Klei Aê Diê Blŭ: Klei Mphŭn Dơ̆ng 1:1
Êlan kliăng: “Hlăk mphŭn dơ̆ng Aê Diê hrih adiê leh anăn lăn ala.” (Klei Mphŭn Dơ̆ng 1:1)
Klei êmuh ksiêm mĭn: Si adiê leh anăn lăn ala mphŭn mâo? Si klei mdê Klei Aê Diê Blŭ mblang hŏng klei anak mnuih mblang? Si klei mđĭ ai drei tơdah hriăm kơ klei mphŭn mâo jih jang mnơ̆ng?
Phŭn agha adiê leh anăn lăn ala ăt jing nanao akŏ mơ̆ng lu êlan klei yăl ksiêm hriăm mơ̆ng đưm đă truh ară anei. Ênuk đưm, dŭm djuê ana jŭm dar Israel mâo sơăi klei yăl dliê kơ klei bi blah plah wah phung yang leh anăn dŭm mta mnơ̆ng hlăm êa, mơ̆ng anăn mjing leh adiê leh anăn lăn ala. Y‑Môis, pô găn leh 40 thŭn hriăm hlăm hdră mtô bi hriăm jăk mơ̆ng ti Êjip ênuk anăn, mâo Aê Diê brei čih hră Klei Mphŭn Dơ̆ng, brei drei ƀuh leh klei čih khuăt klă mngač: “Hlăk mphŭn dơ̆ng Aê Diê hrih adiê leh anăn lăn ala” (êlan 1). Hlăk mphŭn dơ̆ng mơ̆ng jih jang mnơ̆ng jing kyua Aê Diê leh anăn klei Aê Diê hrih mjing.
Boh blŭ “Hlăk mphŭn dơ̆ng” lač kơ klei mphŭn mkŏ mjing adiê, lăn ala leh anăn hƀuê ênuk anak mnuih. Aê Diê hrih mjing adiê leh anăn lăn ala kyua anăn klei anei lui jih jang klei blŭ lač phung yang hrih mjing lăn ala. Anăn “Aê Diê” boh blŭ phŭn jing “Elohim”, mñă klă Aê Diê mâo hlăm klei guh kơang myang snăk. Y‑Môis čih: “Êlâo kơ mâo čư̆ leh anăn êlâo kơ ih mjing boh lăn leh anăn lăn ala, mơ̆ng ênuk hlŏng lar truh kơ ênuk hlŏng lar, ih jing Aê Diê” (Klei Mmuñ Hđăp 90:2). Adiê, lăn ala mâo mơ̆ng “hlăk mphŭn dơ̆ng” ƀiădah Aê Diê, Pô hrih mjing adiê, lăn ala amâo amâo anôk mphŭn dơ̆ng leh anăn knhal tuč ôh, Ñu jing lă lar leh anăn amâo bi kčah kơ hruê mmông leh anăn wăl anôk ôh. Aê Diê jing kluôm ênŭm, amâo bi mlih ôh hlŏng lar.
Pô ksiêm hriăm klei kreh knhâo hing ang Issac Newton tuôm mkra mjing leh gru hmô rup yang hruê leh anăn dŭm boh mtŭ dar yuôm bhăn snăk. Mâo sa hruê, pô ksiêm dlăng kơ mtŭ mlan amâo đăo kơ Aê Diê ôh Halley ƀuh leh gru hmô anăn bi mni snăk leh anăn êmuh kơ pô mkra leh gru hmô anăn. Leh hmư̆ klei wĭt lač rup anei kyua dŭm pŏk mdhă čŏng bi kƀĭn mă hjăn hŏng klei amâo dăp ôh leh anăn kăn mâo pô mkra mjing rei, Halley ngêñ snăk leh anăn amâo tŭ ư ôh kơ klei anăn. Snăn Newton mblang, tơdah rup anei mâo pô mkra mjing, snăn adiê, lăn ala jăk siam hĭn lu si thâo čŏng mâo hĕ, klă sĭt kyua Pô Myang Kluôm Dhuôm hŏng klei thâo mĭn snăk hrih mjing leh.
Jing phung đăo kơ Khua Yang, drei sa ai hŏng pô čih hră Hêbrơ snei: “Hŏng klei đăo drei thâo săng kơ Aê Diê hrih leh lăn adiê hŏng klei Ñu blŭ, snăn mnơ̆ng dưi ƀuh Aê Diê mjing mơ̆ng mnơ̆ng amâo dưi ƀuh ôh” (Hêbrơ 11:3). Aê Diê hrih mjing leh lăn ala, êngĭt adiê kyua Klei Aê Diê Blŭ leh anăn klei Yang Mngăt Jăk mă bruă. Aê Diê Tlâo Čô Yang jing klei mphŭn dơ̆ng kơ jih jang mnơ̆ng. Ñu jing Pô hlŏng lar, mâo êlâo hĭn kơ jih jang, hrih mjing leh jih jang leh anăn răng mgang jih jang. Ñu jing Pô drei huĭ mpŭ leh anăn kkuh mpŭ.
Hruê anei ya drei srăng ngă čiăng bi mni kơ klei myang Aê Diê hrih mjing jih jang mnơ̆ng?
Wah lač: Ơ Khua Yang, hơêč hmưi kơ Aê Diê Tlâo Čô Yang dôk hlŏng lar, Pô hrih mjing leh lăn adiê, êngĭt adiê jăk siam anei. Kâo hdơr kơ Ih kyua Ih ngă leh jih jang, leh anăn Ih ăt brei kâo dưi đăo leh anăn kkuh mpŭ kơ Ih. Ƀuăn jih klei hdĭp kâo hiu hưn nanao kơ Pô hrih mjing myang êdi. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
