Chivkeeb 1:1
Nqe cim:
“Thaum chivkeeb Vajtswv tsim lub ntuj thiab lub ntiajteb” (Chivkeeb 1:1)
Lus nug rau sawvdaws xav:
– Lub ntuj lub teb tshwmsim licas?
– Vajluskub qhia txawv tibneeg qhia licas?
– Peb tau txhawb zog licas thaum kawm txog chivkeeb ntawm txhua yam?
Lub hauvpaus ntawm lub ntuj lub teb yog qhov tseem ntsiab ntawm tej lus nruas puag thaum ub los. Tiam thaum ub, tej haiv neeg nyob ib ncig ntawm tebchaws Yixalayees yeej muaj tej zaj lus nruas hais txog tej kev sib ntaus sib tuas ntawm tej vajtswv nrog tej tsiaj loj nyob hauv dej hiavtxwv, ua rau lub ntuj thiab lub ntiajteb tshwmsim los. Mauxes yog ib tug uas tau kawm tagnrho cov neeg Iziv tej kev txawjntse tiam ntawd 40 lub xyoo, nws tau Vajtswv tshoov siab los sau phau Chivkeeb, qhia sau zog txog: “Thaum chivkeeb Vajtswv tsim lub ntuj thiab lub ntiajteb” (nqe 1). Chivkeeb ntawm txhua yam yog los ntawm Vajtswv thiab Nws tes haujlwm tshwmsim los.
Lo lus “chivkeeb” ntaus cim rau qhov pib ntawm lub ntuj lub teb thiab keebkwm tibneeg. Vajtswv yog tus tsim lub ntuj thiab lub ntiajteb yog li ntawd zaj no rhuav tej zaj lus nruas uas hais tias tej vajtswv tsim lub ntuj lub teb. Lub npe “Vajtswv” lus Henplais yog “Elohim”, qhia meej txog qhov uas Vajtswv tshwmsim nrog lub hwjchim uas loj kawg nkaus. Mauxes sau tseg tias: “Thaum koj tsis tau tsim lub ntiajteb thiab tej toj roob hauv pes, koj yeej muaj nyob los lawm, thiab koj yeej yog Vajtswv mus ibtxhis li” (Ntawv Nkauj 90:2) Lub ntuj lub teb muaj chaw pib, tiamsis Vajtswv, tus uas tsim lub ntuj lub teb tsis muaj keeb tsis muaj kawg, tsis muaj nrim thiab tsis raug khi nrog lub sijhawm thiab lub chaw. Nws yog tus uas zoo txaus nkaus, tsis hloov pauv mus ibtxhis.
Tus kws khom xyaum (khoa học) nto npe uas yog Isaac Newton tsim tau ib lub qauv ntawm lub hnub thiab tej hnub qub ya ncig zoo nkauj heev. Muaj ib hnub, tus kws theeb veej xyaum (thiên văn học) tsis ntseeg Vajtswv uas hu ua Halley tuaj pom mas nws qhuas heev thiab nug txog tus tsim lub qauv ntawd. Thaum hnov lo lus teb tias lub qauv no yog tej daim ntoo xwbtim ya los sib dhos ua ke tsis muaj neeg teeb, ces Halley chim heev thiab tsis txaus siab. Yog li Newton thiaj hais ntxiv hais tias, yog tias lub qauv me me no yuav tsum muaj tus tsim, ces lub ntuj lub teb uas zoo nkauj tshaj ntau npaug yeej tsis yog xwbtim tshwmsim los, yeej yog muaj ib tug uas muaj hwjchim loj kawg nkaus thiab txawjntse tshajplaws tsim thiaj tshwmsim los.
Yog cov uas ntseeg Vajtswv, peb koom siab nrog tus sau phau Henpais hais tias: “Twb yog vim peb ntseeg peb thiaj totaub hais tias thaum Vajtswv tsim ntuj tsim teb Vajtswv hais kom muaj, txawm cia li muaj tiag. Yog li ntawd tej uas peb qhovmuag pom yeej los ntawm tej uas peb qhovmuag tsis pom los” (Henplais 11:3). Vajtswv tsim lub ntuj lub teb los ntawm Nws Txojlus thiab raws li Nws tus Ntsujplig. Vajtswv Vaj Peb Leeg yog chivkeeb ntawm txhua yam. Nws yog tus nyob mus ibtxhis, nyob ua ntej txhua yam, tsim txhua yam thiab tsomkwm txhua yam. Nws yog tus uas peb tabtom ntseeg thiab pehawm.
Thov Vajtswv,
Tus Tswv, nyuam yaus thov qhuas Vaj Peb Leeg ibtxwm muaj nyob, tus uas tsim lub ntuj lub teb uas zoo nkauj kawg nkaus. Nyuam yaus ua Koj tsaug vim Koj tau tsim txhua yam, thiab Koj pub rau nyuam yaus tau los ntseeg thiab pehawm Koj. Thov kom nyuam yaus lubneej niaj hnub tshajtawm txog Koj kev tsim txhua yam. Nyuam yaus tuav Yexus Khetos lub npe thov, Amees.
Hnub no, peb yuav ua dabtsi los qhuas txog Vajtswv kev tsim txhua yam?
Nyeem Vajluskub hauv peb lub xyoos: I Xwmtxheej Vajntxwv 16
Kênh Youtube BHKTHN:
