tau npaj tseg txojkev cawm dim txij thaum tsim lub ntuj lub teb, dhau los ntawm Tswv Yexus txojkev tuag thiab txojkev sawv hauv qhov tuag rov los (nqe 20). Qhov ntawd thiaj yog lub hauv paus kom peb tso siab tag nrho thiab tso peb txoj kev cia siab rau Vajtswv (nqe 21).
Yog peb twb lees tias Tus tsis xaiv leejtwg ntsejmuag yog peb Leej Txiv lawm, thov tus Tswv pab kom peb ua tau lub neej raws li Timthawj Paulus qhia hais tias: “Vajtswv twb txhiv nej kim kawg li los lawm. Yog li ntawd, nej yuav tsum cia nej lub cev ua rau Vajtswv tau ntsejmuag” (I Kauleethaus 6:20). Tsis tas li ntawd xwb, peb yuav tsum muaj lub siab hwm Vajtswv thiab ua neej ncaj ncees nyob hauv lub ntiajteb no.
Thov Vajtswv,
Leej Txiv uas ncaj ncees, nyuam yaus ua tsaug uas Koj tau tuag theej nyuam yaus tej kev txhaum saum tus ntoo khaublig. Thov Vaj Ntsujplig pab nyuam yaus ua neej dawb huv, npaj siab fij lub cev, tus ntsujplig thiab lub zog los ua rau Koj lub npe tau koobmeej. Nyuam yaus tuav Yexus Khetos lub npe thov, Amees.
Peb puas ua lubneej ncaj ncees kom Vajtswv tau koobmeej lawm tau?
Nyeem Vajluskub hauv peb lub xyoos: II Xwmtxheej 34
Kênh Youtube BHKTHN:
