Tơdrong Pơđơ̆k 24:17-18
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: ‘Nĕ Kơ Hiôk Dah Bơngai Ayăt Kơ Bơ̆n Pơ̆k Huŏng kiơ̆ kơ Sơ̆p Hla bơar ‘Bok Kei-Dei Tơdrong Pơđơ̆k 24:17-18.
17 ‘Nĕ kơ chhôk tơdah bơngai ayăt kơ ih pơ̆k huŏng; Jơhngơ̆m ‘nĕ kơ hal, năr jei ih, 18 Kơnh Kră Yang ‘bôh tơdrong noh Sư ưh kơ lăp đon. Na ưh pă hil kơ sư.
Trong tơm ‘bai pơhrăm ‘nâu:
“’Nĕ kơ chhôk tơdah bơngai ayăt kơ ih pơ̆k huŏng; Jơhngơ̆m ‘nĕ kơ hal, năr jei ih” (Tơdrong Pơđơ̆k 24:17)
Nơ̆r jet tơchĕng pơwao:
– Yua kơ kiơ bơngai lui kơ Kră Yang ‘nĕ kơ chơt hiôk tơdah bơngai ayăt kơ bơ̆n đei tơdrong truh?
– Dah ưh kơ chu kiơ̆ nơ̆r bơtho ‘nâu, gô thoi yơ?
– Kră Yang bơtho kơ bơ̆n athei arih sa thoi yơ hăm bơngai mă ayăt kơ bơ̆n?
Kơkuh kơ đĭ đăng,
Kon pơlei Kră Yang kăl kơ tơ’bôh tơdrong chơt hiôk, bơnê gah tơdrong pŭn hiôk Kră Yang ăn păng Kră Yang dŏng pơklaih mălei ‘nĕ kơ chơt hiôk dah bơngai nai pơ̆k huŏng, mă khan bơngai ayăt kơ bơ̆n. Kră Yang ‘Bok Kei-Dei, Yang băt tôm tơdrong lăm jơhngơ̆m kon bơngai gô ‘bôh lu tơdrong glăi noh păng ưh kơ ‘lơ̆ng ưh kơ lăp đon. Bơngai mă “Ayăt kơ Ih” ưh kơ sĭ wă pơma gah tơdrong tơblah tơduă kon bơngai mălei pơma hơđăl kơ tơdrong ayăt noh, areh tơduă kon bơngai. Lăm tôm tơdrong, Kră Yang ưh kơ wă kơ lu kon Kră Yang chơt hiôk gah tơdrong bơngai nai pơ̆k huŏng. ‘Bok Môis đei bơtho kiơ̆ kơ nơ̆r Kră Yang tơtă: “’Nĕ kơ pơm ‘mong răk rong mong găr hăm rông ‘bôt kơtum kơtŏng ‘nhŏng oh ih, athei ‘mêm kơ lu sư thoi ih ‘mêm akâu ih kơdih, Inh boih Kră Yang” (Lêwi 19:18).
Lăm trong 18, pơtao Sôlômôn tơbăt gah tơdrong lĕch đơ̆ng tơdrong chơt hiôk tơdah bơngai ayăt kơ bơ̆n pơ̆k huŏng “Kơnh Kră Yang ‘bôh tơdrong noh Sư ưh kơ lăp đon, na ưh pă hil kơ sư.” Kră Yang ‘Bok Kei-Dei ưh kơ sĭ jơ̆ Tơ’ngla ‘lơ̆ng tơpăt, ‘lơ̆ng rơgoh đĕch ôh, mălei Sư kư̆m Tơ’ngla ‘mêm mơnat, wă mơnat păng ưh kơ wă phak. Kră Yang lăng ‘bôh jơhngơ̆m hiĕk chhôk chơt hiôk ‘bơ̆t lu bơngai ayăt kơ bơ̆n đei tơdrong pơmat truh ‘noh tơdrong tơplơ̆ kơ tơdrong pơm ‘lơ̆ng thoi noh Kră Yang gô hil kơ lu bơngai mă pơm thoi noh. Đĭ đăng bơngai noh tơmam ‘Bok Kei-Dei ngăl thoi noh Sư ling lang ‘mêm mơnat, hiơ̆k bơngơ̆t. Kră Yang phak kon bơngai ưh kơ sĭ wă kơ kon bơngai pơmat ôh. Na kơnhăm wă tơgŭm kon bơngai tơbral, weh ataih đơ̆ng tơdrong yoch, wă gơh iŏk tơdrong pŭn hiôk đơ̆ng Kră Yang ăn.
Kon Kră Yang athei đei jơhngơ̆m lui ngeh khan ‘Bok Kei-Dei bơih Tơ’ngla sek tơlang tơpăt gô pơm tơwih dôm tơdrong glăi mă bơngai ayăt đei pơm kơ bơ̆n (II Timôthê 4:14). Bơ̆n kăl kơ chơt hiôk kơplah tơdrong tơpăt Kră Yang kĕ jei, mălei ‘nĕ kơ tơchĕng wă pơm tơwih dah hăm pơm hloi lei dah mă tơchĕng kơnê̆ lăm jơhngơ̆m. Kăl kơ ‘blŏk tơdrong sek tơlang păng pơm tơwih noh gah Kră Yang ưh kơ sĭ gah bơ̆n ôh. ‘Bok Pôl bơtho: “… yua kơ tơdrong noh sơ̆ ‘Bok Kei-Dei đei khan thoi âu: Lê̆ kơ Inh pơm tơwih kơ bơngai pơm kơnê̆ noh; Inh gô phak sư yua kơ sư pơm kơnê̆. Yua kơ thoi noh na bơ̆n huay kơ kăl pơm kơnê̆ kơ đe. Lăm hla bơar ‘Bok Kei-Dei kư̆m đei khan dơ̆ng thoi âu: Bu pơm kơnê̆ kơ bơ̆n, kơnh pơgê bơ̆n ‘bôh sư pơngot dah kơ’bah tơmam kiơ, bơ̆n rai tơgŭm bơngai noh; dah sư ol kơ đak bơ̆n ăn nhă… thoi noh na bơ̆n ‘nĕ kơ pơm tơwih kơ sư tơdrong kơnê̆; bơ̆n pơm ‘lơ̆ng kơ sư đĕch wih jei bơ̆n.” (Rôm 12:19-21). Lăm tôm tơdrong, bơ̆n athei ling lang pơm tơ’bôh tơdrong ‘lơ̆ng tơpăt păng tơdrong ‘mêm Kră Yang. ‘Nĕ kơ lê̆ tơdrong areh tơgar iŏk tơdrong chơt hiôk, tơdrong hơđơ̆ng lăm tơdrong arih bơ̆n. Athei kơjăp lăm tơdrong tơpăt Kră Yang, păng pơjao dôm tơdrong kơ Kră Yang, sư gô wei rong, bơwei, dŏng lu bơ̆n.
Lu bơ̆n pôm đon lăm tơdrong krrao khan,
Kơkuh kơ Kră Yang, inh bơnê kơ Ih đei dŏng inh hlôi đơ̆ng dôm tơdrong pơmat truh. Apinh ‘
‘Bă ăn kơ inh ling lang arih tơpăt, ‘mêm păng băt mơnat kơ bơngai mă ayăt kơ inh thoi Kră Yang ‘mêm păng mơnat kơ inh. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng măm ‘mêm kơeng,
Bơ̆n ngăl kơ đei jơhngơ̆m thoi yơ kơplah bơngai mă ayăt kơ bơ̆n đei tơdrong truh?
Bơngai ayăt kơ bơ̆n pơ̆k huŏng, ‘nĕ kơ chơt hiôk
Bơngai ayăt thuơ răm ‘nĕ kơ hiĕk che bơle pơjăm
‘Mêm, mơnat tôm tơdrong
Wă kơ tơdrong ‘lơ̆ng brŏk tơ bơ̆n ling lang
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 15
Kênh Youtube BHKTHN:
